ភ្នំពេញ ៖ រដ្ឋបាលរាជធានីភ្នំពេញ នាថ្ងៃទី២៨ ខែកញ្ញា ឆ្នាំ២០១៨នេះ បានសេចក្ដីជូនដំណឹងពីការកែសម្រួលខ្សែរត់រថយន្តក្រុង ដែលមានស្រាប់ពីមុនចំនួន ៧ខ្សែនិងបន្ថែមខ្សែរត់ថ្មីដល់ទៅ៤ ខ្សែបន្ថែមទៀត ដើម្បីពង្រីកវិសាលភាពនៃការដឹកជញ្ជូន របស់រដ្ឋករស្វយ័តដឹកជញ្ជូនសាធារណៈរថយន្តក្រុង ក៏ដូចជា សម្រួលដល់ការធ្វើដំណើររបស់ប្រជាពលរដ្ឋក្នុងរាជធានីផងដែរ។
សេចក្ដីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា ការកែសម្រួលខ្សែរត់ចាស់ និងកែសម្រួលខ្សែរត់ខ្សែរត់ថ្មីនេះ នឹងចាប់ផ្ដើមអនុវត្តពីថ្ងៃទី១ ខែតុលា ឆ្នាំ២០១៨ ខាងមុខតទៅ។ ការពង្រីកវិសាលភាពនៃការបម្រើសេវាដឹកជញ្ជូនសាធារណៈរថយន្ត ជូនប្រជាពលរដ្ឋ ស្របពេលរថយន្តក្រុង ជាជំនួយរបស់រដ្ឋាភិបាលជប៉ុន នឹងមកដល់គ្រប់ចំនួន៨០គ្រឿង នៅចុងឆ្នាំ២០១៨៕ ដោយ៖កូឡាប
