មណ្ឌលគិរី ៖ ប៉ុស្តិ៍នគរបាលរដ្ឋបាលឃុំស្រែហ៊ុយ បានរាយការណ៍ឲ្យដឹងថា អភិបាលខេត្តមណ្ឌលគិរី ដឹកនាំកម្លាំងសមត្ថកិច្ចចម្រុះ ចុះត្រួតពិនិត្យសកម្មភាពក្រុមហ៊ុនដីសម្បទានសង្គមកិច្ច និងទប់ស្កាត់ការកាប់ទន្ទ្រានដីរដ្ឋធ្វើកម្មសិទ្ធិនៅស្រុកកោះញែក។ ការចុះបង្ក្រាបនេះ ក្រោយពេលដែលសម្តេចក្រឡាហោម ព្រមានខ្លាំងៗ។
ប៉ុស្តិ៍នគរបាលរដ្ឋបាលឃុំស្រែហ៊ុយ បានបន្ថែមថា នាថ្ងៃទី៣០ ខែកញ្ញា ឆ្នាំ២០១៨ លោក ស្វាយ សំអ៊ាង អភិបាលខេត្តមណ្ឌលគិរី បានដឹកនាំកម្លាំងសមត្ថកិច្ចចម្រុះ រួមមានលោកមេបញ្ជាការកងរាជអាវុធហត្ថខេត្ត លោកមេបញ្ជាការតំបន់ប្រតិបត្តិការសឹករងខេត្ត លោកស្នងការនគរបាលខេត្ត លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្ត និងមន្ត្រីជំនាញមួយចំនួន បានចុះត្រួតពិនិត្យសកម្មភាពតាមបណ្តាក្រុមហ៊ុនដីសម្បទានសង្គមកិច្ច ដែលធ្វើការឈូសឆាយ និងណែនាំដល់ក្រុមហ៊ុន ត្រូវធ្វើយ៉ាងណា អនុវត្តឱ្យ បានត្រឹមត្រូវតាមគោលការច្បាប់ និងចុះទប់ស្កាត់ការកាប់ទន្ទ្រានយកដីរដ្ឋធ្វើជាកម្មសិទ្ធិ ថែមទាំងបានជម្រុញដល់មន្ត្រីជំនាញ ត្រូវយកចិត្តទុកដាក់បន្ថែមទៀត ក្នុងការទប់ស្កាត់ និងបង្ក្រាបបទល្មើសនានា ជាពិសេស ត្រូវរាយការណ៍ជូនគណៈបញ្ជាការខេត្តឱ្យបានទាន់ពេលវេលា។
សូមបញ្ជាក់ថា លោក ស្វាយ សំអ៊ាង អភិបាល ខេត្តមណ្ឌលគិរី ត្រូវបានសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ស្តីបន្ទោស ថាមិនយកចិត្តទុកដាក់ ក្នុងការបង្ក្រាប បទល្មើសព្រៃឈើ ដោយបណ្តែតបណ្តោយ ឲ្យក្រុមឈ្មួញ ឧក្រិដ្ឋជន នាំអនុផលព្រៃឈើ ទៅលក់នៅប្រទេសជិតខាង ដោយរលូន។ ការស្ដីបន្ទោសនេះ សម្តេចក្រឡាហោម ស ខេង បានមានប្រសាសន៍ លើកឡើង កាលពីថ្ងៃអាទិត្យ ទី២៣ ខែកញ្ញា ឆ្នាំ២០១៨ នេះ នៅសាលមហោស្រព ស្ទឹងសង្កែ ខេត្តបាត់ដំបង ក្នុងកិច្ចប្រជុំ បូកសរុប សកម្មភាពការងារ និង លទ្ធផល នៃការបោះឆ្នោត ជ្រើសតាំង តំណាងរាស្ត្រ នីតិកាលទី៦ និង ទិសដៅភារកិច្ច អនុវត្តបន្ត។
សម្តេចក្រឡាហោម ស ខេង បានបន្ថែមថា បទល្មើសព្រៃឈើ នៅតែបន្តកើតមាន នៅក្នុងទឹកដី ខេត្តមណ្ឌលគិរី។ ហើយសកម្មភាព កាប់ឈើ ត្រូវបានក្រសួងបរិស្ថាន ថតរូបភាព ពីលើអាកាស បន្ថែមលើសេចក្តីរាយការណ៍។ ហើយសម្តេចក្រឡាហោម ស ខេង បានសង្កត់ធ្ងន់ថា បើសិនលោក ស្វាយ សំអ៊ាង អភិបាល ខេត្តមណ្ឌលគិរី នៅមិនបង្ក្រាប បទល្មើសព្រៃឈើនោះទេ ប្រាកដជា មានបញ្ហា ជាក់ជាមិនខាន។ បើយោងតាម ប្រសាសន៍ លើកឡើង ស្ដីបន្ទោស របស់សម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃ មិនខុសពីប្រភព ក្រុមឈ្មួញ ដែលធ្លាប់រកស៊ីឈើ ក្នុងខេត្តមណ្ឌលគិរី បាននិយាយថា ការជួញដូរ និងដឹកជញ្ជូនឈើ យកទៅលក់ នៅប្រទេស វៀតណាម ពួកគេត្រូវរត់ការ បើកផ្លូវជាមុនសិន ទើបអាចដឹកឈើទាំងនោះ ឆ្លងដែនបាន។ ហើយពួកគេថា មានមន្ត្រីជាច្រើន ដែលតម្រូវឲ្យពួកគេ រត់ការបង់ផ្លូវ រួមមាន៖ ទី១ នគរបាលការពារព្រំដែន ទី២ នគរបាលសេដ្ឋកិច្ចខេត្ត ទី៣ នគរបាលសេដ្ឋកិច្ចក្រសួង ទី៤ នគរបាលប៉ុស្តិ៍រដ្ឋបាល ទី៥ នគរបាលវរៈព្រំដែន ទី៦ មន្ត្រីយោធា មានដូចជា៖ យោធាខេត្ត , យោធាព្រំដែន , យោធាវរៈ , យោធាស៊ើបការណ៍ , យោធាអគ្គ ទី៧ មន្ត្រីបរិស្ថាន មានដូចជា៖ មន្ត្រីបរិស្ថានខេត្ត , មន្ត្រីបរិស្ថានឧទ្យានុរក្ស , មន្ត្រីបរិស្ថានស្រុក , មន្ត្រីបរិស្ថានដែនជម្រក , ទី៨ មន្ត្រីមេព្រៃ មានដូចជា៖ មន្ត្រីមេព្រៃខណ្ឌ រដ្ឋបាលព្រៃឈើ , មន្ត្រីមេព្រៃផ្នែក រដ្ឋបាលព្រៃឈើ , មន្ត្រីមេព្រៃសង្កាត់ រដ្ឋព្រៃឈើ , ទី៩ មន្ត្រីសាលាស្រុក ទី១០ សហគមន៍ នឹងទី១១ មន្ត្រីគយ៕ ដោយ ៖ បញ្ញាស័ក្តិ