ភ្នំពេញ ៖ អាជ្ញាធររាជធានី នឹងធ្វើការកែសម្រួលស្ពានបេតុង អមជាមួយស្ពានបាឡេ ឆ្លងកាត់ទន្លេសាបខណ្ឌឫស្សីកែវ ដើម្បីបញ្ជៀសឲ្យបាននូវការកកស្ទះចរាចរ ខណៈដែលស្ពានបាឡេឆ្លងកាត់ទន្លេសាបនេះ បាននិងកំពុងប្រឈម និងការកកស្ទះចរាចររាល់ថ្ងៃ។
ដើម្បីបញ្ចៀសការកកស្ទះចរាចរ ក្នុងភូមិសាស្ត្រខណ្ឌឫស្សីកែវ និងតាមបណ្ដោយផ្លូវជាតិលេខ៥ ឆ្លងកាត់ទន្លេសាបឆ្កោះទៅតំបន់អភិវឌ្ឍជ្រោយចង្វា ខណ្ឌជ្រោយចង្វា នារសៀលថ្ងៃពុធ ទី៣ ខែតុលា ឆ្នាំ២០១៨នេះ លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញជាអធិបតី ក្នុងអង្គប្រជុំពិភាក្សា លើសំណើសុំធ្វើការកែសម្រួល ប្លង់ស្ពានបេតុងឫស្សីកែវ ឆ្លងកាត់ទន្លេសាប ស្ថិតនៅសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
មន្ត្រីជំនាញ ក្រុមហ៊ុនOCIC បានឲ្យដឹងថា ក្រោយពីបើកអោយធ្វើចរាចរលើស្ពានបាឡេ ឆ្លងកាត់ទន្លេសាបខណ្ឌឫស្សីកែវ ឃើញថា ចរាចរនៅលើស្ពានការកកស្ទះចរាចររាល់ថ្ងៃ ។ ដោយមើលឃើញពីបញ្ហាប្រឈមនេះទើប ក្រុមហ៊ុន និងរដ្ឋបាលរាជធានីភ្នំពេញ បានសម្រេចសិក្សាកែសម្រួលឡើងវិញ ពោលគឺនឹងស្ថាបនា គិតគូរឲ្យបានគ្រប់ជ្រុងជ្រោយ ដូចការសាងសង់ស្ពានអាកាសស្ទឹងមានជ័យ ដូច្នេះដែរ។
ចំពោះការកែសម្រួលស្ពានបេតុង អមជាមួយស្ពានបាឡេឆ្លងទន្លេសាបឫស្សីកែវ លោកឃួង ស្រេង អភិបាលរាជធានីភ្នំពេញ បានឯកភាពទាំងស្រុងហើយ ប៉ុន្តែ លោកអភិបាល បានជម្រុញឲ្យក្រុមហ៊ុន និងមន្ទីរសាធារណការ និងដឹកជញ្ជូន រាជធានីភ្នំពេញ ធ្វើការសិក្សាបន្ថែម ចំពោះផលប៉ះពាល់ ក្រោយពីមានការឯកភាពហើយនោះ ការដ្ឋានសាងសង់ស្ពាន លើការសម្រួលថ្មីនេះ នឹងចាប់ផ្តើមតែម្តង។
គួររំលឹកផងដែរថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កាលពីព្រឹកថ្ងៃទី២៣ ខែតុលា ឆ្នាំ២០១៧កន្លងមកនេះ បានអញ្ជើញបើកការដ្ឋានសាងសង់ ស្ពានបេតុងមួយខ្សែ ស្របជាមួយស្ពានបាឡេនេះ។
ចំពោះ ស្ពានបេតុងដែលគ្រោងស្ថាបនា នៅអមជាមួយស្ពានបាឡេនេះ មានប្រវែង៩២២ម៉ែត្រ ទទឹង២០,៥ម៉ែត្រ។ ចិញ្ចើមស្ពានសម្រាប់ថ្មើរជើង មានទទឹង១,២៥ម៉ែត្រសងខាង, កម្ពស់សសរស្ពានសម្រាប់ព្យួរខ្សែកាប ធៀបនឹងកម្រាលស្ពាន៣៤ម៉ែត្រ សសរសម្រាប់ព្យួរខ្សែកាប មានសសរចំនួន៤, គន្លងខ្សែយានយន្តទទឹង៣,៧៥ម៉ែត្រ, គន្លងធ្វើចរាចរ២ខ្សែទៅ២ខ្សែមក, កម្ពស់នាវាចរក្រោមស្ពានអតិបរមា នៅរដូវវស្សា១០,៥ម៉ែត្រ, កម្ពស់នាវាចរក្រោមស្ពានអប្បរមា នៅរដូវប្រាំង២០,៥ម៉ែត្រ បំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរផងដែរ។
ស្ពាននេះ មានតួនាទីសំខាន់ក្នុងការរួមចំណែករំដោះចរាចរលើផ្លូវជាតិលេខ៦ និងផ្លូវជាតិលេខ៥ ក៏ដូចជាច្រកចេញចូលរាជធានីភ្នំពេញ និងជាសមិទ្ធផលថ្មីមួយទៀត ជាចំណងដៃសម្រាប់រាជធានីភ្នំពេញ និងប្រជាពលរដ្ឋដែលបានឆ្លងកាត់ស្ពាន ក៏ដូចបង្កើនសរសៃឈាមសេដ្ឋកិច្ច តភ្ជាប់ពីបណ្តាខេត្ត មករាជធានីភ្នំពេញ និងពីរាជធានីភ្នំពេញ ទៅតាមបណ្តាខេត្ត ៕ ដោយ ៖ កូឡាប