ភ្នំពេញ ៖ រដ្ឋបាលរាជធានីភ្នំពេញសេចក្ដីជូនដំណឹង ស្ដីពី ការប្រារព្ធទិវាបេតិកភណ្ឌអឺរ៉ុបលើកទី៣ របស់ស្ថានទូតបារាំង ប្រចាំនៅព្រះរាជាណាចក្រកម្ពុជា។
បើតាមស្ថានទូតបារាំង ប្រចាំនៅព្រះរាជាណាចក្រកម្ពុជា បានឲ្យដឹងថា តើអ្នកដឹងទេ? ស្ថានទូតបារាំងប្រចាំកម្ពុជា ស្ថិតនៅលើទីតាំងដដែល អស់រយ:ពេលជាង៦០ឆ្នាំមកហើយ។ នៅពីក្រោយរបងសដ៏ខ្ពស់នេះ មានលាក់នូវបេតិកភណ្ឌដ៏សម្បូណ៍បែប ក្នុងនោះមានអគាររដ្ឋបាល និងនិវេសនដ្ឋានឯអគ្គរដ្ឋទូត ដែលត្រូវបានកសាងនៅឆ្នាំ១៩៥៨ និងជួសជុលឡើងវិញនៅឆ្នាំ១៩៩៣ ព្រមទាំងឧទ្យានទំហំ៤គុណនឹង៥ហិកតា ដែលជាលំហបៃតងធំជាងគេនៅភ្នំពេញ។ ក្រៅពីដើមឈើធំៗមានម្លប់ត្រឈឹងត្រឈៃ និងផ្កាចម្រុះពណ៌ នៅក្នុងឧទ្យានដ៏ស្រស់ស្អាតនេះ មានរក្សាទុកទ្វាររបងម្ខាង ដែលធ្លាប់នៅពីមុខស្ថានទូត នៅថ្ងៃទី១៧ ខែមេសា ឆ្នាំ១៩៧៥។ សូមអញ្ជើញមកទស្សនា ឬទស្សនាស្ថានទូតម្តងទៀតដោយសេរី នៅថ្ងៃសៅរ៍ ទី៣០ ខែកញ្ញាខាងមុខ ក្នុងឱកាស ទិវាបេតិកភណ្ឌ២០១៧ ។
រដ្ឋបាលរាជធានីភ្នំពេញ បានបញ្ជាក់ថា ក្នុងឱកាសប្រារព្ធទិវាបេតិកភណ្ឌអឺរ៉ុប សាធារណជនអាចចូលទស្សនាអគារបុរាណដ៏មានតម្លៃ ដែលអាចចាត់ទុកជាអគារបេតិកភណ្ឌក៏នឹងត្រូវបើកទ្វារជូនសាធារណជន ចូលទស្សនាដោយសេរីផងដែរ ដូចជា អគាររដ្ឋបាលសាលារាជធានីភ្នំពេញ និវេសនដ្ឋានរបស់ឯកអគ្គរាជទូតអង់គ្លេស ការិយាល័យអង្គការយូណេស្កូ អគារដែលប្រមូលផ្តុំនូវទីភ្នាក់ងារអភិវឌ្ឍន៍បារាំង ក្រុមហ៊ុន Asia ភោជនីយដ្ឋាន Van’s សាលាបារាំងដេស៍កាត សកលវិទ្យាល័យភូមិន្ទវិចិត្រសិល្បៈ សណ្ឋាគារ Le Royal និងអគារអភិរក្សអង្គរនៅខេត្តសៀមរាប។ ហើយបែបបទនិងម៉ោងពេលទស្សនា ត្រូវបានកំណត់ដោយស្ថាប័នសាមីនីមួយៗដែលលោកអាចចូលមើលតាមរយៈគេហទំព័រហ្វេសប៊ុក របស់ស្ថានទូតបារាំង៕ ដោយ ៖ កូឡាប
