នេះជារឿងដ៏គួរឲ្យអាសូរមួយ ដែលទារកទើបកើតម្នាក់ត្រូវបានរកឃើញនៅក្នុងចម្ការចេកនៃដីឡូត៍មួយកន្លែង នៅក្នុងប្រទេសថៃ ដោយស្ថិតក្នុងស្ថានភាពទងផ្ចិតពុំទាន់ត្រូវបានកាត់ផ្តាច់នៅឡើយ ។
យោងតាមប្រភពព័ត៌មាន បានឲ្យដឹងថា ទារកម្នាក់ត្រូវបានរកឃើញនៅក្នុងដីឡូត៍ចម្ការចេក ជាប់នឹងសយនដ្ឋានមួយ ។ នៅលើខ្លួនប្រាណរបស់វា ត្រូវបានឃើញស្នាមមូសខាំឡើងសោះសាច់គួរឲ្យអាសូរបំផុត ។
ស្ត្រីម្នាក់ឈ្មោះ Hang Hong អាយុ ៥៥ ឆ្នាំ ជាអ្នកដាំស្លនៃសយដ្ឋាននោះ បានិយាយថា អ្នកស្រីបានលឺសម្លេងទារកនៅវេលាម៉ោងប្រហែល ៧ និង ៣០ នាទី ។ អ្នកស្ត្រីបន្តថា «ដំបូង ខ្ញុំបានគិតថា វាជាសម្លេងខ្មោចលង ហេតុនេះក៏ពុំចាប់អារម្មណ៍ ប៉ុន្តែ នៅពេលខ្ញុំកំពុងធ្វើការ ខ្ញុំក៏បានលឺសម្រែកទារកជាលើកទី២ នៅវេលាម៉ោង ១០ និង ៣០ នាទីព្រក ។ ដោយកាន់តែសង្ស័យ ខ្ញុំក៏បានទៅប្រាប់អ្នកជិតខាងឲ្យទៅមើលកន្លែងនោះ និងពិតជាស្លុតរន្ធត់យ៉ាងខ្លាំង ខណៈរកឃើញទារកគួរឲ្យស្រលាញ់ម្នាក់ កំពុងស្ថិតនៅលើស្មៅចម្ការចេកបែបនេះ ។
ជំហានដំបូង គេបានសន្និដ្ឋានថា ម្តាយរបស់ទារកនេះអាចជាអ្នករស់នៅក្នុងអគារនោះ ដែលបានបោះទម្លាក់កូនរបស់នាងពីជាន់ទី៥ ប៉ុន្តែ សំណាងណាស់ ដែលទារកនេះពុំរងរបួសអ្វីទាំងអស់ ដោយធ្លាក់ចំដើមចេក ។
បច្ចុប្បន្ន សមត្ថកិច្ចមូលដ្ឋានកំពុងស៊ើបអង្កេតរកម្តាយរបស់វា ៕
ដោយ៖ ចន្ទី
ប្រភព៖ khaosod
