ភ្នំពេញ ៖ អ្នកស្រី ក្វន សូហ្យន លេខាទី២ នៃស្ថានទូតកូរ៉េប្រចាំ នៅព្រះរាជាណាចក្រកម្ពុជា បានឲ្យដឹងថា ស្ថានទូតសាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជា បានប្រារព្ធកម្មវិធីប្រកួតកីឡាតេក្វាន់ដូ ពានរង្វាន់ឯកអគ្គរដ្ឋទូតសាធារណរដ្ឋកូរ៉េ ឆ្នាំ២០១៨ នៅក្នុងមជ្ឈមណ្ឌលតេក្វាន់ដូប៊ូយ៉ុង-ខ្មែរ ថ្ងៃពុធ ទី២៦ ខែកញ្ញា ឆ្នាំ២០១៨ ។
លោក អូ ណាក់យ៉ុង ឯកអគ្គរដ្ឋទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា និងលោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា (ប្រធានខេមរៈសហព័ន្ធកីឡាតេក្វាន់ដូ) បានចូលរួមជាអធិបតីភាព ក្នុងពិធីបិទកម្មវិធីប្រកួត ព្រមទាំងបានថ្លែងសុន្ទរកថាអបអរ និងចូលរួមក្នុងពិធីជូនរង្វាន់បេក្ខជនជ័យលាភី។ លោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងមេបញ្ជាការកងរាជអាវុធហត្ថរាជធានីភ្នំពេញ ព្រមទាំងភ្ញៀវកិត្តិយសជាច្រើនរូបបានផ្តល់កិត្តិយស ចូលរួមក្នុងកម្មវិធី ដើម្បីធ្វើការលើកទឹកចិត្តដល់កីឡាករតេក្វាន់ដូឆ្នើមៗទាំងឡាយ។
លោក អូ ណាក់យ៉ុង ឯកអគ្គរដ្ឋទូតសាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជា បានមានប្រសាសន៍ថា “តេក្វាន់ដូ គឺជាកីឡាជាតិរបស់កូរ៉េ ហើយកីឡានេះក៏ជានិមិត្តរូប នៃចំណងមិត្តភាពដ៏ល្អ រវាងកូរ៉េ និងកម្ពុជា ដែលប្រទេសទាំងពីរ ដែលបាននឹងកំពុងខិតខំប្រឹងប្រែង ធ្វើការអភិវឌ្ឍន៍ចំណងមិត្តភាព ជាមួយគ្នាជាបន្តបន្ទាប់ ក្នុងរយៈពេលកន្លងមក។ ស្ថានទូតកូរ៉េ នឹងបន្តជួយគាំទ្រ និងធ្វើជាដៃគូដ៏រឹងមាំ ក្នុងកិច្ចសហការជាមួយនឹងកម្ពុជា លើមាគាអភិវឌ្ឍន៍កីឡាតេក្វាន់ដូកម្ពុជានៅថ្ងៃអនាគត”។
សូមបញ្ជាក់ថា កីឡាជាតិ ជាកីឡា ឬជាសិល្បៈវប្បធម៌ ដែលមានលក្ខណៈពិសេស របស់ប្រទេសមួយ ឧទាហរណ៍ដូចជា កីឡាបោកចំបាប់កូរ៉េ កីឡាតេក្វាន់ដូ ជាដើម។
លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា “ខ្ញុំសូមថ្លែងអំណរគុណ ចំពោះប្រទេសកូរ៉េ ដែលតែងតែធ្វើការជួយគាំទ្រ ក្នុងការអភិវឌ្ឍន៍កីឡាតេក្វាន់ដូកម្ពុជា ហើយតាមរយៈការហាត់រៀន កីឡាតេក្វាន់ដូនេះ ជួយឲ្យយុវជនកម្ពុជា បង្កើននូវស្មារតីទទួលខុសត្រូវល្អ”។ លោករដ្ឋមន្ត្រី បានថ្លែងបន្តថា យើងសង្ឃឹមថា កម្មវិធីនេះនឹង ជួយផ្សព្វផ្សាយអំពីវិស័យកីឡាតេក្វាន់ដូ នៅក្នុងប្រទេសកម្ពុជា ឲ្យបានកាន់តែទូលំទូលាយ ដែលវានឹងក្លាយទៅជាការជម្រុញ ការផ្លាស់ប្តូរវប្បធម៌កីឡា រវាងប្រជាជន នៃប្រទេសទាំង២ ឲ្យកាន់តែរីកចម្រើនបន្ថែម៕ ដោយ ៖ បញ្ញាស័ក្តិ