ខេត្តព្រះសីហនុ៖ សមត្ថកិច្ចនគរបាល នៃស្នងការដ្ឋានខេត្តព្រះសីហនុ បានឲ្យដឹងថា កម្លាំងនគរបាលបង្ក្រាបគ្រឿងញៀន បានបន្ត សកម្មភាពចុះបង្ក្រាបបទល្មើសជួញដូរគ្រឿងញៀន មានលទ្ធផលវិជ្ជមានជាបន្តបន្ទាប់។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទបានឲ្យដឹងថា នៅរសៀលថ្ងៃទី៤ ខែតុលា ឆ្នាំ២០១៨នេះ កម្លាំង អធិការដ្ឋាននគរបាលស្រុកព្រៃនប់បានចុះបង្ក្រាប បានបទល្មើសគ្រឿងញៀនមួយករណី ដោយឃាត់ខ្លួនបានជនសង្ស័យម្នាក់។
បទល្មើសនេះ កើតឡើងនៅចំណុចផ្ទះជួល ខាងក្រោយវត្តបិតត្រាំង ស្ថិតនៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ។
យុទ្ធនាការនេះ សមត្ថកិច្ចបានឃាត់ខ្លួនជនសង្ស័យបានម្នាក់ឈ្មោះ ជន រ៉ូ ភេទប្រុស អាយុ ២៤ឆ្នាំ មានទីលំនៅ កន្លែងចាប់ខ្លួនខាង លើ ។ ជនសង្ស័យរូបនេះ មិនមានមុខរបរពិតប្រាកដនោះទេ។
ការឃាត់ខ្លួននេះ សមត្ថកិច្ច បានដកហូតវត្ថុតាងមួយចំនួនពីជនសង្ស័យរួមមាន៖ ម្សៅក្រាមពណ៌សថ្លា សង្ស័យជាសារធាតុញៀនចំនួន ៩កញ្ចប់ (៦កញ្ចប់ធំ និង ៣កញ្ចប់តូច) និងទូរស័ព្ទដៃ៣គ្រឿង។
សមត្ថកិច្ចនគរបាលបានឲ្យដឹងថា បទល្មើសខាងលើនេះ កម្លាំងនគរបាលជំនាញ កំពុងស្រាវជ្រាវ និងឈានដល់បន្តនីតិវិធី ទៅកាន់សាលាដំបូងខេត្តព្រះសីហនុ៕ ដែន សីមា