ខេត្តព្រះសីហនុ ៖ ក្រសួងទេសចរណ៍បានរៀបចំធ្វើសិក្ខាពិគ្រោះយោបល់ជាមួយមន្ត្រីស្ថាប័នពាក់ព័ន្ធ និងអាជ្ញាធររដ្ឋបាលខេត្តតំបន់ឆ្នេរសមុទ្រ ទាំងអស់ កាលពីរសៀលថ្ងៃទី៤ ខែតុលា ឆ្នាំ២០១៨ នៅក្រុងព្រះសីហនុ។ កិច្ចប្រជុំនេះ ដើម្បីរៀបចំជាផែនការមេ ក្នុងការ អភិវឌ្ឍន៍រមណីយដ្ឋានឆ្នេរអូរត្រេះ ក្នុងខេត្តព្រះសីហនុ និងឆ្នេរប៉ាក់ខ្លង ក្នុងខេត្តកោះកុង ព្រមទាំងពិនិត្យលទ្ធផលបឋម នៃការ វាយ តម្លៃឆ្នេរបេក្ខភាពចលនាប្រឡងប្រណាំងឆ្នេរខ្សាច់កំសាន្តស្អាត លើកទី១ ឆ្នាំ២០១៨ របស់ព្រះរាជាណាចក្រកម្ពុជា។
នាឱកាសនោះ លោក ប៉ាក់ សុខុម រដ្ឋលេខាធិការក្រសួងទេសចរណ៍ ដែលអញ្ជើញជាអធិបតី ក្នុងពិធីនេះមានប្រសាសន៍ថា ដើម្បីឆ្លើយតបទៅនឹងគោលដៅអភិវឌ្ឍន៍វិស័យទេសចរណ៍ នៅព្រះរាជាណាចក្រកម្ពុជា ក្រៅពីគម្រោងអភិវឌ្ឍន៍វិស័យទេសចរណ៍នៅ តាមបណ្តាខេត្ត- រាជធានី ក្រសួងទេសចរណ៍ ក៏បានចងក្រង នូវឯកសារសម្រាប់អភិវឌ្ឍន៍តំបន់ឆ្នេរសមុទ្រ បន្ថែមពីលើសក្តានុពលធម្មជាតិ ដែលមានស្រាប់ ក្នុងគោលបំណងទទួល ភ្ញៀវទេសចរណ៍នៅជុំវិញពិភពលោក ដែលចូលមកទស្សនា ព្រះរាជាណាចក្រកម្ពុជា។
ចំណែក ចំពោះចលនាប្រឡងប្រណាំងឆ្នេរខ្សាច់កំសាន្តស្អាត លើកទី១ ឆ្នាំ២០១៨ លោករដ្ឋលេខាធិការក្រសួងទេសចរណ៍ បានជម្រុញអោយរដ្ឋបាលខេត្តតំបន់ឆ្នេរទាំង៤ រួមមាន៖ ខេត្តព្រះសីហនុ ខេត្តកំពត ខេត្តកែប និងខេត្តកោះកុង ត្រូវរៀបចំយន្តការនានាក្នុងការថែរក្សាបរិស្ថានឆ្នេរសមុទ្រ និងរៀបចំបន្ថែម នូវប្រព័ន្ធសន្តិសុខសុវត្ថិភាព និងសោភណ្ឌភាព ដើម្បីទទួលយកជ័យលាភី ក្នុងចលនាប្រឡងប្រណាំងឆ្នេរកំសាន្តស្អាត សម្រាប់ទាក់ទាញអ្នកទេសចរណ៍នៅជុំវិញពិភពលោក អោយចូលមកលេងកំសាន្តឆ្នេរ សមុទ្រ របស់ប្រទេសកម្ពុជាឲ្យបានច្រើនថែមទៀត៕ ដែន សីមា
