ភ្នំពេញ៖អង្គការអន្តរជាតិខាងការងារ (ILO) បានប្រកាសផ្សព្វផ្សាយរបាយការណ៍ស្នូលស្តីពីកិច្ចគាំពារសង្គមក្នុងពិភពលោក ២០១៧/១៩នៅថ្ងៃទី២៩ខែវិច្ឆិកា។ របាយការណ៍នេះចងក្រងបញ្ជីសារពើភ័ណ្ឌគម្រោង កិច្ចគាំពារសង្គមទូទាំងសកលលោក ដែលគ្របដណ្តប់លើការផ្តល់តាវកលិកសម្រាប់មាតុភាព ភាពអត់ការងារធ្វើ ជរាភាព ការថែទាំងសុខភាព ។ របាយការណ៍នេះបង្ហាញថា បើទោះបីជាមានការពង្រឹងវិសាលភាព កិច្ចគាំពារសង្គមគួរឲ្យកត់សម្គាល់យ៉ាងណាក៏ដោយ មានប្រជាជនក្នុងពិភពលោកត្រឹមតែ២៩ភាគរយ ប៉ុណ្ណោះ ដែលទទួលបានកិច្ចគាំពារសង្គមពេញលេញ។ នេះធ្វើឲ្យប្រជាជនក្នុងពិភពលោករួមទាំងពលរដ្ឋកម្ពុជា ជាច្រើននាក់ ត្រូវរងគ្រោះដោយសារភាពក្រីក្រ វិសមភាព និងការផាត់ចេញពីសង្គម ដែលជាឧបសគ្គដ៏ធំមួយរារាំងដល់ការអភិវឌ្ឍសេដ្ឋកិច្ចនិងសង្គម។
របាយការណ៍របស់អាយឡូ នេះគត់សម្គាល់ថា ដោយសារតែការប្រើប្រាស់គំរូនៃការអភិវឌ្ឍ ដែលផ្តល់អាទិភាពលើកំណើនសេដ្ឋកិច្ច ជាជាងគោលនយោបាយបែងចែកភាគផលដែលបានពីកំណើនសេដ្ឋកិច្ច កន្លងមក ប្រទេសកម្ពុជាមានលទ្ធភាពសារពើពន្ធទាប សម្រាប់រ៉ាប់រងលើចំណាយសង្គម ដែលជាហេតុនាំឲ្យវិសាលភាពនៃកិច្ចគាំពារសង្គមនេះនៅមានកម្រិតនៅឡើយ។ ប៉ុន្តែកាលពីថ្មីៗនេះ កិច្ចគាំពារសង្គមត្រូវបានបញ្ចូលទៅក្នុងរបៀបវារៈនាំការអភិវឌ្ឍនៅថ្នាក់តំបន់ និងថ្នាក់ជាតិ កាន់តែច្រើនឡើងៗ ។ ក្នុងពិធីប្រកាសផ្សព្វផ្សាយដាក់ឲ្យអនុវត្តក្របខ័ណ្ឌគោលនយោបាយជាតិគាំពារសង្គម កាលពីថ្ងៃទី២៤ខែកក្កដា សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានមានប្រសាសន៍ថា ការរៀបចំប្រព័ន្ធគាំពារសង្គម គឺជាការចាំបាច់បំផុត ដើម្បីធានានូវកំណើនសេដ្ឋកិច្ចប្រកបដោយបរិយាប័ន្ននិងសមធម៌។
គោលនយោបាយថ្មីដែលរាជរដ្ឋាភិបាលដាក់ចេញនេះ បានកំណត់នូវគោលដៅប្រកបដោយមហិច្ឆតា ដូចជា ការផ្តល់អត្ថប្រយោជន៍ជាសាច់ប្រាក់សម្រាប់ស្ត្រីមានផ្ទៃពោះ កុមារ ជនពិការ និងចាស់ជរា ជាដើម។ ដើម្បីសម្រេចតាមគោលដៅទាំងនេះ រដ្ឋាភិបាលត្រូវពង្រីកលំហរ ឬលទ្ធភាពសារពើពន្ធរបស់ខ្លួន សម្រាប់ផ្តល់ជំនួយសង្គម។ បច្ចុប្បន្ន ប្រទេសកម្ពុជាចំណាយថវិកាជាង១ភាគរយ នៃផលិតផលក្នុងស្រុកសរុប (ផសស) លើកិច្ចគាំពារសង្គម បើធៀបនឹងតួលេខមធ្យមជិត១០ភាគរយ ក្នុងតំបន់អាស៊ីប៉ាស៊ីហ្វិច។
ទោះជាយ៉ាងក៏ដោយ ក្នុងឆ្នាំកន្លងទៅនេះ កិច្ចគាំពារសង្គមនៅកម្ពុជាមានការអភិវឌ្ឍ ដែលនាំមកនូវក្តីសង្ឃឹមខ្ពស់ ជាពិសេសចាប់តាំងពីពេលដែលបេឡាជាតិសន្តិសុខសង្គម បង្កើតឡើងកាលពីមួយទសវត្សរ៍មុន។ ខណៈពេលដែលរបបធានារ៉ាប់រងហានិភ័យ ការងាររបស់ បសស នៅតែជាកម្មវិធីដែលតម្រូវឲ្យមនាការបង់ភាគទានតាមច្បាប់តែមួយគត់ នៅទូទាងប្រទេស កាលពីពេលថ្មីៗនេះ បសស បានដាក់ឲ្យអនុវត្តនូវរបបថែទាំសុខភាព មួយទៀត ដែលកំពុងពង្រីកវិសាលភាពយ៉ាងឆាប់រហ័ស ។ ក្នុងឆ្នាំកន្លងទៅ មានកម្មករនិយោជិតមួយលាននាក់ បានទទួលសុខភាព តាមរយៈរបបថែទាំងសុខភាព នេះ។ មន្ត្រីរាជការ នឹងទទួលបានអត្ថប្រយោជន៍ស្រដៀងគ្នានេះ ចាប់ពីដើមឆ្នាំ២០១៨តទៅ។ ការអភិវឌ្ឍដ៏សំខាន់ និងផ្តល់នូវក្តីសង្ឃឹមមួយទៀត គឺរដ្ឋាភិបាលក៏គ្រោងនឹងពង្រីកមូលនិធិសមធម៌សុខាភិបាល ដែលផ្តល់សេវាដោយមិនគិតថ្លៃដល់អ្នកពុំមានលទ្ធភាពបង់ភាគទានបាន។
លើសពីនេះ ជាជាងកំហិត តែសហគ្រាសធំៗដូចកន្លងទៅគិតត្រឹមថ្ងៃទី២៤ខែតុលា គ្រប់សហគ្រាស ទាំងអស់ដែលមាននិយោជិតចាប់ពីមួយនាក់ឡើងទៅ ត្រូវបានកំណត់ដោយច្បាប់ថាត្រូវចុះបញ្ជីជាមួយនឹង បសស។ នេះជាវិធានការ ដែលសមនឹងទទួលបានការកោតសរសើរ ព្រោះថានឹងពង្រីកលទ្ធភាពទទួលបានសេវាតាមផ្លូវច្បាប់ដល់កម្មករនិយោជិត ជិត៣លាននាក់បន្ថែមទៀត ដែលភាគច្រើនធ្វើការងារក្នុងសហគ្រាសខ្នាតតូចនិងមធ្យម។
បើទោះបីជាមានការរីកចម្រើនជាវិជ្ជាមានទាំងនេះក៏ដោយ មានកម្មករនិយោជិតកម្ពុជាជាង៥០ភាគរយ ដែលបន្តធ្វើការងារក្នុងវិស័យក្រៅប្រព័ន្ធ និងពុំបានទទួលការធានារ៉ាប់រង ។ សម្រាប់ពួកគេ អត្ថប្រយោជន៍ដែលទទួលបានការឧបត្ថម្ភពីប្រាក់ពន្ធ អាចមានតួនាទីសំខាន់ ក្នុងការពង្រីកការការពារ។ បទពិសោធន៍ដែលរដ្ឋាភិបាលមាននាពេលបច្ចុប្បន្ន ជាមួយនឹងអត្ថប្រយោជន៍ដែលមានភាពស្មុគស្មាញ និងការមានកំណត់ក្រុមគោលដៅបែបតឹងរ៉ឹង ផ្អែកទៅតាមរង្វាស់ភាពក្រីក្រ ដោយប្រើប្រាស់ប្រាក់ចំណូលជាគោល។ Graeme Buckly នាយកអង្គការអន្តរជាតិខាងការងារ ប្រចាំប្រទេសថៃ កម្ពុជា និងឡាវ បានធ្វើការកត់សម្គាល់ថា ប្រសិនបើកម្ពុជាអាចអនុវត្តតាមគំរូរបស់ប្រទេស ផ្សេងទៀត ក្នុងតំបន់នេះ ដូចជា ថៃ ចិន និងទីម័រខាងកើត ពេលនេះ ប្រាប់ឧបត្ថម្ភគោលនយោបាយសង្គមនេះ អាចផ្តល់ការការពារដល់ចាស់ជរាជាង១លាននាក់ ដែលបច្ចុប្បន្ននេះ ពុំបានទទួលការការពារអ្វីទាំងអស់៕ ដោយ៖កូឡាប
