កណ្ដាល ៖ បុរសម្នាក់បើកម៉ូតូ លើកណ្ដាលទ្រូងផ្លូវ ត្រូវបានរថយន្តមួយគ្រឿង បើកដោយល្បឿនលឿនមិនប្រកាន់ស្ដាំ បានបុកចំពីមុខពេញមួយទំហឹង បណ្ដាលឲ្យបុរសជាអ្នកបើកម៉ូតូស្លាប់ភ្លាមៗ នៅវេលាម៉ោង៥និង៤០នាទីព្រឹក ថ្ងៃទី២ ខែតុលា ឆ្នាំ២០១៨ នៅលើកំណាត់ផ្លូវជាតិលេខ៣ ស្ថិតក្នុងភូមិតាឡឹក ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល ។
មន្ត្រីនគរបាលចរាចរណ៍ស្រុកកណ្ដាលស្ទឹង បានឲ្យដឹងថា ជនរងគ្រោះឈ្មោះអ៊ុំ វុទ្ធី អាយុ៤៨ឆ្នាំមានទីលំនៅភូមិនរាយណ៍ ឃុំនិទាន ស្រុកបរសេដ្ឋ ខេត្តកំពង់ស្ពឺ ជិះម៉ូតូម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ កំពង់ស្ពឺ1B-7292 ។ ចំណែករថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ2M-5008 ប្រភេទដឹកកម្មកររោងចក្រ បើកបរដោយជនមិនស្គាល់អត្តសញ្ញាណ រត់គេចខ្លួនបាត់ ។ នៅមុនពេលកើតហេតុ ជនរងគ្រោះជិះម៉ូតូតាមបណ្ដោយផ្លូវជាតិលេខ៣ ក្នុងទិសដៅពីត្បូងទៅជើង លុះបើកមកដល់ចំណុចកើតហេតុ ស្រាប់តែអ្នកបើកម៉ូតូ បានជិះកណ្ដាលទ្រូងផ្លូវ ខណៈនោះ ក៏មានរថយន្តមួយគ្រឿង បើកដោយល្បឿនលឿន ក៏បានបុកម៉ូតូជនរងគ្រោះ ចំពីមុខពេញមួយទំហឹង បណ្ដាលឲ្យជនរងគ្រោះស្លាប់ភ្លាមៗនៅកន្លែងកើតហេតុ រីឯអ្នកបើកបររថយន្តបានទុករថយន្តចោល រួចរត់គេចខ្លួនបាត់។
តាមការសន្និដ្ឋានរបស់សមត្ថកិច្ចមូលដ្ឋាន បានឲ្យដឹងថា ករណីនេះបណ្តាលមកពីអ្នកបើកបរម៉ូតូ បើកចំកណ្តាលទ្រូងផ្លូវ មិនប្រុងប្រយ័ត្ន ធ្វេសប្រហែស រីឯអ្នកបើកបររថយន្ត បើកបរមានល្បឿនលឿន ហើយមិនប្រកាន់ស្តាំ៕ ដោយ ៖ បញ្ញាស័ក្តិ
