ខេត្តព្រះសីហនុ ៖ អភិបាលខេត្តព្រះសីហនុ ឯកឧត្តម យន្ត មីន មានប្រសាសន៍ពីរសៀលថ្ងៃទី២ ខែតុលា ឆ្នាំ២០១៨ថា ផ្លូវដែលកំពុងរងការខូចខាតមួយចំនួន ក្នុងក្រុងព្រះសីហនុ អាជ្ញាធរនឹងធ្វើការជួសជុលជាបណ្តើរៗវិញហើយ។ ឯកឧត្តមអភិបាលខេត្តបន្តថា ផ្លូវដែលត្រូវជួសជុលរួមមាន៖ ទី១- ផ្លូវឯករាជ្យ ជួសជុលចាក់ក្រាលបេតុងកៅស៊ូ។ ទី២- ផ្លូវបំបែកពីវេទិការវិមានឯករាជ្យ ចូលទៅវត្តឥន្ទញ្ញាណ (វត្តក្រោម) ក្នុងសង្កាត់លេខ៣ ចាក់ក្រាលជាបេតុង។ ទី៣- ផ្លូវវត្តជោតញ្ញាណ(វត្តលើ ) ក្នុងសង្កាត់លេខ១ ចាប់ពីក្លោងទ្វារវត្តរហូតដល់ផ្លូវបំបែកចុះមកសង្កាត់លេខ២ ជួសជុលចាក់ក្រាលជាបេតុងសងខាង កៅស៊ូកណ្តាលនិង ទី៤- ផ្លូវមួយខ្សែទៀត បំបែកពីផ្លូវឯករាជ្យ ត្រង់ចំណុចស្តុបសុខាភិបាលចាស់ឡើងទៅលើ ភ្ជាប់នឹងផ្លូវឯករាជ្យវិញត្រង់ចំណុចជាប់របងសាលារៀនកម្មករ ក្នុងសង្កាត់លេខ៤ ជួសជុលចាក់ក្រាលបេតុងកៅស៊ូ។
ឯកឧត្តម យន្ត មីន ឲ្យដឹងដូច្នេះ រួចបញ្ជាក់ថា ចំពោះគម្រោងជួសជុលបន្តកាលពីឆ្នាំមុន រួមមាន៖ ផ្លូវអូរ១ ក្នុងសង្កាត់លេខ៤ ការជួសជុលនឹងប្តូរពីក្រាលកៅស៊ូមកក្រាលជាបេតុងវិញ និងផ្លូវសេតេ ការជួសជុលក្រាលកៅស៊ូកណ្តាល ចាក់បេតុងសងខាង។
ឯកឧត្តមរំពឹងទុកថា ការស្ថាបនាផ្លូវអូរ១ និងផ្លូវសេតេ អាចនឹងរួចរាល់នៅរដូវប្រាំងខាងមុខ។ ដោយឡែក ចំពោះផ្លូវខូចមួយចំនួនទៀត មានដូចជា៖ ផ្លូវអិលវីជាដើម រដ្ឋបាលខេត្ត កំពុងស្នើរកថវិកាបន្ថែមពីថ្នាក់ជាតិ និងមួយផ្នែកស្នើសុំការឧបត្ថម្ភពីវិស័យឯកជន ដើម្បីជួសជុលផ្លូវខូចខាតខាងលើនេះ ជាបន្តបន្ទាប់។
ត្រង់ចំណុចនេះ ឯកឧត្តម យន្ត មីន អះអាងថា បច្ចុប្បន្ននេះ មានខាងវិសយ័ឯកជនមួយចំនួន បានប្រកាសចូលរួមឧបត្ថម្ភថវិកាសម្រាប់ចំណាយធ្វើផ្លូវ មានខ្លះជួយឧបត្ថម ១០០ម៉ែត្រ អ្នកខ្លះ ២០០ ឬ៣០០ម៉ែត្រជាបណ្តើរៗហើយដែរ។
យ៉ាងនេះក្តី ឯកឧត្តម យន្ត មីនបានបញ្ជាក់ជាថ្មីថា ការជួសជុលស្តារផ្លូវក្នុងក្រុងព្រះសីហនុ បើធ្វើការជួសជុលទាំងអស់ព្រមៗគ្នា ត្រូវការថវិការហូតដល់ ២០០លានដុល្លា រសហរដ្ឋអាមេរិកឯណោះ។ ហើយថាគម្រោងនេះ រដ្ឋបាលខេត្តក៏កំពុងប្រគល់សិទ្ធិអោយក្រុមហ៊ុន មកពីប្រទេសចិន ដើម្បីធ្វើការសិក្សារួចហើយដែរ៕ ដែន សីមា