ខេត្តមណ្ឌលគីរី៖ សហគមន៍តំបន់ការពារធម្មជាតិចំនួន៩ នៅតំបន់ដែនជម្រកសត្វព្រៃស្រែពក នាខេត្តមណ្ឌលគីរី នៅថ្ងៃទី២៩ ខែវិច្ឆិកា ឆ្នាំ២០១៧ បានប្រកាសទទួលស្គាល់ជាផ្លូវការដោយក្រសួងបរិស្ថាន។ ការបង្កើតសហគមន៍តំបន់ការពារធម្មជាតិនេះ គឺធ្វើឡើងតាមរយៈការស្នើសុំការគាំទ្រពីសហគមន៍មូលដ្ឋាន ដើម្បីឱ្យសហគមន៍មានលទ្ធភាពពេញលេញ ចូលរួមគ្រប់គ្រង ប្រើប្រាស់ អាស្រ័យផលប្រកបដោយនិរន្តរភាព និងប្រសិទ្ធភាព។
លោក សូ ខនឬទ្ធីគុណ អនុរដ្ឋលេខាធិការក្រសួងបរិស្ថាន បានចូលរួមជាអធិបតីក្នុងព្រឹត្តិការណ៍នេះ ហើយបានលើកឡើងថាសហគមន៍មានតួនីសំខាន់ក្នុងការចូលរួមដោយផ្ទាល់ ក្នុងការការពារ និងអភិរក្សធនធានធម្មជាតិប្រកបដោយនិរន្តរភាព។ លោក បានបញ្ជាក់ថា បន្ទាប់ពីទទួលសំណើពីសហគមន៍មូលដ្ឋាន ក្រសួងបរិស្ថានបានចាត់ឱ្យមន្ត្រីជំនាញមកពីអគ្គនាយកដ្ឋានសហគមន៍មូលដ្ឋាន អគ្គនាយកដ្ឋានចំណេះដឹង និងព័ត៌មានបរិស្ថាន និងអគ្គនាយកដ្ឋានរដ្ឋបាលការពារ និងអភិរក្សធម្មជាតិ ចុះសិក្សា និងវាយតម្លៃពីលទ្ធភាពផ្ទេរសហគមន៍ព្រៃការពារ មកជាសហគមន៍ តំបន់ការពារធម្មជាតិ។
សូមបញ្ជាក់ថា សហគមន៍ទាំង៩ មកពីស្រុកពេជ្រាដា និងស្រុកកោះញែក ស្ថិតក្នុងតំបន់ការពារដែនជម្រកសត្វព្រៃស្រៃពក ខេត្តមណ្ឌលគីរី បានក្លាយជា សហគមន៍តំបន់ការពារធម្មជាតិរួមមាន៖ ១- សហគមន៍តំបន់ការពារធម្មជាតិទូលុង ឃុំក្រង់តេះ ស្រុកពេជ្រាដា ២- សហគមន៍តំបន់ការពារធម្មជាតិ ត្រពាំងក្អើម ឃុំពូជ្រៃ ៣- សហគមន៍តំបន់ការពារធម្មជាតិ ពូជ្រៃ ឃុំពូជ្រៃ ៤- សហគមន៍តំបន់ការពារធម្មជាតិ ក្រង់រពុក ឃុំពូជ្រៃ ស្ថិតនៅស្រុកពេជ្រាដា និង ៥- សហគមន៍តំបន់ការពារធម្មជាតិ អូរង្លាវ ឃុំស្រែហ៊ុយ ៦- សហគមន៍តំបន់ការពារធម្មជាតិអូរឈួល ឃុំស្រែហ៊ុយ ៧- សហគមន៍តំបន់ការពារធម្មជាតិ ម៉ាលឺលកងប្រស់ ឃុំណងឃីលឹក ៨- សហគមន៍តំបន់ការពារធម្មជាតិអរបួនលើ ឃុំអរបួនលើ ៩- សហគមន៍តំបន់ការពារធម្មជាតិ យ៉ូកណាមរ៉ាម ឃុំសុខសាន្ត ស្ថិតនៅស្រុកកោះញែក។
នៅក្នុងឆ្នាំនេះ ក្រសួងបរិស្ថាន កំពុងដំណើការទទួលស្គាល់សហគមន៍តំបន់ការពារធម្មជាតិចំនួន១៧ នៅខេត្តមណ្ឌលគីរី ពោធិ៍សាត់ និងកំពង់ស្ពឺ បន្ថែមលើសហគមន៍ចំនួន១៥១ ដែលមានក្នុងពេលបច្ចុប្បន្ន និង ដែលមានផ្ទៃដីចំនួន២៤៨៨៥៧ ហិកតា និងមានប្រជាជនចូលរួមចំនួន ៣៦០៥៨ គ្រួសារ ស្មើនឹង២៧០ភូមិ៕ ដោយ៖បញ្ញាស័ក្តិ