បន្ទាយមានជ័យ ៖ ឃាត់ខ្លួនជនសង្ស័យ ចំនួន ៣នាក់ ពាក់ព័ន្ធគ្រឿងញៀន។ ដោយយោងលើចម្លើយសារភាព ជនសង្ស័យខាងលើ ត្រូវចោទពីបទ រក្សាទុក និងប្រើប្រាស់ដោយខុសច្បាប់នូវសារធាតុញៀន ហើយនៅថ្ងៃទី២៩ខែកញ្ញា កម្លាំងជំនាញបានកសាងសំណុំបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីចាត់ការទៅតាមនីតិវិធី ។
សូមបញ្ជាក់ថា ថ្ងៃទី២៧ ខែកញ្ញា ឆ្នាំ២០១៨ វេលាម៉ោង ១ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្ក្រាបករណី រក្សាទុក និងប្រើប្រាស់សារធាតុញៀនដោយខុសច្បាប់ ព្រមទាំងឃាត់ខ្លួនជនសង្ស័យបានចំនួន ៣នាក់ នៅចំណុចផ្លូវកែវអេផ្លាស់ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ត្រី នួន នីណារ៉ូ បានអោយដឹងថា ៖ នៅថ្ងៃកើតហេតុ លោកបានដឹកនាំកម្លាំងមូលដ្ឋានកងរាជអាវុធហត្ថក្រុងចំនួន ២២នាក់ ប្រើប្រាស់រថយន្ត ស៊ែរ៉ែន ៤គ្រឿង ម៉ូតូ ២គ្រឿង ចុះល្បាតការពារសន្តិសុខ សណ្តាប់ សុវត្ថិភាពជូនប្រជាពលរដ្ឋក្នុងភូមិសាស្ត្រក្រុង លុះដល់វេលាម៉ោង ១ នៅចំណុចផ្លូវកែងអេផ្លាស់ មានជនសង្ស័យចំនួន ៣នាក់ ហាក់មានឥរិយាបទប្លែកៗពេលបានឃើញកម្លាំងយើងដែលកំពុងល្បាត ដោយមានការសង្ស័យក៏ហៅមកសួរនាំ និងធ្វើការឆែកឆេរក៏ឃើញមានសារធាតុញៀននៅនឹងខ្លួនជនសង្ស័យទាំង ៣នាក់តែម្តង ១-ឈ្មោះ ថា សុវណ្ណា ភេទ ប្រុស អាយុ ២៧ឆ្នាំ ជនជាតិខ្មែរ មុខរបរ កម្មករ បច្ចុប្បន្នរស់នៅភូមិសាមគី្គមានជ័យ សង្កាត់ប៉ោយប៉ែត ក្រុងប៉ោយប៉ែត ឆែកឆេរឃើញមានសារធាតុញៀនមេតំហ្វេតាមីនទឹកកក ចំនួន ១កូនថង់ ស្មើ ០,៥៣ក្រាម ២-ឈ្មោះ មាស ដែត ភេទ ប្រុស អាយុ ៣៥ឆ្នាំ ជនជាតិខ្មែរ មុខរបរ មិនពិតប្រាកដ បច្ចុប្បន្នរស់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ឆែកឆេរឃើញមានសារធាតុញៀនមេតំហ្វេតាមីនទឹកកក ចំនួន ១កូនថង់ ស្មើ ០,៨៣ក្រាម និងគ្រឿងញៀនមេតំហ្វេតាមីនគ្រាប់ ចំនួន ៥គ្រាប់ ៣-ឈ្មោះ នួន សុផន ភេទ ប្រុស អាយុ ២១ឆ្នាំ ជនជាតិខ្មែរ មុខរបរ គ្មាន បច្ចុប្បន្នរស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ឆែកឆេរឃើញមានសារធាតុញៀនមេតំហ្វេតាមីនទឹកកក ចំនួន ១កូនថង់ ស្មើ ១,០៣ក្រាម ។ បន្ទាប់មកលោកបានបញ្ជាអោយកម្លាំងឃាត់ខ្លួនជនសង្ស័យទាំង ៣នាក់ខាងលើ យកមកទីបញ្ជាការមូលដ្ឋានកងរាជអាវុធហត្ថក្រុង ដើម្បីចាត់ការតាមនីតិវិធី ។ ក្រោយពីសួរនាំជនសង្ស័យ និងទទួលបានចម្លើយសារភាពរបស់ជនសង្ស័យរួចមក លោកបានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅទីបញ្ជាការកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។
ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត ទទួលការងារប្រយុទ្ធប្រឆាំងគ្រឿងញៀន បានចាត់តាំងមន្ត្រីជំនាញ ដើម្បីចាត់ការបន្តតាមនីតិវិធី ។
លោកវរសេនីយ៍ឯក ស ប៊ុនសឿង បានបញ្ជាក់ថា ៖ ក្រោយពីធ្វើការសាកសួរ ជនសង្ស័យបានសារភាពថា ៖ មុននេះបន្តិច ពួកខ្លួនបានទិញគ្រឿងញៀន ពីជនជាតិថៃម្នាក់ដើម្បីយកមកទុកប្រើប្រាស់ តែមិនទាន់បានប្រើប្រាស់ក៏ជួបកម្លាំងសមត្ថកិច្ចតែម្តង ។ ដោយយោងលើចម្លើយសារភាព ជនសង្ស័យខាងលើអាចត្រូវចោទពីបទ រក្សាទុក និងប្រើប្រាស់ដោយខុសច្បាប់នូវសារធាតុញៀន បច្ចុប្បន្នកម្លាំងជំនាញបានកសាងសំណុំបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីចាត់ការទៅតាមនីតិវិធី ៕ ដោយ៖បញ្ញាស័ក្តិ
