តាមសារព័ត៌មាន The Hindu, នៅយប់ថ្ងៃទី៤តុលា ប្រធានាធិបតីរុស្ស៊ី Vladimir Putin បានទៅដល់ក្រុង New Delhi ដើម្បីចូលរួមសន្និសីទកំពូលប្រចាំឆ្នាំលើកទី១៩ រុស្ស៊ី-ឥណ្ឌា ហើយមេដឹកនាំកំពូលទាំងពីរអាចជាអធិបតីក្នុងពិធីចុះហត្ថលេខាលើបណ្ដាកិច្ចព្រមព្រៀង យោធាដែលមានតម្លៃជិត១០.០០០លាន USD។
តាមមជ្ឈដ្ឋានអ្នកជំនាញការលើកឡើងថា ដំណើរទស្សនកិច្ចអូសបន្លាយត្រឹមតែ២៤ម៉ោងនេះ អាចបង្កជាឥទ្ធិពលយូរអង្វែងចំពោះចំណងទាក់ទងរវាងឥណ្ឌានិងរុស្ស៊ី។
ក្នុងថ្ងៃទី៥ ខែតុលា ឥណ្ឌានិងរុស្ស៊ី មានគម្រោងចុះហត្ថលេខាលើកិច្ចព្រមព្រៀងយោធាធំចំនួន៣គឺ៖ ប្រព័ន្ធកាំជ្រួច S-400 ចំនួន៥ មានតម្លៃជាង៥០០០លានUSD នាវាពិឃាតបំបាំងកាយ៤ និងកិច្ចព្រមព្រៀងមួយអំពីអាវុធAk-103 ដែលនឹងផលិតនៅឥណ្ឌា។
ក្រៅពីនោះ មេដឹកនាំទាំងពីរមានគម្រោងនឹងធ្វើជាអធិបតីក្នុងការចុះហត្ថលេខាលើកិច្ចព្រមព្រៀងយ៉ាងតិចចំនួន២៣ អំពីការវិនិយោគសហប្រតិបតិ្តការអវកាស ដឹកជញ្ជូននិងពាណិជ្ជកម្ម។
ភាគីទាំងពីរក៏នឹងពិភាក្សាអំពីកិច្ចសហប្រតិបត្តិការក្នុងវិស័យអគ្គិសនីនុយក្លែអ៊ែរ ហើយអាចរួមនឹងបញ្ហាអាហ្វហ្កានីស្ថានផង៕
សូយន
