ស្ត្រីសមាជិកសភាជប៉ុនម្នាក់ ដែលត្រូវបានបណ្តេញចេញពីសាលប្រជុំ បន្ទាប់ពីបាននាំកូនរបស់នាងចូល កាលពីឆ្នាំមុន នៅពេលនេះ ត្រូវបានដេញចេញពីសម័យប្រជុំពេញអង្គម្តងទៀតហើយ ក្នុងករណីចោទប្រកាន់បៀមជញ្ជក់ថ្នាំក្អក ខណៈកំពុងថ្លែង ។
ហេតុការណ៍គួរឲ្យភ្ញាក់ផ្អើលនេះ បានកើតឡើងកាលពីថ្ងៃសុក្រសប្តាហ៍មុន គឺនៅពេលដែលសមាជិកសភានៅ Kumamoto ភាគខាងត្បូងនៃប្រទេសជប៉ុន បានធ្វើការពិភាក្សាទៅលើការដាក់ពិន័យសមរម្យមួយ រហូតដល់រយៈពេល ៨ ម៉ោង ខណៈកិច្ចប្រជុំពិតប្រាកដត្រូវបានប៉ានប្រមាណអូសបន្លាយត្រឹមតែ ២ ម៉ោង ប៉ុណ្ណោះ ។
អ្នកស្រី Yuka Ogata អាយុ ៤៣ ឆ្នាំ បានកំពុងថ្លែងនៅលើវេទិកា នៅពេលនោះលោក Shinya Kutsuki ប្រធានក្រុមប្រឹក្សាសភា បានកត់សម្គាល់ថា អ្នកស្រី Ogata មានអ្វីៗនៅក្នុងមាត់របស់នាង ។
នៅពេលសួរនាំ អ្នកស្រី Ogata បានពន្យល់ថា អ្នកស្រីកំពុងផ្តាសាយ ហេតុដូច្នេះ អ្នកស្រីបានជញ្ជក់ថ្នាំគ្រាប់ផ្អែម (lozenge) ដើម្បីគ្រប់គ្រងការក្អក ។
ទោះយ៉ាងណា សមាជិកសភាបានរកឃើញថា គ្រាប់ថ្នាំក្អករបស់ Ogata បានធ្វើឲ្យមានការរំខាន ដែលនាំឲ្យពួកគេត្រូវតែបង្កើតគណៈកម្មាធិការវិន័យពិសេសមួយ និងបន្ទាប់មក បានបើកកិច្ចប្រជុំ ៨ ម៉ោង ដើម្បីពិភាក្សាពីផលវិបាកផ្សេងៗចំពោះសកម្មភាពរបស់នាង ។
គណៈកម្មាធិការបានកំណត់ថា អ្នកស្រី Ogata ត្រូវតែអានសារសុំទោសចំពោះករណីនេះ ប៉ុន្តែ នៅពេលអ្នកស្រីបដិសេធ ដោយនិយាយថា អ្នកស្រីមិនចង់អានសេចក្តីថ្លែងការណ៍ដែលនរណាម្នាក់ទៀតសរសេរនោះ សមាជិកសភាបានស្នើសុំ និងសម្រេចបញ្ឈប់នាងពីសម័យប្រជុំពេញមួយថ្ងៃ ។
ការញ៉ាំ និងផឹក ពុំត្រូវបានហាមឃាត់យ៉ាងច្បាស់លាស់ នៅក្នុងអង្គប្រជំនុំជម្រះនោះទេ ប៉ុន្តែ សមាជិកសភាបានប្រកែកថា អាកប្បកិរិយារបស់ Ogata បានបំផ្លាញសេចក្តីសុចរិតរបស់ពួកគេតែម្តង ។
ចៅហ្វាយក្រុង Kumamoto លោក Kazufumi Onishi ដែលមានវត្តមាននៅទីនោះ ក៏បានថ្លែងប្រឆាំងនឹងអ្នកស្រី Ogata ផងដែរ ។
ប្រព័ន្ធផ្សាយជប៉ុន Sankei បានដកស្រង់សម្តីលោក Onishi ដោយនិយាយថា៖ «វាមិនអាចទទួលយកបានទេ សម្រាប់សមាជិកម្នាក់ប្រើប្រាស់ថ្នាំក្អក ក្នុងអំឡុងពេលដំណើរការរឿងក្តីបែបនេះ ។ ហេតុនេះ នាងត្រូវតែសារភាពពីកំហុសរបស់នាង» ។
គួររម្លឹកផងដែរថា នៅក្នុងខែវិច្ឆិកាឆ្នាំមុន សភាដដែលបានបណ្តេញអ្នកស្រី Ogata ចេញពីអង្កប្រជុំ បន្ទាប់ពីនាងបាននាំយកកូនប្រុសអាយុ ៧ ខែ របស់នាង ចូលមកកន្លែងធ្វើការ ៕
ដោយ៖ ឧត្តម
ប្រភព៖nextshark
