ក្រុងតាខ្មៅ៖ ស្នងការដ្ឋាននគរបាលខេត្តកណ្តាល បានឲ្យដឹងថា មានករណីគ្រោះថ្នាក់ចរាច ររវាងរថយន្តនិងម៉ូតូ បណ្តាលឲ្យរងរបួសធ្ងន់ស្រីចំនួន២នាក់ ដែលកើតហេតុនៅថ្ងៃសៅរ៍ ទី២៩ ខែកញ្ញា ឆ្នាំ២០១៨ វេលាម៉ោង ៩និង៤០ នាទី នៅត្រង់ចំណុចកែងហាងលក់ខោអាវ យីហោ ម៉ាយ ស្ក័រលើផ្លូវលេខ២១០ កែងផ្លូវលេខ១០៨ ភូមិតាខ្មៅ សង្កាត់តាខ្មៅ ក្រុងតាខ្មៅ។
គ្រោះថ្នាក់នេះរវាងរថយន្តមួយគ្រឿងម៉ាកTOYOTACAMRY (បាឡែន) ពាក់ស្លាកលេខកណ្តាល 2A.8392 អ្នកបើកបររថយន្តមិនស្គាល់អត្តសញ្ញាណ (រត់បាត់) បើកបរក្នុងទិសដៅពីកើតទៅលិចក៏បានបុកជាមួយម៉ូតូមួយគ្រឿង ម៉ាក HONDA TODAY ពណ៌ក្រហមពាក់ស្លាកលេខ កណ្តាល 1V:8788 (មិនពាក់មួកសុវត្ថិភាពនិងមានកញ្ចក់) បើកបរក្នុងទិសដៅពីត្បូងមកជើង។ អ្នកបើកបរម៉ូតូឈ្មោះ ភា ស្រីនៀត ភេទស្រី អាយុ ១៥ ឆ្នាំ នៅភូមិក្រពើហាសង្កាត់ព្រែកឫស្សី ក្រុងតាខ្មៅ រងរបួសធ្ងន់ ត្រូវបានរថយន្តសង្គ្រោះ របស់ស្នងការដ្ឋាននគរបាលខេត្តកណ្តាល ដឹកបញ្ជូនទៅមន្ទីរពេទ្យបង្អែកជ័យជំនះ ដើម្បីសង្គ្រោះ និងមានអ្នករួមដំណើរជាមួយម្នាក់ ឈ្មោះ ហាក់ សុវណ្ណា ភេទស្រី អាយុ ១៤ ឆ្នាំ នៅភូមិតាខ្មៅ សង្កាត់តាខ្មៅ ក្រុងតាខ្មៅ រងរបួសធ្ងន់ ត្រូវបានរថយន្តសង្គ្រោះ របស់ស្នងការដ្ឋាននគរបាលខេត្តកណ្តាល ដឹកបញ្ជូនទៅមន្ទីរពេទ្យបង្អែកជ័យជំនះ ដើម្បីសង្គ្រោះ។ ករណីនេះ បណ្តាលឲ្យខូចខាតរថយន្តធ្ងន់ចំនួន១គ្រឿង និងម៉ូតូធ្ងន់ចំនួន១គ្រឿង។ នគរបាលក្រុងតាខ្មៅ បានបញ្ជាក់មូលហេតុថា មកពីអ្នកបើកបររថយន្ត បើកបរក្នុងល្បឿនលឿន ចំណែកអ្នកបើកបរម៉ូតូ បើកខ្វះការប្រុងប្រយ័ត្ន ទើបបង្កឲ្យការហេតុការណ៍គ្រោះថ្នាក់ចរាចរកើតឡើង ហើយអ្នកបើករថយន្ត បានរត់គេចបាត់៕ ដោយ៖កូឡាប