រឿង សោភ័ណ្ឌ គឺជាកំពូលកីឡាករមួយរូប ដែលស្ថិតក្នុងដួងចិត្តមហាជនជាអ្នកស្នេហាកីឡាក្បាច់គុនប្រដាល់សេរីខ្មែរជាច្រើន នៅទាំងក្នុង និងក្រៅប្រទេស ។ «អ្នកលេងកណ្តាប់ដៃពិឃាត» រូបនេះ បានធ្វើឲ្យអ្នកទស្សនាពេញចិត្តយ៉ាងខ្លាំង ព្រោះថាគាត់អាចវ៉ៃបានគ្រប់ទង្រង់នៃក្បាច់គុនខ្មែរ ទាំងកណ្តាប់ដៃ, កែង និងជើង ។
ជាមួយក្បាច់ប្រយុទ្ធដ៏មិនធម្មតា រឿង សោភ័ណ្ឌ កម្រឃើញឡើងប្រកួតជាមួយកីឡាករខ្មែរគ្នាឯងណាស់ គឺគាត់តែងត្រូវបានគណៈកម្មការផ្គូផ្គងតែជាមួយកីឡាករបរទេសប៉ុណ្ណោះ ដែលភាគច្រើនជាកីឡាករមកពីប្រទេសថៃ ។
ជាមួយនឹងលទ្ធផលកម្រចាញ់ និងតែងតែធ្វើឲ្យមហាជនមានទំនុកចិត្តយ៉ាងខ្លាំងបំផុតនោះ ថ្មីៗនេះ រឿង សោភ័ណ្ឌ ត្រូវបានជ្រើសរើសឲ្យចេញពីប្រកួតនៅឯប្រទេសមីយ៉ាន់ម៉ា រួមជាមួយកីឡាករ ពេជ្រ ម្ទេសខ្មាំង ។
ប៉ុន្តែ គួរឲ្យសោកស្តាយយ៉ាងខ្លាំង ដែលកីឡាករ រឿង សោភ័ណ្ឌ ត្រូវចាញ់ក្រោមកណ្តាប់ដៃកំពូលកីឡាករមីយ៉ាន់ម៉ា «មុខដែក» ឈ្មោះថា Yan Naing Tun ក្នុងកម្មវិធីប្រកួត «WORLD LETHWEI CHAMPIONSHIP» កាលពីយប់ថ្ងៃទី២៩ ខែកញ្ញា ឆ្នាំ២០១៨ ។ រីឯ ពេជ្រ ម្ទេសខ្មាំង វិញបានឈ្នះយ៉ាងមោទនភាពបំផុត ។
ទោះយ៉ាងណា អ្នកគាំទ្រ រឿង សោភ័ណ្ឌ ភាគច្រើនបានផ្ទុះកំហឹងយ៉ាងខ្លាំងក្លា ទៅលើអាជ្ញាកណ្តាលមីយ៉ាន់ម៉ា ដោយចោទប្រកាន់ថាកាន់ជើងកីឡាកររបស់ខ្លួន ។ ព្រោះថា ទោះបីកីឡាករមីយ៉ាន់ម៉ាមុខរឹងនោះ ត្រូវបានរងកណ្តាប់ដៃ និងទម្ងន់ជើងដ៏ធ្ងន់ៗ បណ្តាលឲ្យដួលច្រងិបច្រងិលយ៉ាងណា ក៏អាជ្ញាកណ្តាលពុំធ្វើការរាប់នោះឡើយ ។
យ៉ាងណាមិញ ព្រះសង្ឃមួយអង្គដែលជាអ្នកលេងអ៊ីនធើរណេត ក៏បានចូលរួមខមិនពន្យល់បកស្រាយ អំពីលទ្ធផលចាញ់របស់ រឿង សោភ័ណ្ឌ ដែលបើតាមដឹងត្រូវបានអាជ្ញាកណ្តាលបញ្ឈប់ការប្រកួតត្រឹមទឹកទី៣ ជាមួយហេតុផលយ៉ាងដូច្នេះថា៖ «សោភ័ណ្ឌតាមក្បាច់និងបច្ចេកទេសទឹកចិត្តយើងមិនចាញ់គេទេ តែអ្វីដែលជាមូលហេតុនាំអោយចាញ់គឺកម្លាំងយើងមិនដល់គេ កីឡាកយើងជាទូទៅចាញ់ ជំហរ និងកម្លាំង។ដោយសារការហ្វឹកហាត់និងការហូបមិនមានកម្រិតត្រឹមត្រូវតាមក្បួននៃអ្នកកីឡា ម្យ៉ាងជីវភាពកីឡាករយើងនៅមានកម្រិត ហើយប្រដាប់ហ្វឹកហាត់ក៏មិនទាន់ទំនើបដូចគេ តែបើប្អូនកុំព្យាយាមវាយសម្រុកពេកដោយប្រើបច្ចេកទេសខ្ចីកម្លាំងដៃគូរនិងដកថយខ្លះល្អ ប្រហែលជាយើងអាចឈ្នះពិន្ទុ តែទោះជាយ៉ាងនេះក្តីខ្ញុំនៅតែគាំទ្រប្អូននិងកីឡាករខ្មែរយើងដ៏ទៃទៀតជានិច្ចសូមប្អូនព្យាយាមបន្តទៀតកុំធ្លាក់ទឹកចិត្ត ប្អូនធ្វើបានល្អណាស់ទោះជាចាញ់ក្តី» ។
ទោះយ៉ាងណាក៏ដោយចុះ អ្នកគាំទ្រ រឿង សោភ័ណ្ឌ នៅតែលើកទឹកចិត្តគាត់ ឲ្យខំស៊ូៗ និងសូម្បីនិយាយថា បើមកខ្មែរវិញដឹងតែដេកស្អាតចឹងហ្មង ៕
ចុះប្រិយមិត្ត CEN វិញ យល់ឃើញយ៉ាងណាដែរ?
ដោយ៖ ឧត្តម
ប្រភពវីដេអូ៖ Youtube
