ខេត្តព្រះសីហនុ ៖ សមត្ថកិច្ចនគរបាលនៃស្នងការដ្ឋានខេត្តព្រះសីហនុ បានឲ្យដឹងថា មានមនុស្ស២នាក់ បានស្លាប់ភ្លាមៗនៅកន្លែងកើតហេតុ និង៤នាក់ផ្សេងទៀត បានរងរបួសធ្ងន់ ដោយគ្រោះថ្នាក់ចរាចរណ៍រថយន្តធ្លាក់ចូលប្រឡាយទឹកតាមផ្លូវ ពេលកំពុងបើកបរ កាលពីវេលាម៉ោងជាង១រសៀល ថ្ងៃទី១ ខែតុលា ឆ្នាំ២០១៨ លើផ្លូវជាតិលេខ៣ ចន្លោះគីឡូម៉ែត្រ ១៩៣-១៩៤ ស្ថិតនៅក្នុងភូមិតាអោងធំ ឃុំសាមគ្គី ស្រុកព្រៃនប់ ខេត្តព្រះសីហនុ។
សមត្ថកិច្ចមូលដ្ឋានបញ្ជាក់ថា រថយន្ត ១គ្រឿងជួបគ្រោះថ្នាក់ចរាចរណ៍ខាងលើនេះ ជារថយន្តរត់ឈ្នួល ម៉ាក CAMRY បាឡែន ពណ៌ ស្ករ ពាក់ផ្លាកលេខ ភ្នំពេញ២A-២៨២២ អ្នកបើកបរ មិនស្គាល់អត្តសញ្ញាណ (រត់គេចខ្លួន) ដោយមានទិសដៅ ពីវាលរេញឆ្ពោះទៅខេត្តកំពត ប៉ុន្តែពេលមកដល់ចំណុចកើតហេតុ រថយន្តនេះ ក៏បានបើកវ៉ាជែងរថយន្តធំមួយគ្រឿង មានទិសដៅស្របគ្នា បណ្តាលអោយជ្រុលចង្កូតធ្លាក់ចេញពីផ្លូវចូលប្រឡាយទឹកតែម្ដង។
សមត្ថកិច្ចនគរបាលចរាចរណ៍ឲ្យដឹងបន្តថា ជនរងគ្រោះដែលស្លាប់ក្នុងគ្រោះថ្នាក់ចរាចរណ៍ខាងលើនេះមាន៖ ឈ្មោះសូ ផិន ភេទប្រុសអាយុ៥០ឆ្នាំ មានទីលំនៅភូមិដានគោ ឃុំដានគោ ស្រុកអង្គជ័យ ខេត្តកំពត និងឈ្មោះ យ៉ន់ តី ភេទប្រុសអាយុ១០ឆ្នាំ មានទីលំនៅភូមិដានគោ ឃុំដានគោ ស្រុកអង្គជ័យ ខេត្តកំពត។
ចំណែកជនរងគ្រោះដែលរងរបួសធ្ងន់រួមមាន៖ ឈ្មោះ ធូ នុន ភេទស្រីអាយុ៥០ឆ្នាំ មានទីលំនៅភូមិ៣ សង្កាត់លេខ៣ ក្រុងព្រះសីហនុ។ ឈ្មោះ ទឹម បូរី ភេទស្រីអាយុ៤ឆ្នាំមានទីលំនៅភូមិ៣ សង្កាត់លេខក្រុងព្រះសីហនុ។ ឈ្មោះ ធូ និក ភេទស្រីអាយុ ៥០ឆ្នាំ មានទីលំនៅភូមិដានគោ ឃុំដានគោស្រុកអង្គរជយ័ខេត្តកំពត និង ឈ្មោះ អ៊ុក ផាន ភេទស្រីអាយុ ៤៨ឆ្នាំ មានទីលំនៅភូមិដានគោ ឃុំដានគោ ស្រុកអង្គរជយ័ ខេត្តកំពត៕ ដែន សីមា
