ភ្នំពេញ៖ លោក Thomas Andrews អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ទៅនឹងប្រតិកម្មរបស់រដ្ឋាភិបាលថៃពាក់ព័ន្ធសេចក្តីថ្លែងការណ៍របស់ខ្លួន។
តាមរយៈសំណេរចុងនៅលើទំព័រហ្វេសប៊ុក ស្ប៉េស្យល់ រ៉ាប៉តទ័រ ខេមបូឌៀ (Special Rapporteur Cambodia) ក៏ដូចជាគណនីបណ្ដាញសង្គម X របស់លោក ថម អ៊ែនឌ្រូ (Tom Andrews) ដែលជាអ្នករាយការណ៍ពិសេសរបស់អង្គការសហប្រជាជាតិ (អ.ស.ប) ស្ដីពីស្ថានភាពសិទ្ធិមនុស្សនៅកម្ពុជា កាលពីថ្ងៃទី៦ ខែសីហា បានចេញមកបកស្រាយជាសាធារណៈ ក្រោយមានការរិះគន់ពីភាគីថៃ ដោយលោកបញ្ជាក់ថា
លោក Thomas Andrews បានថ្លែងថា ខ្ញុំមានសេចក្តីរីករាយ ចំពោះចំណាប់អារម្មណ៍លើសេចក្តីថ្លែងការណ៍ដែលខ្ញុំបានចេញផ្សាយនៅក្នុងសន្និសីទសារព័ត៌មាន បន្ទាប់ពីបញ្ចប់បេសកកម្មថ្មីៗរបស់ខ្ញុំមកកាន់ប្រទេសកម្ពុជា ក្នុងនាមជាអ្នករាយការណ៍ពិសេស អង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា។
អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា សូមស្វាគមន៍ចំពោះមតិយោបល់លើសេចក្តីថ្លែងការណ៍របស់ខ្ញុំ រួមទាំងពីរដ្ឋាភិបាលថៃផងដែរ។ នោះហើយជាមូលហេតុដែលខ្ញុំបានផ្ញើសេចក្តីព្រាងជាមុននូវផ្នែកមួយនៃសេចក្តីថ្លែងការណ៍ ទាក់ទងនឹងជម្លោះព្រំដែនទៅរដ្ឋាភិបាលថៃពីរថ្ងៃមុនពេលវាត្រូវបានចេញផ្សាយ រួមទាំងផ្នែកដែលនិយាយអំពីការផ្លាស់ទីលំនៅរបស់ប្រជាជន កម្ពុជា។ ខណៈពេលដែលខ្ញុំមិនបានទទួលការឆ្លើយតបចំពោះការទំនាក់ទំនងនោះ ខ្ញុំនៅតែបើកចំហ និងចង់ពិភាក្សាអំពីទស្សនៈរបស់រដ្ឋាភិបាលថៃ។
មន្ត្រីថៃបានជំទាស់ជាសាធារណៈចំពោះការលើកឡើងរបស់ខ្ញុំចំពោះប្រជាជនកម្ពុជាប្រមាណ ៦៥០.០០០ នាក់ ដែលត្រូវបានផ្លាស់ទីលំនៅដោយសារជម្លោះ រួមទាំងការបញ្ជាក់ថា អ្នកខ្លះក្នុងចំណោមអ្នកដែលត្រូវបានផ្លាស់ទីលំនៅបានរស់នៅលើទឹកដីថៃ។ ខណៈពេលដែលមានការកត់សម្គាល់ពីទស្សនៈរបស់ប្រទេសថៃ តួលេខដែលខ្ញុំបានលេីកឡេីង គឺបានដកស្រង់ចេញពីរបាយការណ៍របស់អង្គការសហប្រជាជាតិ ហើយការលើកឡើងរបស់ខ្ញុំចំពោះអ្នកដែលត្រូវបានផ្លាស់ទីលំនៅ គឺផ្អែកលើក្តីបារម្ភអំពីសិទ្ធិមនុស្ស ដោយមិនគិតពីការទាមទារទឹកដីដែលមានជម្លោះនោះឡើយ។
នៅខែក្រោយ ខ្ញុំនឹងបញ្ចប់របាយការណ៍របស់ខ្ញុំទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា ហើយខ្ញុំនឹងទាក់ទងទៅរដ្ឋាភិបាលថៃម្តងទៀត នៅពេលដែលខ្ញុំរៀបចំរបាយការណ៍នោះ។ ខ្ញុំសង្ឃឹមថាខ្ញុំនឹងអាចពិភាក្សាជាមួយមន្ត្រីថៃ ដើម្បីឱ្យខ្ញុំដឹងពីទស្សនៈរបស់ពួកគេ មុនពេលរបាយការណ៍របស់ខ្ញុំត្រូវបានបោះពុម្ពផ្សាយ។
អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា សូមគូសបញ្ជាក់ថា ការដោះស្រាយជម្លោះព្រំដែនឱ្យបានឆាប់រហ័ស និងដោយសន្តិវិធី គឺមានសារៈសំខាន់ណាស់ ដែលការធ្វើដូច្នេះនឹងអនុញ្ញាតឱ្យប្រជាពលរដ្ឋអាចវិលត្រឡប់ទៅកាន់លំនៅឋានរបស់ខ្លួនវិញ រស់នៅក្នុងបរិយាកាសប្រកបដោយស្ថិរភាព និងសុវត្ថិភាព ព្រមទាំងអាចទាញយកផលប្រយោជន៍ពីឱកាសសេដ្ឋកិច្ចដែលការធ្វើពាណិជ្ជកម្មតាមព្រំដែនអាចផ្តល់ជូន។រក្សាសិទ្ធិដោយ៖សុទ្ធលី
