នេះជាខណៈពេលមួយ ដែលយើងគ្រប់គ្នាបានឃើញហើយស្លុតរន្ធត់ជំនួសជាខ្លាំង នៅពេលដែលក្មេងប្រុសអាយុ ៣ ឆ្នាំ ម្នាក់ ត្រូវបានជាប់ក្នុងម៉ាស៊ីនបោកគក់ ដែលជាលទ្ធផលដោយសារតែការលេងសើចពីពូរបស់គេ នៅវេលាម៉ោង ១២ និង ៣០ ព្រឹកថ្ងៃទី២ ខែតុលា ឆ្នាំ២០១៨ ។
យោងតាមម្ចាស់ម៉ាស៊ីនបោកខោអាវតាមសាធារណៈ ដែលមានឈ្មោះ Hamal Hassan, ក្មេងតូចនោះបានទៅកន្លែងម៉ាស៊ីនបោកគក់ នៅក្នុង Buit Sentosa, ទីក្រុង Rawang ប្រទេសម៉ាឡេស៊ី ជាមួយឪពុកម្តាយ និងពូរបស់វា កាលពីយប់ថ្ងៃកើតហេតុខាងលើ ។
ប៉ូលីស Hulu Selangor លោក Lim Bak Phai ត្រូវបានដក់ស្រង់សម្តីដោយ Malay Mail ដោយនិយាយថា៖ «ស្ត្រីជាម្តាយអាយុ ២៥ ឆ្នាំ បាននាំកូនប្រុសអាយុ ៣ ឆ្នាំ របស់នាង ទៅកាន់កន្លែងបោកគក់មួយ នៅវេលាម៉ោង ១២ និង៣០ នាទីព្រឹក ដើម្បីឲ្យគេបោកគក់ខោអាវ» ។
ម្ចាស់កន្លែងបោកគក់រូបនេះ បានប្រាប់ NST ឲ្យដឹងថា៖ «ភ្លាមៗនោះ បុរសម្នាក់ដែលត្រូវជាពូ បានដាក់ក្មេងតូចម្នាក់ចូលក្នុងម៉ាស៊ីនបោកគក់ ហើយស្រាប់តែទ្វាររបស់វាត្រូវជាប់គាំង ពុំអាចបើកបានតែម្តង» ។
បានដឹងថា ម្តាយក្មេងប្រុសរងគ្រោះនោះ ពុំបានដឹងអំពីសកម្មភាពលេងសើចរបស់ប្អូនប្រុសរបស់នាងនោះទេ រហូតទាល់តែនាងបានដឹងកូនប្រុសត្រូវជាប់ខាងក្នុងម៉ាស៊ីនបោកគក់គួរឲ្យរន្ធត់យ៉ាងខ្លាំង ។
យោងតាម Bernama ទង្វើនាំឲ្យក្លាយជាទុក្ខនេះ គឺធ្វើឡើងក្នុងបំណងលេងសើចប៉ុណ្ណោះ ។
សំណាងហើយ ដែលបានបុរសជាច្រើនមកពីភោជនីយដ្ឋានក្បែរនោះ បាននាំជួយសង្គ្រោះក្មេងប្រុសតូចនេះចេញពីក្នុងម៉ាស៊ីនដោយសុវត្ថិភាព តាមរយៈការវាយបំបែកទ្វារកញ្ចក់ដោយញញួរ ៕
ដោយ៖ ចន្ទី
ប្រភព៖ thecoverage.my