ភ្នំពេញ៖ ប្រជាពលរដ្ឋរស់នៅខណ្ឌព្រែកព្នៅបានស្នើសុំអោយអាជ្ញាធររាជធានីភ្នំពេញជួយទប់ស្កាត់លើបញ្ហាគ្រឿងញៀន ក្មេងទំនើងបងតូចបងធំ ក្រុមក្មេងទំនើងជិះម៉ូតូដាក់ស៊ឺម៉ាំងឮខ្លាំងៗ ដែលបាននឹងកំពុងរីកដុះដាលយ៉ាងខ្លាំងនៅក្នុងភូមិដ្ឋានរបស់ពួកគាត់និងសុំអោយមានការរៀបចំសណ្តាប់ធ្នាប់នៅផ្សារព្រែកព្នៅ ខណៈដែលផ្សារនេះ បង្លអោយមានការកកស្ទះចរាចរណ៍រាល់ថ្ងៃនោះ។
ការស្នើសុំអោយជួយអន្តរាគមពីសំណាក់ប្រជាពលរដ្ឋ បែបនេះបានធ្វើឡើងនៅក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានី កាលពីព្រឹកថ្ងៃទី៣០វិច្ឆិកា នៅក្នុងបរិវេនភ្នំរាប សង្កាត់ពន្សាំង ខណ្ឌច្បារអំពៅ ក្រោមអធិបតីភាពលោកម៉ប់ សារិន ប្រធានក្រុមប្រឹក្សារាជធានីភ្នំពេញ លោកនួន ផារ័ត្នអភិបាលរងរាជធានីភ្នំពេញ និង លោករស់ សុផាន់ ប្រធានការងារថ្នាក់ជាតិចុះជួយមូលដ្ឋានខណ្ឌព្រែកព្នៅព្រមទាំងមានការចូលរូមពីប្រជាពលរដ្ឋជាច្រើនរយនាក់ផងដែរ។
ក្នុងវេទិកានេះប្រជាពលរដ្ឋបានលើកឡើងពីបញ្ហាប្រឈមជាច្រើន ក្នុងនោះមានទាំងបញ្ហាសំរាម យកមិនទាន់អស់នៅសង្កាត់គោករកា បញ្ហាផ្លូវរាល់ថ្ងៃនេះពិបាកក្នុងធ្វើដំណើរពិសេសក្មេងៗសិស្សសាលាទៅរៀន ទៅមន្ទីរពេទ្យជាដើម ។ការសុំធ្វើបណ្តាញលូ នៅភូមិពញ្ញាពន់ ។ បញ្ហាឡានដឹកដីដូចហែលកឋិន កាត់ទីតាំងរមណីដ្ឋានភ្នំរាប បណ្តាលអោយមានធូលីដីហុយយ៉ាងខ្លាំងចូលម្ហូមអាហារភ្ញៀវដែលមកដើរលេងនៅភ្នំរាបនេះ ហូបមិនកើត និងម្យ៉ាងទៀតធ្វើអោយផ្លូវខូចថែមទៀតនោះ ។ ការស្នើសុំអោយជួយអន្តរាគមនលើបញ្ហាថ្នាំញៀននៅក្នុងភូមិ ដោយពួកក្មេងៗ គ្មានគិតអីទេ សឹងតែក្លាយជាមនុស្សឆ្កួតអស់ហើយ មិនថាកូនគាត់និង កូនគេទេ ដូច្នេះពួកគាត់សុំអោយ អាជ្ញាធរជួយអន្តរាគមន៍ជួយពួកគាត់ផង។ការស្នើដុំអោយជួយលើបញ្ហាទឹកស្អាត ដោយមានបណ្តាញទឹកហើយតែទឹកមិនចេញ បើចេញ ចេញដូចនោមទាស់អញ្ចឹង ជាពិសេសពលរដ្ឋបានស្នើសុំបង្កើតវិទ្យាល័យមួយក្នុងតំបន់ព្រែកព្នៅដោយសារតែមានកំណើនសិស្ស និងសាលាដែលមានកម្រិតវិទ្យាល័យនៅឆ្ងាយពេក។
ជាការឆ្លើយតប លោកសុខ សម្បត្តិ បានលើកឡើងថា បញ្ហាគ្រឿងញៀន យើងបាននឹងកំពុងធ្វើយ៉ាងសកម្ម តែបញ្ហានេះនៅតែមានបញ្ហាប្រឈម ។លោកសុំអោយប្រជាពលរដ្ឋសហការលើបញ្ហានេះ បើមានការជួយដូរ ឬមានការប្រើប្រាស់គ្រឿងញៀន ត្រូវរាយការណ៍មកអាជ្ញាធរ ដើម្បីមានវិធានការ ។
លោកបន្តថា តាមពិតទៅបើកូនចៅ បងប្អូនប្រជាពលរដ្ឋ បើដឹងថា ពួកគេញៀនថ្នាំហើយត្រូវតែប្រាប់អាជ្ញាធរមានសមត្ថកិច្ច ដើម្បីនាំពួកគាត់ទៅបន្សាប មិនទុកបង្កអោយមានការអុកឡុកក្នុងមូលដ្ឋាននោះទេ។ ចំណែកការស្នើសុំអោយជួយលើការរៀបចំសណ្តាប់ធ្នាប់នៅផ្សារព្រែកព្នៅ ដែលតែងតែមានការកកស្ទះចរាចរណ៍រាល់ថ្ងៃនោះ លោកសុខ សម្បត្តិក៏បានបញ្ជាក់ផងដែរថា បញ្ហានេះមិនមែនថា អាជ្ញាធរមិនបានដឹងនោះទេ គឺយើងបានរៀបចំរាល់ថ្ងៃហើយ ប៉ុន្តែការកកស្ទះនៅចំណុចនេះនៅតែកើតមាន ។ លោកថា បើផ្សារព្រែកព្នៅ ស្ទះចរាចរណ៍ខ្លាំង បងប្អូនប្រជាពលរដ្ឋអាចពង្វាងចរាចរណ៍មកផ្លូវនិងស្ពានថ្មី អតីតឡុងឈិនបាន ដោយរដ្ឋបាលរាជធានីភ្នំពេញបានស្ថាបនាស្អាតហើយ។
លោកនួន ផារ័ត្ន បានលើកឡើងថា ចំពោះការស្នើសុំរបស់បងប្អូនប្រជាពលរដ្ឋលើបញ្ហាខាងលើ រដ្ឋបាលរាជធានីភ្នំពេញនឹងដោះស្រាយជូនប្រជាពលរដ្ឋ ។ប៉ុន្តែការដោះស្រាយនោះយើងនឹងធ្វើឡើងនៅកន្លែងណាដែលចាំបាច់មុនគេ ។ ដោយឡែកចំពោះបញ្ហាលុបបំបាត់គ្រឿងញៀននៅក្នុងមូលដ្ឋានប្រជាពលរដ្ឋ និងការរៀបចំសណ្តាប់ធ្នាប់ បញ្ជៀសការកកស្ទះចរាចរណ៍ មិនមែនយើងធ្វើតែម្តងទទួលបានជោគជ័យនោះទេ គឺការងារនេះ យើងបាននឹងកំពុងធ្វើរាល់ថ្ងៃអោយដូចភ្លៀងរលឹម៕ ដោយ៖កូឡាប
