ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានអោយដឹងថា ជនសង្ស័យចំនួន៨នាក់ ដែលបង្កបទល្មើសពាក់ព័ន្ធករណីលួចមានស្ថានទម្ងន់ទោស ” ឆក់ ” ត្រូវបានកម្លាំងនគរបាលជំនាញឃាត់ខ្លួន បញ្ជូនទៅកាន់តុការបន្តនីតិវិធីផ្តន្ទាទោស។
តាមរបាយការណ៍ពី លោកឧត្តមសេនីយ៍ស្នងការបង្ហាញថា កាលពីថ្ងៃទី២៨ ខែកញ្ញា ឆ្នាំ២០១៨ វេលាម៉ោង ២០ និង ៣០នាទី នៅចំណុចមុខកាស៊ីណូ វិមានខ្សាច់ស ស្ថិតនៅក្រុមទី១៧ ភូមិ៤ សង្កាត់៤ ក្រុង-ខេត្តព្រះសីហនុ មានអំពើលួចមានស្ថានទម្ងន់ទោស ( ឆក់កាបូបជនជាតិចិន ) មួយករណី បង្កឡើងដោយជនសង្ស័យ ០២នាក់ ជិះម៉ូតូ ០១គ្រឿង បានធ្វើសកម្មភាព ឆក់កាបូប របស់ជនជាតិចិន ដែលកំពុងដើរតាមផ្លូវ នៅចំណុចមុខកាស៊ីណូ វិមានខ្សាច់ស រួចជិះរត់គេចខ្លួនបាត់។
លោក ជួន ណារិន្ទ បញ្ជាក់ថា បន្ទាប់ពីបានទទួលបណ្តឹង របស់ជនរងគ្រោះ កម្លាំងជំនាញផែននគរបាលព្រហ្មទណ្ឌ សហការជាមួយកម្លាំងមូលដ្ឋាន បានបើកការស្រាវជ្រាវ រហូតឈានទៅធ្វើការឃាត់ខ្លួនជនសង្ស័យ និងបក្ខពួកចំនួន ០៨នាក់ នៅវេលាម៉ោង ២និង៣០នាទីយប់រំលងអាធ្រាត្រឆ្លងថ្ងៃទី០១ ខែតុលា ឆ្នាំ២០១៨។
ជនរងគ្រោះមានឈ្មោះ WANG TAO ភេទប្រុស អាយុ៣៦ឆ្នាំ ជនជាតិចិន មុខរបរទេសចរណ៍ កាន់លិខិតឆ្លងដែនលេខ EE០៥០២៥៩០ ស្នាក់នៅ ក្រុមទី១៧ ភូមិ៤ សង្កាត់៤ ក្រុង-ខេត្តព្រះសីហនុ។ ក្នុងនោះសម្ភារៈបាត់បង់រួមមាន៖
-កាបូប ០១ ពណ៌កាហ្វេ ម៉ាក អិលវី
-លិខិតឆ្លងដែន ០១ច្បាប់
-អត្តសញ្ញាណប័ណ្ណចិន ០១សន្លឹក
-កាតធនាគារ ០៤សន្លឹក
-កាបូបលុយតូចម៉ាក អិលវី ពណ៌ខ្មៅ ចំនួន ០១
-កាក់កាស៊ីណូចំនួន ១០០,០០០យាន់ ( ដប់ម៉ឺនយាន់ ) ។
របាយការណ៍ដដែលបញ្ជាក់ថា ជនសង្ស័យទាំង ០៨នាក់រួមមាន ៖
១-ឈ្មោះ ឯក មាន ភេទប្រុស អាយុ១៦ឆ្នាំ មុខរបរ មិនពិតប្រាកដ មានទីលំនៅ ភូមិចំការកៅស៊ូ ឃុំជើងគោ ស្រុកព្រៃនប់ ខេត្តព្រះសីហនុ (អ្នកបើកម៉ូតូ)។
២-ឈ្មោះ ស៊ុត គឹមស្រេង ភេទប្រុស អាយុ ១៩ឆ្នាំ មុខរបរមិនពិតប្រាកដ មានទីលំនៅ ភូមិ៣ សង្កាត់៣ ក្រុង-ខេត្តព្រះសីហនុ (អ្នកឆក់)។
៣-ឈ្មោះ យាន ច័ន្ទរក្សា ភេទប្រុស អាយុ ១៧ឆ្នាំ មុខរបរមិនពិតប្រាកដ មានទីលំនៅ ភូមិ៣ សង្កាត់៤ ក្រុង-ខេត្តព្រះសីហនុ (បក្ខពួកសមគំនិត)។
៤-ឈ្មោះ ចែម ភារម្យ ភេទប្រុស អាយុ ១៦ឆ្នាំ មុខរបរកម្មករសំណង់ មានទីលំនៅ ភូមិ១ សង្កាត់៣ ក្រុង-ខេត្តព្រះសីហនុ (បក្ខពួកសមគំនិត)។
៥-ឈ្មោះ ដាវ វិចិត្រ ភេទប្រុស អាយុ ១៦ឆ្នាំ មុខរបរមិនពិតប្រាកដ មានទីលំនៅ ភូមិ១ សង្កាត់៣ ក្រុង-ខេត្តព្រះសីហនុ (បក្ខពួកសមគំនិត)។
៦-ឈ្មោះ សេង សំណាង ភេទប្រុស អាយុ ១៦ឆ្នាំ មុខរបរ មិនពិតប្រាកដ មានទីលំនៅក្រុម១៦ ភូមិ៣ សង្កាត់១ ក្រុង-ខេត្តព្រះសីហនុ (បក្ខពួកសមគំនិត) ។
៧-ឈ្មោះ ស៊ូ ង៉ែត ភេទប្រុស អាយុ ១៩ឆ្នាំ មុខរបរសន្តិសុខយាមកន្ទុយនាគ មានទីលំនៅក្រុម១៤ ភូមិ៤ សង្កាត់៤ ក្រុង-ខេត្តព្រះសីហនុ (បក្ខពួកសមគំនិត) ។
៨-ឈ្មោះ លី សេង ភេទប្រុស អាយុ ១៧ឆ្នាំ មុខរបរមិនពិតប្រាកដ មានទីលំនៅ ភូមិ៣ សង្កាត់១ ក្រុង-ខេត្តព្រះសីហនុ (បក្ខពួកសមគំនិត)។
ចំណែកវត្ថុតាងដែលសមត្ថកិច្ចចាប់យកបានមាន៖
-កាក់កាស៊ីណូ ០៤ (ផលនៃអំពើទុច្ចរិត)
-ទូរស័ព្ទដៃ ០១គ្រឿង ម៉ាក HUAWEI ពណ៌ខ្មៅ (ផលនៃអំពើទុច្ចរិត)
-កាតធនាគារ ០១ (ផលនៃអំពើទុច្ចរិត)
-ទូរស័ព្ទដៃ ០១គ្រឿង ម៉ាក IPHONE5 ពណ៌ខ្មៅ
-ទូរស័ព្ទដៃ ០១គ្រឿង ម៉ាក អិនចុចពិល ពណ៌ផ្ទៃមេឃ
-ម៉ូតូ ០១គ្រឿង ម៉ាក ហុងដា WINNER ពណ៌ស-ខៀវ គ្មានស្លាកលេខ មានលេខតួលេខម៉ាស៊ីនៈ ១០៧៧៩២៦ (មធ្យោបាយធ្វើសកម្មភាព)។
របាយការណ៍ របស់លោក ជួន ណារិន្ទ ស្នងការដ្ឋាននគរបាលខេត្តព្រះសីហនុ ឲ្យដឹងថា បច្ចុប្បន្នជនសង្ស័យខាងលើ ការិយាល័យនគរបាលព្រហ្មទណ្ឌ កំពុងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីបន្តនីតិវិធីតាមផ្លូវច្បាប់៕ ដែន សីមា
