ប៉ូលិសបានចាប់ខ្លួនមនុស្សរាប់សិបនាក់ដែលបានដើរប្រមូលរបស់របរ នៅតំបន់ទើបរងទទួលឥទ្ធិពលពីគ្រោះធម្មជាតិនាទីក្រុងPalu ។
វរសេនីយ៍ឯក Dewa Agung Hadisaputra បាននិយាយពីម្សិលមិញនេះថា «ប្រសិនបើស្ថានការណ៍នេះបង្កើតមានទៀត យើងខ្ញុំនឹងបាញ់គ្រាប់ដំបូងដើម្បីព្រមាន រួចបន្ទាប់មកនឹងបាញ់សំដៅលើពួកគេកុំឱ្យធ្វើចលនាបាន ព្រោះថាតាំងពីពេលដំបូង ពួកគេបានសម្រុកប្រមូលទំនិញ សាំងនិងទឹក។ បណ្ដាហាងលក់ទំនិញបានបិទទ្វារ ។ ស្ថានភាពចាប់បង្ខំឱ្យពួកគេធ្វើបែបនេះ។យើងខ្ញុំអាចធ្វើមិនដឹងមិនឮនៅប៉ុន្មានថ្ងៃដំបូង ព្រោះតែពួកគេត្រូវការរបស់ទាំងនោះ។ ប៉ុន្តែឈានដល់ថ្ងៃទីបីក្រោយគ្រោះមហន្តរាយ ពួកគេចាប់ផ្តើមប្រមូលយកទាំងបរិក្ខារអេឡិចត្រូនិក»។
វរសេនីយ៍ឯករូបនេះឱ្យដឹងថា រថយន្តដឹកជញ្ជូនទំនិញសង្គ្រោះពេលនេះនឹងត្រូវបានការពារដោយទាហាន៥នាក់។
ការរញ្ជួយដីកម្រិត៧,៥ Richter កាលពីថ្ងៃ២៨ខែកញ្ញា បានបង្កជារលកស៊ូណាមិកម្ពស់ដល់ទៅ៦ម៉ែត្រ ដោយបានទាញយកទៅតាមទាំងផ្ទះសម្បែង សំណង់នានានៅ Paluនិង Donggala ។សមត្ថកិច្ចឱ្យដឹងនៅថ្ងៃទី៣តុលាថាគេបានរកឃើញសាកសពមនុស្ស១៤០៧នាក់ ហើយបើតាមការិយាល័យមនុស្សធម៌របស់អង្គការសហប្រជាជាតិឱ្យដឹងថា មានមនុស្សជិត២០០.០០០នាក់ចាំបាច់ត្រូវទទួលការសង្គ្រោះជាបន្ទាន់ ព្រោះក្នុងនោះមានក្មេងរាប់ពាន់នាក់៕
លីសា
