ស្ត្រីម្នាក់រស់នៅភាគខាងកើតនៃប្រទេសចិន ត្រូវបានចាប់ខ្លួនដោយចោទប្រកាន់តាមច្បាប់រដ្ឋបាល បន្ទាប់បើករថយន្តហោះរហូតដល់ចម្ងាយ ១៣ គីឡូម៉ែត្រ ដោយនាំយកជាមួយកម្មករអនាម័យតាមផ្លូវសាធារណៈម្នាក់ ដែលបានតោងផ្អោបជាប់នៅលើក្បាលរថយន្តរបស់នាង ។
កំហឹងរបស់កម្មករអនាម័យនោះ បានចាប់ផ្តើមស្ថិតនៅលើបរិវេណនៃសកលវិទ្យាល័យមួយកន្លែង នៅក្នុងទីក្រុង Wuhan ខេត្ត Hubei កាលពីថ្ងៃទី២៩ ខែកញ្ញា ឆ្នាំ២០១៨ ។
The Paper រាយការណ៍ឲ្យដឹងថា ស្ត្រីម្នាក់ដែលកំពុងបើករថយន្ត Skoda ពណ៌ស១គ្រឿង ចៃដន្យ បានបើកកិនអំបោករបស់កម្មករអនាម័យនោះ ខណៈគាត់កំពុងបោសសម្អាត ។
ការឈ្លះប្រកែកគ្នាបានកើតឡើង និងឈានដល់រឿងដែលយើងគ្រប់គ្នា បានឃើញក្នុងវីដេអូកំពុងរីករាលដាលដល់ឥឡូវនេះដ៏ពុំនឹកស្មានដល់ ដែលបង្ហាញឲ្យឃើញអ្នកបោសសំរាមនោះ តោងផ្អោបនឹងក្បាលរថយន្តរបស់ស្ត្រីនោះ ខណៈនាងបើកចាកចេញរហូតដល់ចម្ងាយ ១៣ គីឡូម៉ែត្រ ។
ស្ត្រីនោះត្រូវបានដឹងថាមានឈ្មោះ Li នៅទីបំផុត បានធ្វើដំណើរឆ្ពោះទៅកាន់ប៉ុស្តិ៍ប៉ូលីសមួយកន្លែង ស្ថិតនៅក្នុងស្រុក Hanyang នៃទីក្រុង Wuhan ។
ផ្អែកតាមបទល្មើសរំលោភលើមាត្រាទី៤២ នៃច្បាប់សន្តិសុខសាធារណៈរបស់ចិន នាង Li ត្រូវបានបង្គាប់ឲ្យបង់ប្រាក់ពិន័យ ៥០០ យ៉ន់ (៧៣ ដុល្លារ) និងស្ថិតក្នុងមន្ទីរឃុំឃាំងរយៈពេល ១០ ថ្ងៃ ។ នេះបើយោងតាមការចុះផ្សាយរបស់កាសែត Chutian Metropolis Daily ។
ជាមួយគ្នានេះផងដែរ អ្នកលេងអ៊ីនធើរណែតជាច្រើន ក៏បានបញ្ចេញប្រតិកម្មផ្សេងៗគ្នាយ៉ាងដូច្នេះថា៖
- «ចម្ងាយរហូតដល់ជាង ១០ គីឡូម៉ែត្រ មែនទេ? វ៉ាវ!!»
- «ករណីបែបនេះ តើវាពុំស្ថិតក្នុងបទព្រហ្មទណ្ឌដែរ ឬ យ៉ាងណា?»
- «មិនមែនជាការសម្លាប់ដោយចេតនាផង ម្ចាស់ថ្លៃ ឃុំខ្លួន ១០ ថ្ងៃ?»
- «ខ្ញុំគិតថា អ្នកទាំងពីរនេះ គឺជាមនុស្សរឹងរូសដូចគ្នាហ្មង»
- «ចំពោះខ្ញុំផ្ទាល់វិញ ខ្ញុំគិតថា អ្នកអនាម័យនោះគួរតែត្រូវបានដាក់ទណ្ឌកម្មដែរ ព្រោះបានកាន់កាប់ទ្រព្យសម្បត្តិរបស់អ្នកដទៃ»
ចុះប្រិយមិត្ត CEN វិញ យល់ឃើញយ៉ាងណាដែរ?
ដោយ៖ ចន្ទី
ប្រភព៖ nextshark