កណ្ដាល៖ សមត្ថកិច្ចឃាត់ខ្លួនប្ដីចាក់ប្រពន្ធស្លាប់បាននៅព្រឹកថ្ងៃទី០១ ខែឧសភា ឆ្នាំ២០២៦។ករណីហិង្សាដ៏រន្ធត់មួយបានកើតឡើងនៅវេលាម៉ោង ២៣៖៣០ នាទី យប់ថ្ងៃទី៣០ ខែមេសា ឆ្នាំ២០២៦ នៅភូមិគោកអណ្តែត ឃុំស្អាងភ្នំ ស្រុកស្អាង ខេត្តកណ្ដាល បណ្ដាលឲ្យនារីម្នាក់បាត់បង់ជីវិត បន្ទាប់ពីត្រូវប្ដីប្រើកាំបិតចាក់។
ជនរងគ្រោះឈ្មោះ ផែន គន្ធា អាយុ ២៦ ឆ្នាំ មុខរបរជានារីបម្រើការនៅ KTV ត្រូវជាប្រពន្ធ បានរងរបួសធ្ងន់ធ្ងរ និងបានស្លាប់បន្ទាប់ពីបញ្ជូនទៅព្យាបាលនៅមន្ទីរពេទ្យ។ ចំណែកជនសង្ស័យឈ្មោះ សោម សិទ្ធ អាយុ ៣១ ឆ្នាំ ត្រូវជាប្ដី ត្រូវបានសមត្ថកិច្ចឃាត់ខ្លួនបាននៅព្រឹកថ្ងៃទី០១ ខែឧសភា ឆ្នាំ២០២៦។
តាមការបញ្ជាក់ពីសមត្ថកិច្ច ប្ដីប្រពន្ធនេះតែងមានជម្លោះជាញឹកញាប់ ដោយសារតែភាពប្រចណ្ឌ ពាក់ព័ន្ធនឹងការងាររបស់ភរិយា។ នៅយប់កើតហេតុ ជនសង្ស័យបានផឹកស្រាស្រវឹង ហើយបានឈ្លោះប្រកែកជាមួយជនរងគ្រោះនៅក្នុងផ្ទះ មុននឹងបន្តជម្លោះខាងក្រៅ។ ក្នុងអំឡុងពេលនោះ ជនសង្ស័យបានយកកាំបិតបកគល់ខ្ទឹមចាក់ជនរងគ្រោះចំនួនមួយកាំបិត ត្រូវចំឃ្លៀក បណ្ដាលឲ្យរបួសធ្ងន់ធ្ងរ និងបាក់ផ្លែកាំបិតនៅកន្លែងកើតហេតុ។
បន្ទាប់ពីកើតហេតុ ជនសង្ស័យបានដឹកជនរងគ្រោះទៅព្យាបាលនៅមន្ទីរពេទ្យបង្អែកស្រុកស្អាង មុននឹងបញ្ជូនបន្តទៅមន្ទីរពេទ្យរុស្ស៊ី ប៉ុន្តែដោយសាររបួសធ្ងន់ធ្ងរ ជនរងគ្រោះបានស្លាប់នៅទីនោះ។
សមត្ថកិច្ចបានចាប់យកវត្ថុតាងមួយគឺកូនកាំបិតដងឈើមានស្នាមឈាម និងបាក់ផ្លែ។ នៅចំពោះមុខនគរបាល ជនសង្ស័យបានសារភាពថា ខ្លួនពិតជាបានប្រើកាំបិតចាក់ប្រពន្ធដោយសារភាពប្រចណ្ឌ។
បច្ចុប្បន្ន ជនសង្ស័យត្រូវបានឃាត់ខ្លួនបណ្ដោះអាសន្ន នៅអធិការដ្ឋាននគរបាលស្រុកស្អាង ដើម្បីកសាងសំណុំរឿងបញ្ជូនទៅតុលាការតាមនីតិវិធីច្បាប់៕រក្សាសិទ្ធដោយ៖សុទ្ធលី
