ភ្នំពេញ ៖ សេវាកម្មទូទាត់ប្រាក់តាមរយៈកូដ QR និងតាមបណ្ដាញអុីនធើណែត ត្រូវបានក្រុមហ៊ុន UnionPay ប្រកាសដាក់ឲ្យដំណើរការ នៅក្នុងប្រទេសកម្ពុជា ក្រោមកិច្ចសហប្រតិបត្តិការជាមួយធនាគារ Mekong Bank Public Limited (MekongBank) និងក្រុមហ៊ុន Bongloy Playment Plc កាលពីថ្ងៃទី១៤ ខែកញ្ញា ឆ្នាំ២០១៨។
ការដាក់ឲ្យដំណើរការ សេវាកម្មទូទាត់ប្រាក់នេះ គឺជាការផ្តួចផ្តើមរបស់ ក្រុមហ៊ុន UnionPay ក្នុងការឆ្លើយតប ទៅនឹងការលោតផ្លោះ នៃវិស័យបច្ចេកវិទ្យានៅកម្ពុជា ដែលកំពុងតែតម្រង់ទិសទៅកាន់ “សេដ្ឋកិច្ចឌីជីថល” ជាពិសេសការរួមចំណែក ក្នុងការអភិវឌ្ឍន៍ នៃប្រព័ន្ធទូទាត់ប្រាក់ដោយពុំប្រើប្រាស់ក្រដាសប្រាក់ និងការធ្វើពាណិជ្ជកម្មអេឡិចត្រូនិច (លក់ទំនិញអនឡាញ) សម្រាប់សហគ្រាសធុនតូច និងមធ្យមក្នុងស្រុក។
គិតត្រឹមខែមិថុនាឆ្នាំ២០១៨នេះ ចំនួនអ្នកប្រើប្រាស់អុីនធើណែត នៅក្នុងប្រទេសកម្ពុជា បានកើនឡើងរហូតដល់ទៅ ១២លាននាក់ ដែលកាលពីខែធ្នូ ឆ្នាំ២០១៧ ចំនួនអ្នកប្រើប្រាស់អុីនធើណែតនៅក្នុងប្រទេសកម្ពុជា មានចំនួនត្រឹមតែ ១០,៨លានអ្នកប៉ុណ្ណោះ។ ប្រជាជនមានអាយុក្រោម ៣០ឆ្នាំ មានចំនួន៦៥% នៃចំនួនប្រជាជនសរុប ហើយ ៨០% នៃអ្នកប្រើប្រាស់ទូរស័ព្ទដៃទំនើប មានអាយុក្រោម ៣៥ឆ្នាំ។ នេះបញ្ជាក់ឲ្យឃើញថា ស្ថិតិនៃប្រជាសាស្ត្រនេះ បានចូលរួមចំណែកដល់ប្រព័ន្ធអេកូ (ecosystem) សម្រាប់អ្នកដែលអាចទទួលយកបានដំបូង នូវបច្ចេកវិទ្យាហិរញ្ញាវត្ថុនេះ។
លោក សឺ វិនចាវ (Shi Wenchao) ប្រធានក្រុមហ៊ុន China UnionPay និងជាអនុប្រធាន ក្រុមហ៊ុន UnionPay International បានមានឲ្យដឹងថា “ជាមួយនឹងការផ្លាស់ប្តូរយ៉ាងឆាប់រហ័ស របស់ប្រទេសកម្ពុជា ទៅជាសង្គមមួយដែលធ្វើការទូទាត់ប្រាក់ ដោយពុំប្រើក្រដាស់ប្រាក់ ក្រុមហ៊ុន UnionPay បាននឹងកំពុងរួសរាន់បញ្ចេញ នូវសេវាកម្មទូទាត់ប្រាក់ តាមរយៈកូដ QR និងតាមរយៈអុីនធើណែត ដើម្បីជួយដល់សហគ្រាសខ្នាតតូចនិងមធ្យម អាចទទួលយកនូវការទូទាត់ប្រាក់ តាមប្រព័ន្ធឌីជីថល។ អ្នកលក់ដូរតាមអុីនធឺណែត រួមទាំងគេហទំព័រ ពាណិជ្ជកម្មអេឡិចត្រូនិក, កម្មវិធីធ្វើដំណើរ, កម្មវិធីទូរស័ព្ទចល័ត, ផ្សារទំនើប, ភោជនីយដ្ឋាន, ហាងកាហ្វេ និងហាងលក់ដូរ អាចទទួលយកការទូទាត់ ប្រាក់តាមរយៈ UnionPay QR Code និង UnionPay Online Payments បាន។”
ចំណែក លោក ខូវ ប៊ុនឆាយ (Khov Boun Chhay) ដែលជាប្រធាន និងជានាយកប្រតិបត្តិនៃធនាគារមេគង្គ បានលើកឡើងថា “ការចាប់ផ្ដើមដំណើរការ ជាលើកដំបូងនៅកម្ពុជា នៃប្រព័ន្ធទូទាត់ប្រាក់តាម UnionPay QR Code នឹងនាំមកនូវវិធីសាស្ត្រទូទាត់ប្រាក់ ជំនាន់ក្រោយគេបំផុត ទៅកាន់ឈ្មួញ និងអ្នករស់នៅក្នុងប្រទេសកម្ពុជា រួមទាំងជួយសម្រួលដល់សេវាកម្ម ទូទាត់ប្រាក់នៅកម្ពុជា ប្រកបដោយភាពច្នៃប្រឌិតផងដែរ។ ប្រទេសកម្ពុជាកំពុងបង្កើនល្បឿន នៅក្នុងការបង្កើតបរិយាកាស នៃការទូតទាត់ប្រាក់ តាមប្រព័ន្ធឌីជីថល។ ក្នុងនោះ គេជឿជាក់ថា ការបង់ប្រាក់តាមប្រព័ន្ធ QR Code នឹងផ្តល់ជូនអ្នកប្រើប្រាស់ នូវភាពងាយស្រួលក្នុងការទូទាត់ មិនត្រឹមតែឆាប់រហ័ស និងងាយស្រួលប៉ុណ្ណោះទេ ថែមទាំងមានសុវត្ថិភាពទៀតផង ហើយវាគឺជាកំលាំងចលករ ខណៈពេលដែលវានឹងពង្រីក ដល់ចំណែកផ្សេងទៀត នាពេលអនាគត។”
ជាមួយគ្នានេះដែរ លោក ប៉ែន ចាន់ដា នាយកប្រតិបត្តិ និងជាសហស្ថាបនិក របស់ក្រុមហ៊ុន Bongloy Payment ក៏បានឲ្យដឹងដែរថា “យើងរីករាយណាស់ ដែលបានធ្វើជាដៃគូ ជាមួយក្រុមហ៊ុន UnionPay នៅកម្ពុជា។ API របស់យើង គឺជាម៉ាស៊ីន ដែលផ្តល់នូវហេដ្ឋារចនាសម្ព័ន្ធ ទូទាត់ប្រាក់សម្រាប់អាជីវកម្ម ចាប់ពីអាជីវកម្មទើបបង្កើតថ្មី រហូតដល់ស្ថាប័នហិរញ្ញវត្ថុ ដែលអាចឱ្យពួកគេទទួលបានការទូទាត់ប្រាក់ តាមប្រព័ន្ធរបស់ក្រុមហ៊ុន UnionPay តាមរយៈកម្មវិធីទូរស័ព្ទ និងគេហទំព័ររបស់ពួកគេ។ តាមរយៈភាពជាដៃគូនេះ វានឹងជំរុញការផ្លាស់ប្តូរតាមរយៈ ការណែនាំផលិតផល ដែលផ្តល់ជូននូវការទូទាត់ប្រាក់ កាន់តែងាយស្រួលមួយកំរិតទៀត សម្រាប់អតិថិជនរបស់ក្រុមហ៊ុន UnionPay ។”
ក្នុងអំឡុងពេលធ្វើទស្សនកិច្ចនៅប្រទេសកម្ពុជាលោក សឺ វិនចាវ ក៏បានជួបសំដែងការគួរសម ជាមួយឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយបានធ្វើការផ្លាស់ប្តូរបទពិសោធន៏គ្នាទៅវិញទៅមក លើការអភិវឌ្ឍន៍ប្រទេស ជាមួយទំនើបភាវូបនីយកម្ម បច្ចេកវិទ្យាព័ត៌មាន ឌីជីថល និងការសាងសង់រដ្ឋាភិបាលវៃឆ្លាត។
នៅក្នុងដំណើរទស្សនកិច្ចនេះដែរ លោក ក៏បានជួបជាមួយលោកជំទាវ នាវ ច័ន្ទថាណា ទេសាភិបាលរង នៃធនាគារជាតិនៃកម្ពុជា ដើម្បីធ្វើបច្ចុប្បន្នភាពលើអាជីវកម្មរបស់ក្រុមហ៊ុន UnionPay និងវឌ្ឍនភាពថ្មីៗ ក្នុងការជួយប្រទេសជិតខាងកម្ពុជា ក្នុងការកសាងហេដ្ឋារចនាសម្ព័ន្ធហិរញ្ញវត្ថុ។
ភាគីទាំងពីរ ក៏បានស្វែងយល់ពីកិច្ចសហប្រតិបត្តិការ ដែលមានសក្តានុពលនៅលើប្រទេសកម្ពុជាផងដែរ (Shared Switch, CSS QR កូដសម្រាប់ការទូទាត់ និងការតភ្ជាប់នាពេលអនាគតជាមួយបណ្តាញទូទាត់អាស៊ី (APN) ជាពិសេសនៅពេលដែល UnionPay Chip ស្តង់ដារ ត្រូវបានអនុម័តសម្រាប់ APN ។
ក្រុមហ៊ុន UnionPay មានស្ថាប័នជាដៃគូប្រមាណជា ១៨០០ នៅទូទាំងពិភពលោក ដើម្បីអាចឲ្យឲ្យកាតទូទាត់ប្រាក់របស់ UnionPay អាចប្រើប្រាស់បាននៅក្នុង ១៧០ ប្រទេសនិងតំបន់។ កាតទូតទាត់ប្រាក់របស់ UnionPay ត្រូវបានចេញឲ្យប្រើប្រាស់ នៅក្នុង ៤៨ប្រទេស និងតំបន់។
UnionPay ផ្តល់ជូននូវសេវា ដែលមានគុណភាពខ្ពស់ តម្លៃសមរម្យ និងមានសុវត្ថិភាព ឆ្លងកាត់ព្រំដែនដល់ម្ចាស់ប័ណ្ណ ធំជាងគេបំផុតនៅលើពិភពលោក ដែលមានចំនួនជាង ៧ ពាន់លាននាក់ និងធានាបាននូវសេវាក្នុងស្រុក យ៉ាងងាយស្រួលបំផុត ដល់ម្ចាស់ប័ណ្ណ UnionPay CardPay និងម្ចាស់អាជីវកម្មផងដែរ។
គិតរហូតមកដល់ពេលបច្ចុប្បន្ននេះ ក្រុមហ៊ុន UnionPay បានសហការជាដៃគូ ជាង ១៦ ក្រុមហ៊ុននៅក្នុងប្រទេសកម្ពុជា ដើម្បីអាចទទួលយកការទូទាត់ប្រាក់តាមប័ណ្ណ UnionPay និងផ្តល់នូវផលិតផល និងសេវាកម្មបង់ប្រាក់ជាច្រើនទៀត។ អ្នកអាចចេញប័ណ្ណ UnionPay រួមមានធនាគារ អេស៊ីលីដា, ធនាគារ ABA, ធនាគារចិន (ហុងកុង) លីមីតធីតរាជធានីភ្នំពេញ, ធនាគារកម្ពុជាអាស៊ី, ធនាគារមេគង្គកម្ពុជា សាធារណៈលីមីតធីត, ធនាគារកាណាឌីយ៉ា និងធនាគារឧស្សាហកម្ម និងពាណិជ្ជកម្ម នៃប្រទេសចិន។ សម្រាប់ព័ត៌មានបន្ថែម សូមចូលមើលគេហទំព័រ www.facebook.com/UnionPayKH ៕ ដោយ ៖ កូឡាប
