កំពង់ឆ្នាំង ៖ លោក ឈួរ ច័ន្ទឌឿន មានប្រសាសន៍ថា នៅក្នុងរយៈពេលដ៍ខ្លីខាងមុខនេះ ពលរដ្ឋដែលរស់នៅផ្ទះបណ្តែតទឹកនៅតាម ដងទន្លេក្នុងភូមិសាស្ត្ររបស់ខេត្តកំពង់ឆ្នាំង និងត្រូវបម្លាស់ទីមកនៅលើគោកវិញ។ អភិបាលខេត្តកំពង់ឆ្នាំង បានថ្លែងបែបនេះ ក្នុងឱកាសអញ្ជើញក្នុងពិធី សែនក្រុងពាលីសុំសេចក្តីសុខលើគម្រោង ធ្វើការបម្លាស់ទីផ្ទះបណ្តែតទឹក នៅថ្ងៃទី២៧ ខែកញ្ញា ឆ្នាំ២០១៨ ។ លោក ឈួរ ច័ន្ទឌឿន អភិបាលខេត្តកំពង់ឆ្នាំង បានអញ្ជើញក្នុងពិធីសែនក្រុងពាលីសុំសេចក្តីសុខសប្បាយ ដែលអាជ្ញាធរខេត្តត្រៀមរៀបចំគម្រោងធ្វើការបម្លាស់ទីផ្ទះបណ្តែតទឹក ឡើងមកនៅលើដីគោកវិញក្នុងពេលឆាប់ៗនេះ ដើម្បីធានាបាននូវបរិស្ថាន និងសោភ័ណភាពនៅតាមដងទន្លេនៃភូមិសាស្ត្រខេត្តកំពង់ឆ្នាំង។
នាឱកាសនោះ លោក ឈួរ ច័ន្ទឌឿន មានប្រសាសន៍ថា នៅក្នុងរយៈពេលដ៍ខ្លីខាងមុខនេះ ពលរដ្ឋដែលរស់នៅផ្ទះបណ្តែតទឹកនៅតាម ដងទន្លេក្នុងភូមិសាស្ត្ររបស់ខេត្តកំពង់ឆ្នាំង និងត្រូវបំលាស់ទីមកនៅលើគោកវិញ ទៅតាមទីតាំងដែលអាជ្ញាធរបានកំណត់ ដូច្នេះក្នុងពេលដែលទឹកបានឡើងនេះ គឺពលរដ្ឋដែលរស់នៅលើផ្ទះបណ្តែតទឹកត្រូវបានអាជ្ញាធរធ្វើការផ្សព្វផ្សាយរួចហើយ អោយគាត់ត្រៀមលក្ខណៈធ្វើការបំលាស់ទីជាបណ្តើរៗ ទៅរកទីតាំងដែលអាជ្ញាធរបានកំណត់។
សូមបញ្ជាក់ថា កាលពីពេលថ្មីៗនេះ ប្រជាជនវៀតណាមជាច្រើនពាន់នាក់ នៅខេត្តកំពង់ឆ្នាំង បានលើកគ្នាមកបង់ពន្ធអាករ ដើម្បីធ្វើប័ណ្ណស្នាក់នៅអចិន្ត្រៃយ៍ បន្តដែលមានចំនួន២៥ម៉ឺនរៀល រយះពេល២ឆ្នាំ នៅស្នងការនគបាលខេត្តកំពង់ឆ្នាំង។
លោកប៉ាន់ ឡៃឃាង ប្រធានការិយាល័យគ្រប់គ្រង ការស្នាក់នៅនៃស្នងការដ្ឋាននគរបាល ខេត្តកំពង់ឆ្នាំង បញ្ជាក់ឲ្យដឹងថា ៖ ជនជាតិវៀតណាម ប្រចាំខែកុម្ភៈ ឆ្នាំ២០១៧ របស់ការិយាល័យគ្រប់គ្រងការស្នាក់នៅ នៃស្នងការដ្ឋាននគរបាលខេត្តកំពង់ឆ្នាំង បង្ហាញថា នៅទូទាំងខេត្ត មានជនជាតិវៀតណាម ចំនួន ២.០៣៤គ្រួសារ ហើយទីតាំងដែលជនជាតិវៀតណាម និយមរស់នៅច្រើនជាងគេ គឺលើផ្ទៃទឹកក្នុងក្រុងកំពង់ឆ្នាំង មាន ៧៥៥គ្រួសារ ស្រុកបរិបូរណ៍ ៨០៦គ្រួសារ និងស្រុកកំពង់ត្រឡាច ២០២គ្រួសារ។
សូមបញ្ជាក់ថា កន្លងមកអាជ្ញាធរខេត្តកំពង់ឆ្នាំង មានវិធានការបម្លាស់ទីអ្នកភូមិបណ្ដែតទឹករាប់ពាន់គ្រួសារឲ្យឡើងរស់នៅលើគោកនៅពេលនេះ ដើម្បីបញ្ចៀសការបញ្ហាបំពុលទឹក និងប៉ះពាល់ធនធានមច្ឆាជាតិ។ ជនអន្តោប្រវេសន៍វៀតណាម ដែលស្នាក់នៅលើផ្ទៃបឹងទន្លេសាប ក្នុងខេត្តកំពង់ឆ្នាំង មួយចំនួនមាន ការអល់អែកមិនចង់ឡើងរស់នៅ លើគោកតាមការអំពាវនាវរបស់អាជ្ញាធរខេត្ត។
លោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង ឱ្យដឹងថា កាលពីថ្ងៃទី២៤ ខែកញ្ញា អាជ្ញាធរខេត្ត បានផ្សព្វផ្សាយសេចក្តីជូនដំណឹងពីផែនការខាងលើនេះ ដល់ប្រជាពលរដ្ឋ ដែលកំពុងរស់នៅលើផ្ទះបណ្តែតទឹកក្នុងទន្លេ ដើម្បីចូលរួមអនុវត្តផែនការ៥ឆ្នាំរបស់ខេត្តឱ្យទទួលបានជោគជ័យ។ ផែនការនេះ គឺត្រូវអនុវត្ត ពីឆ្នាំ២០១៥ ដល់ ២០១៩។ នៅក្នុងផែនការនេះ អាជ្ញាធរខេត្ត បានបង្កើតគណៈកម្មការ ៦ក្រុម គឺក្រុមទី១ ដឹកនាំដោយលោកផ្ទាល់ ធ្វើបម្លាស់ទីផ្ទះបណ្តែតទឹក នៅក្នុងក្រុងកំពង់ឆ្នាំង ឱ្យឡើងមករស់នៅលើគោកវិញ ឱ្យអស់នៅចុងឆ្នាំ២០១៨នេះ។ ផ្ទះបណ្ដែតទឹករបស់ជនជាតិវៀតណាមចំនួន ៩៩៦គ្រួសារ ដែលត្រូវបម្លាស់ទីឱ្យឡើងមករស់នៅលើគោក លើដីទំហំជាង ៤០ហិកតា ក្នុងឃុំស្វាយជ្រុំ ស្រុករលាប្អៀរ។ អាជ្ញាធរខេត្ត បានធ្វើគម្រោង សុំអនុប្រយោគពីរាជរដ្ឋាភិបាលសុំកាត់ដីនេះ ចេញពីតំបន់ដីលិចទឹក។
នៅថ្ងៃទី១ ខែតុលា ឆ្នាំ២០១៨ ខាងមុខនេះ អាជ្ញាធរខេត្តកំពង់ឆ្នាំង នឹងចាប់ផ្តើមបម្លាស់ទីផ្ទះបណ្តែតទឹករបស់ជនជាតិវៀតណាម ជិត១ពាន់គ្រួសារ នៅក្នុងក្រុងកំពង់ឆ្នាំង ឲ្យមករស់នៅលើគោកវិញឱ្យអស់ត្រឹមចុងឆ្នាំនេះ។
លោកបន្តថា នៅក្នុងផែនការនេះ អាជ្ញាធរខេត្ត បានបង្កើតគណៈកម្មការ ៦ក្រុម គឺក្រុមទី១ ដឹកនាំដោយលោកផ្ទាល់ ធ្វើបម្លាស់ទីផ្ទះបណ្តែតទឹក នៅក្នុងក្រុងកំពង់ឆ្នាំង ឱ្យឡើងមករស់នៅលើគោកវិញ ឱ្យអស់នៅចុងឆ្នាំ២០១៨នេះ ។ ចំណែក ៥ក្រុមទៀត គឺមានលោកស្នងការនគរបាលខេត្តជាប្រធាន និងអភិបាលស្រុកពាក់ព័ន្ធ ជាអនុប្រធាន ដោយត្រូវធ្វើការបម្លាស់ទីផ្ទះបណ្តែតទឹកទាំងអស់ ដែលមានទាំងវៀតណាម ទាំងខ្មែរ និងទាំងខ្មែរឥស្លាមមានចំនួនជាង ២ពាន់គ្រួសារ នៅតាមស្រុកក្នុងខេត្តកំពង់ឆ្នាំង ឱ្យឡើងមករស់នៅលើគោកទាំងអស់នៅក្នុងឆ្នាំ២០១៩។ ក្នុងនោះ ជាង២ពាន់គ្រួសារ បានផ្តិតមេដៃយល់ព្រមរួចហើយ ហើយអាជ្ញាធរខេត្ត ក៏បានបញ្ជូនមេដៃទាំងនោះ ជូនប្រមុខរាជរដ្ឋាភិបាលរួចហើយដែរ៕ ដោយ ៖ រចនា