តាម Daily Mail ហេតុការណ៍ដ៏កម្រមួយបានកើតឡើង នៅអាកាសយានដ្ឋានអន្តរជាតិ King Shaka ទីក្រុងសមុទ្រ Durban អាហ្វ្រិកខាងត្បូង ។
អ្នកចិញ្ចឹមឃ្មុំ ២រូប ត្រូវបានកោះហៅឲ្យមកយកឃ្មុំប្រមាណ ២០.០០០ក្បាលចេញពីទួរប៊ីនយន្តហោះ ។ ការងារនេះប្រព្រឹត្តទៅប្រមាណ ២០នាទី ហើយពួកគេពុំត្រូវបានអនុញ្ញាតឲ្យប្រើជណ្តើរ ស្ព្រាយបាញ់ ព្រោះអាចប៉ះពាល់ដល់ម៉ាស៊ីនយន្តហោះ ។
តាមរបាយការណ៍របស់ Mango Airlines នេះជាលើកទី១ហើយ ដែលយន្តហោះរបស់ក្រុមហ៊ុនអាកាសចរណ៍តម្លៃថោកនេះត្រូវផ្អាកដំណើរ ព្រោះតែ…ឃ្មុំ ។
Twitter របស់ក្រុមហ៊ុនសរសេរថា ៖ “អ្នកចិញ្ចឹមឃ្មុំ ២រូប ត្រូវបានកោះហៅឲ្យមកយកហ្វូងឃ្មុំ ដែលត្រៀមធ្វើសំបុកពីម៉ាស៊ីនយន្តហោះ ១ របស់យន្តហោះក្រុមហ៊ុននៅ Durban ។ ហេតុការណ៍នេះមានន័យថា យើងត្រូវផ្អាកកម្មវិធីហោះហើរ ៣ជើង ។ ពពួកឃ្មុំត្រូវបានជម្លៀសចេញយ៉ាងមានសុវត្ថិ” ។
តាម Mike Miles អ្នកនាំពាក្យរបស់អង្គការឧស្សាហកម្មឃ្មុំអាហ្វ្រិកខាងត្បូងនោះ ឃ្មុំវាច្រើនកាច់សម្បុក នៅក្នុងក្រហែងថ្ម ឬឈើ វាពិតជាកម្រ មកធ្វើសម្បុកលើ “យន្តហោះ” ណាស់! ។
តាមលោកពួកវា គ្រាន់តែសម្រាកបណ្តោះអាសន្ននៅក្នុងទួរប៊ីននេះ មុនពេលធ្វើដំណើរបន្តទៅទីកន្លែងផ្សេង ៕ ចន្ទ្រា