ខេត្តព្រះសីហនុ ៖ រដ្ឋបាលខេត្តព្រះសីហនុ កាលពីព្រឹកថ្ងៃសៅរ៍ ទី២៩ ខែកញ្ញា ឆ្នាំ២០១៨នេះ នាសាលប្រជុំសាលាខេត្តព្រះសីហនុបានរៀបចំពិធីសំណេះសំណាល និងផ្តល់រង្វាន់លេីកទឹកចិត្តដល់ បេក្ខជនដែលទទួលបានលទ្ធផលប្រឡងបាននិទេ្ទស A – B និងបេក្ខជននិទេ្ទសល្អ ដែលប្រឡងសញ្ញាបត្រ័មធ្យមសិក្សាទុតិតភូមិ ឬសញ្ញាប័ត្របាក់ឌុប នាសម័យប្រឡង ថ្ងៃទី ២០ ខែសីហាឆ្នាំ២០១៨។
ពិធីនេះ ក្រោមអធិបតីភាព ឯកឧត្ត ជាម ហីុម ប្រធានក្រុមប្រឹក្សាខេត្តព្រះសីហនុ ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ ឯកឧត្តម តាក់ វណ្ណថា អ្នកតំណាងរាស្ត្រខេត្ត ឯកឧត្តម នេន ម៉ាឡៃ អ្នកតំណាងរាស្ត្រខេត្តព្រះសីហនុ ប្រធាន-អនុប្រធានមន្ទីរ អង្គភាពក្នុងខេត្ត លោកគ្រូ អ្នកគ្រូ សិស្ស និទ្ទេស A – B និងសិស្សានុសិស្ស ដែលទទួលបាននិទ្ទេសល្អ មាតាបិតា អាណាព្យាបាលសិស្សយ៉ាងច្រើនកុះករ។
នាឱកាសនោះ លោក កែវ ឡាយ ប្រធានមន្ទីរ អប់រំយុវជន និងកីឡា ខេត្តព្រះសីហនុ បានឲ្យដឹងថា សម្រាប់ឆ្នាំសិក្សា២០១៧-២០១៨នេះ សិស្សដែលបានប្រឡងជាប់និទ្ទេស A មានចំនួន៣នាក់ និទ្ទេស B ចំនួន៣៩នាក់។ លោកបន្តថា អត្រាសិស្សប្រឡងជាប់ឆ្នាំនេះ បានកើនចំនួន៧៣%។ ចំណែកឆ្នាំ២០១៧ កន្លងទៅមាននិទ្ទេសA ចំនួន៩នាក់ មានអត្រាឡងជាប់ចំនួនជាង៦០%។
នាពិធីជួបជុំនោះដែរ ឯកឧត្តម យន្ត មីន ខេត្តព្រះសីហនុ មានប្រសាសន៍ថា ការកសាងធនធានមនុស្ស គឺជាកត្តាចាំបាច់សម្រាប់អភិវឌ្ឍ ប្រទេសជាតិ នៅថ្ងៃអនាគត។
ឆ្លើយតចំពោះគោលដៅនេះ ការខិតខំបង្កើនសមត្ថភាព គឺជាចំណុចមិនអាចខ្វះបាន ដែលទាំងអស់ត្រូវរួមគ្នាគិតគូរដោះស្រាយ ដើម្បីអោយយុវជនកម្ពុជាក្លាយ ទៅជាទំពាំងស្នងឬស្សី ពិតប្រាកដ របស់ប្រទេសជាតិនិងជាអ្នកដឹកនាំបន្តវេន ដ៏មានគុណភាព សក្តានុពលសម្រាប់សង្គមជាតិ។
ឯកឧត្តម អភិបាលខេត្តឲ្យដឹងដូច្នេះ រួចបានរំលឹកដល់យុវជនថា ទន្ទឹមនឹងមានចំណេះដឹង គឺគុណធម៌ត្រូវឲ្យមានជាប់ខ្លួនដោយមិនអាចខ្វះបាននោះទេ។
ផ្តើមពីបញ្ហានេះ ឯកឧត្តម យន្ត មីន បានអំពាវនាវដល់យុវជនទាំងអស់ត្រូវសន្សំអោយបាន នូវចំណេះដឹង ជំនាញ និងសីលធម៌ក្នុងការរស់នៅ។
មន្ត្រីរដ្ឋបាលខេត្តព្រះសីហនុ បានឲ្យដឹងថា ឆ្នាំ២០១៨នេះ សម្រាប់សិស្ស ដែលប្រឡជាប់និទ្ទេសA ចំនួន៣នាក់ បានទទួលការលើកទឹកចិត្តម៉ូតូម្នាក់មួយគ្រឿង និងថវិកាមួយចំនួន។
ចំណែកសិស្សនិទ្ទេស B ទទួលបានការលើកទឹកចិត្តជាថវិកាម្នាក់ៗ ១០០ដុល្លារសហរដ្ឋអាមេរិក និងបណ្ណ័សរសើរមួយសន្លឹក។
ព្រមជាមួយគ្នានេះ ក្រុមសិស្សានុសិស្ស នៅខេត្តព្រះសីហនុ ដែលប្រឡងជាប់និទ្ទេសល្អ ក្នុងឆ្នាំសិក្សា២០១៨នេះ បានឡើងថ្លែងអំណរគុណដល់ថ្នាក់ដឹកនាំរដ្ឋបាលខេត្តព្រះសីហនុ ដែលតែងយកចិត្តទុកដាក់ឧប្ថម្ភគាំដល់សិស្សានិសិស្សនៅតាមសាលានានា នៅខេត្តព្រះសីហនុជាបន្តបន្ទាប់មកនេះ៕ ដោយ៖ ដែន សីមា
