បុគ្គលិកម្នាក់របស់ភោជនីដ្ឋាន Dunkin’ Dunut ត្រូវបានបណ្តេញចេញពីការងារ ដោយសារតែយកទឹកចាក់លើបុរសគ្មានផ្ទះសម្បែងម្នាក់ដែលមកសង្ងំសម្រាកនៅក្នុងហាង។
បន្ទាប់ពីចាក់ទឹកលើបុរសអនាថា បុគ្គលិកបានស្តីបន្ទោសថា “តើខ្ញុំប្រាប់អ្នកប៉ុន្មានដងហើយឲ្យឈប់ដេកនៅទីនេះ? អ្នកមកទីនេះគ្រប់ពេលតែម្តង អ្នកទំនេរណាស់”។
ចំណែកបុរសនោះបានឆ្លើយតបវិញថា “គាត់ដេកលក់ដោយចៃដន្យប៉ុណ្ណោះ ប៉ុន្តែខាងបុគ្គលិកនិយាយថា វាមិនមែនចៃដន្យអីនោះទេ។ ខ្ញុំមិនលេងច្រើនជាមួយអ្នកទេ”។
បុរសដែលត្រូវគេចាក់ទឹកពីលើនោះ ត្រូវបានប៉ូលីសបញ្ជាក់ប្រាប់ឈ្មោះថា Jeremy Dufrense ហើយគាត់បាននិយាយប្រាប់ថា គាត់ចូលមកក្នុងហាងដើម្បីសាកថ្មទូរស័ព្ទ ដើម្បីតេទៅកាន់ម្តាយគាត់។
គាត់និយាយថា គាត់គ្រាន់តែឱនក្បាលចុះដាក់លើតុប៉ុណ្ណោះ។ នៅពេលបុគ្គលិកចាក់ទឹកលើគាត់ ក៏មានបុគ្គលិកផ្សេងទៀតដែរសើច ចំពោះសកម្មភាពធ្វើបាបអ្នកដទៃនេះ។
អាកប្បកិរិយាមិនល្អរបស់បុគ្គលិកហាង Dunkin’ Donut បានធ្វើឲ្យមានការខឹងសម្បារយ៉ាងខ្លាំង ពីអ្នកប្រើប្រាស់បណ្តាញសង្គមហ្វេប៊ុក។ ដោយមានអ្នកខ្លះ បានធ្វើការបញ្ចេញមតិថា ហាងនោះគួរជ្រើសរើសគាត់ ដើម្បីឲ្យធ្វើការជំនួសបុគ្គលិកដែលត្រូវហាងដេញចេញ ហើយការបញ្ចេញមតិនេះ មានការគាំទ្រយ៉ាងច្រើន។
បុរសដែលបង្ហោះវីដេអូនេះ ក៏បានធ្វើយុទ្ធនាការ GoFundMe ដើម្បីជួយដល់បុរសអនាថា ឈ្មោះ Jeremy Dufrense ផងដែរ ហើយមូនិធិនោះ រៃអង្គាសបានប្រាក់ចំនួន ១៨.០០០ដុល្លារ ហូតមកដល់ពេលនេះ៕ សុភ័ក្ត្រ
ប្រភព៖ NowThis Politics