តាកែវ៖ មន្ត្រីជំនាញកាំកុងត្រូលខេត្តតាកែវ បានធ្វើការអះអាងថា អាជីវករកាន់តែមានការយល់ដឹងច្រើន ពីសុវត្ថិភាពចំណីអាហារ ពោលគឺពួកគាត់ដាក់លក់ទំនិញ និងចំណីអាហារដែលមានគុណភាពល្អ ពិសេសគឺមិនដាក់សារធាតុគីមី ដែលនាំឲ្យប៉ះពាល់សុខភាពដល់អ្នកប្រើប្រាស់ ។
ថ្លែងនៅក្នុងឱកាសចុះត្រួតពិនិត្យទំនិញជាច្រើនមុខ និងធ្វើត្តេស៍បឋមទៅលើចំណីអាហារដែលដាក់តាំងលក់នៅក្នុងផ្សារសំរោងយ៉ោង នាព្រឹកថ្ងៃទី ០៣ តុលា ២០១៨នេះ លោក ប៉ោ លាងគង់ ប្រធានសាខាកាំកុងត្រូលខេត្តតាកែវ បានឲ្យដឹងថា ការយល់ដឹងកាន់តែច្រើន និងកាន់តែទូលំទូលាយពីសំណាក់បងប្អូនអាជីវករក្នុងការលក់ដូរចំណីអាហារដែលល្អស្អាត មិនមានសារធាតុគីមីនេះ គឺជាការចូលរួមចំណែកយ៉ាងសំខាន់ក្នុងការលើកកម្ពស់សុខមាលភាពសាធារណៈ ពិសេសសុខភាពរបស់ប្រជាពលរដ្ឋ ដែលជាអ្នកទិញទំនិញ និងចំណីអាហារទាំងនោះមកទទួលទានអាហារ មិនប៉ះពាល់ដល់សុខភាពរបស់ពួកគាត់ ។
លោក ប៉ោ លាងគង់ បន្ថែមថា ប្រការដែលអាជីវករមានការយល់ដឹងកាន់តែច្រើនពីសុវត្ថិភាពចំណីអាហារបែបនេះ គឺដោយមានការចុះអប់រំណែនាំពីមន្ត្រីជំនាញកាំកុងត្រូល ពីផលប៉ះពាល់សុខភាព ដែលបណ្តាលមកពីការដាក់សារធាតុគីមីលើចំណីអាហារនេះ ពិសេសគឺការភ្ញាក់រំលឹកពីសំណាក់អាជីវករនិងប្រជាពលរដ្ឋពួកគាត់មានការយល់ដឹង និងចេះមើលទំនិញណាដែលមានគុណភាព មានកាលបរិច្ឆេទប្រើប្រាស់ត្រឹមត្រូវ ។
លោកប្រធានសាខារូបនេះ បន្តទៀតថា ប្រភេទទំនិញដែលមន្ត្រីជំនាញបានពិនិត្យរកឃើញថាមានសារធាតុគីមីហាមឃាត់នោះ គឺភាគច្រើនទៅលើ សសៃគុយទាវបាញ់កាញ់ ប្រហុកសាច់ត្រីផ្ទក់ បង្អែមលតជាដើម ក៏ប៉ុន្តែចំណីអាហារទាំងនេះ គឺពុំមានសារធាតុគីមីតទៅទៀតឡើយ ដោយសារតែអាជីវករ មានការយល់ដឹងច្រើន និងនាំគ្នាឈប់ផលិតចំណីអាហារដែលដាក់សារធាតុគីមី លក់នៅលើទីផ្សារ ។
បើតាមលោក ប៉ោ លាងគង់ បើទោះបីជាមានការយល់ដឹងកាន់តែច្រើនអំពីសុវត្ថិភាពចំណីអាហារ ពីសំណាក់ក្រុមអាជីវករយ៉ាងណាក៏ដោយ ក៏មន្ត្រីជំនាញកាំកុងត្រូល នៅតែបន្តចុះត្រួតពិនិត្យទំនិញ និងចំណីអាហារនៅតាមទីផ្សារនានាក្នុងខេត្តតាកែវនេះដដែល គឺចុះពិនិត្យឲ្យដូចភ្លៀងរលឹម ដើម្បីធានាបាននូវទីផ្សារមួយដែលមានតែទំនិញល្អ អនាម័យត្រឹមត្រូវ និងមិនមានសារធាតុគីមីដាក់លើចំណីអាហារ ៕ តាកែវ