មណ្ឌលគិរី ៖ លោក ស្វាយ សំអ៊ាង អភិបាលខេត្តមណ្ឌលគិរី បានដឹកនាំកម្លាំងសមត្ថកិច្ចចម្រុះ រួមមាន លោកមេបញ្ជាការកងរាជអាវុធហត្ថខេត្ត លោកមេបញ្ជាការតំបន់ប្រតិបត្តិការសឹករងខេត្ត លោកស្នងការនគរបាលខេត្ត លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្ត និងមន្ត្រីជំនាញមួយចំនួន នាថ្ងៃទី៣០ ខែកញ្ញា ឆ្នាំ២០១៨ បានចុះត្រួតពិនិត្យសកម្មភាព តាមបណ្តាក្រុមហ៊ុនដីសម្បទានសេដ្ឋកិច្ច និងសង្គមកិច្ច ដែលធ្វើការឈូសឆាយ។
លោក ស្វាយ សំអ៊ាង អភិបាលខេត្តមណ្ឌលគិរី បានបញ្ជាក់ថា បន្ទាប់ពីបានដឹកនាំក្រុមគណៈកម្មាធិការចម្រុះខេត្ត ចុះត្រួតពិនិត្យស្រាវជ្រាវ និងទប់ស្កាត់បទល្មើសព្រៃឈើ ក្នុងតំបន់ដែនជម្រកសត្វព្រៃនៅទូទាំងខេត្ត ជាលទ្ធផល រកមិនឃើញមានបទល្មើសនោះទេ ពិសេសការចរាចរឈើពីខេត្តមណ្ឌលគិរី ទៅលក់នៅប្រទេសវៀតណាម។ លោកបានបញ្ជាក់ថា ក្រុមហ៊ុនដែលមានវត្តមាននៅក្នុងដីព្រៃសម្បទានសេដ្ឋកិច្ច ហាមដាច់ខាត មិនអនុញ្ញាតឱ្យដឹកជញ្ជូន ពីខាងក្រៅ ទៅប្រថាប់ត្រា ទៅជាឈើស្របច្បាប់នោះទេ ហើយប្រសិនបើស្រាវជ្រាវរកឃើញ នឹងបញ្ឈប់ក្រុមហ៊ុននោះភ្លាម។
លោកអភិបាលខេត្ត ក៏បានណែនាំដល់ក្រុមហ៊ុន ត្រូវធ្វើយ៉ាងណា អនុវត្តឱ្យបានត្រឹមត្រូវ តាមគោលការច្បាប់ និងចុះទប់ស្កាត់ការ កាប់ទន្ទ្រាន យកដីរដ្ឋធ្វើជាកម្មសិទ្ធិ ថែមទាំងបានជម្រុញដល់មន្ត្រីជំនាញ ត្រូវយកចិត្តទុកដាក់បន្ថែមទៀត ក្នុងការទប់ស្កាត់ និងបង្ក្រាបបទល្មើសនានា ជាពិសេស ត្រូវរាយការណ៍ជូនគណៈបញ្ជាការខេត្តឱ្យបានទាន់ពេលវេលា៕ ដោយ ៖ បញ្ញាស័ក្តិ
