សមត្ថកិច្ចបានធ្វើការឃាត់ខ្លួនមនុស្ស ២៦នាក់ ក្នុងនោះមានជនជាតិចិន ០៣នាក់ និងជនជាតិវៀតណាម ២៣នាក់ មិនមានលិខិតឆ្លងដែនជាប់ខ្លួន និងបានរកឃើញសម្ភារ និងវត្ថុជាឧបករណ៍អេឡិចត្រូនិច ជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា

រដ្ឋបាលខេត្តព្រះសីហនុ បានឪ្យដឹងថា នៅថ្ងៃទី០២ ខែមិថុនា ឆ្នាំ២០២៦ កម្លាំងគណៈបញ្ជាការឯកភាពរដ្ឋបាលក្រុងកំពង់សោម ដោយមានការសម្របសម្រួលនីតិវិធីពីតំណាងអយ្យការអមសាលាដំបូងខេត្តព្រះសីហនុ បានចុះធ្វើរដ្ឋបាលចំហទីតាំងផ្ទះវីឡាមួយកន្លែង បានរកឃើញសម្ភារ និងវត្ថុជាឧបករណ៍អេឡិចត្រូនិចជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា(Online Scams) ស្ថិតក្នុងភូមិគគីរ សង្កាត់បិតត្រាំង ក្រុងកំពង់សោម ខេត្តព្រះសីហនុ។
នៅក្នុងកិច្ចប្រតិបត្តិការនេះ កម្លាំងជំនាញបានសម្រេចដកហូតវត្ថុតាងរួមមាន៖

• កុំព្យូទ័រយួរដៃចំនួន ១១គ្រឿង
• ទូរស័ព្ទដៃចំនួន ២០គ្រឿង
• រថយន្ត ២ គ្រឿង
• ម៉ូតូ ១ គ្រឿង
  ជាមួយគ្នានោះដែរ សមត្ថកិច្ចបានធ្វើការឃាត់ខ្លួនមនុស្សចំនួន ២៦នាក់ ស្រី០៣ នាក់ ក្នុងនោះមានជនជាតិចិន ចំនួន ០៣នាក់ និងជនជាតិវៀតណាមចំនួន ២៣នាក់ មិនមានលិខិតឆ្លងដែនជាប់ខ្លួន។
  បច្ចុប្បន្ន ជនសង្ស័យទាំង ២៦នាក់ រួមជាមួយវត្ថុតាង ត្រូវបានបញ្ជូនទៅកាន់ស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធីសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការទៅតាមផ្លូវច្បាប់៕រក្សាសិទ្ធដោយ៖សុទ្ធលី