អានចប់អត្ថបទនេះធ្វើឲ្យយើងកណ្តោចកណ្តែងអារម្មណ៍ក្នុងចិត្តពេលនឹកគិតដល់គ្រូពេទ្យមួយចំនួន និងវិស័យសុខាភិបាលនៅស្រុកយើង ។
កូនខ្លាឃ្មុំសំឡី ក៏ត្រូវបានវះកាត់ដូចម្ចាស់ដែរ ។
ក្មេងប្រុស Jackson Mckie អាយុ ៨ឆ្នាំ ជាម្ចាស់នៃកូនខ្លាឃ្មុំសំឡីនេះថា មានបញ្ហាឈឺខួរក្បាល ត្រូវរងការវះកាត់ច្រើនដងនៅមន្ទីរសុខាភិបាល FWK នា Halifax, Nova Scotia ប្រទេសកាណាដា ។
ជំងឺរបស់វាទាមទារឲ្យមានការវះកាត់តាំពីនៅតូច ហើយវេជ្ជបណ្ឌិត McNeely គឺជាអ្នកវះកាត់វានៅគ្រាដំបូង និងលើកបន្តបន្ទាប់មក ។
ថ្មីៗនេះពេលត្រៀមធ្វើការវះកាត់ ស្រាប់តែក្មេងប្រុសវ័យ ៨ឆ្នាំរូបនេះ បានសួរគាត់ថា តើអាចជួយវះកាត់ “ជួសជុល” ឲ្យកូនខ្លាឃ្មុំវាបានដែរឬទេ? វេជ្ជបណ្ឌិត McNeely ឆ្លើយភ្លាមៗថា “បានៗ!” ព្រោះលោកដឹងថា Little baby -ឈ្មោះដែលក្មេងប្រុសនេះដាក់ឲ្យកូនខ្លាឃ្មុំរបស់វា គឺជាមិត្តស្និទ្ធស្នាលបំផុត តែងនៅក្បែរអ្នកជំងឺតូចរបស់ខ្លួន ។ គ្រាន់តែទទួលពាក្យភ្លាម គាត់ក៏រៀបចំ “វះកាត់តាមសំណូមពរ” ហើយបង្ហោះលើ Twitter ថា ៖ “អ្នកជំងឺខ្ញុំពឹងខ្ញុំឲ្យជួយជួសជុលកូនខ្លាឃ្មុំ Teddy មុនពេលចាក់ថ្នាំសណ្តំឲ្យខ្លួន… តើខ្ញុំអាចបដិសេធបានទេ?!” ។
អ្វីៗគឺធ្វើដូចមែនទែនទាំងអស់ ព្រោះគាត់យល់ថា បែបនេះវាជួយឲ្យអ្នកជំងឺរបស់គាត់រីករាយ ធូរស្រាលអារម្មណ៍ ។
ក្មេងប្រុស Jackson រងជំងឺទឹកខួរក្បាលហូរចេញ ដែលទាមទារវេជ្ជបណ្ឌិតត្រូវប្រើបំពង់តូចមួយដើម្បីប៊ូមយកទឹកទាំងនោះ ដើម្បីកាត់បន្ថយសម្ពាធលើខួរក្បាល ។
ពេលនេះ Jackson កំពុងធូរស្រាល ហើយមិត្តភ័ក្តិរបស់វា -កូនខ្លាឃ្មុំរបស់វាក៏នៅសម្រាកថែទាំមុខរបួសក្បែរវាដែរ ។
ដើម្បីអ្នកជំងឺ សូម្បីរឿងតូចមួយក៏ពេទ្យស្រុកគេពុំអែរអង់ នឹងតម្រូវចិត្ត សំខាន់ឲ្យតែអ្នកជំងឺឆាប់ជាសះស្បើយប៉ុណ្ណោះ ៕ លីសា