កាលពីថ្ងៃទី២ ខែតុលា កន្លងទៅថ្មីៗនេះ មនុស្សនៅជុំវិញពិភពលោក បានស្លុតចិត្តយ៉ាងខ្លាំង នៅពេលទទួលបានព័ត៌មានអំពីករណីដ៏ឃោរឃៅមួយ ពាក់ព័ន្ធនឹងក្មេងស្រីអាយុ ១៥ ឆ្នាំ ម្នាក់ ដែលត្រូវបានសម្លាប់ដោយក្មេងស្ទាវ១ក្រុម ដែលព្យាយាមរំលោភនាង ។
យោងតាម The Times of India ក្មេងស្រីឈ្មោះ Suvita Yadav អាយុ ១៥ ឆ្នាំ មកពី Uttar Pradesh ខណៈកំពុងធ្វើដំណើរទៅផ្ទះរបស់នាងពីសាលារៀន បន្ទាប់ពីចូលរួមប្រារព្ធកម្មវិធីប្រចាំឆ្នាំមួយ នៅពេលនោះស្រាប់តែមានក្មេងស្ទាវ ៣ នាក់ បានចាប់ផ្តើមដេញតាម និងព្យាយាមរំលោភនាងតែម្តង ។ ពួកវាបន្ទាប់មក បានចាប់នាងព្យួរទៅនឹងដើមឈើមួយ ដោយប្រើក្រម៉ាដែលនាងកំពុងបង់ក បន្ទាប់ពីនាងព្យាយាមតតាំងជំនះការព្យាយាមរំលោភរបស់ពួកវា ។
Suvita ត្រូវបានដឹងថា បានធ្វើដំណើរជិតដល់ផ្ទះរបស់នាងទៅហើយ នៅពេលដែលហេតុការណ៍នេះបានកើតឡើង ហើយបងប្រុសរបស់នាងដែលកំពុងស្ថិតនៅក្នុងចម្ការគ្រួសាររបស់ពួកគេ ក៏បានលឺសម្លេងស្រែកខ្លាំងៗរបស់ប្អូនស្រី ។ គាត់ភ្លាមៗនោះក៏បានប្រញាប់ប្រញាល់រត់ទៅជួយសង្គ្រោះ ។
នៅឃើញប្អូនស្រីកំពុងត្រូវព្យួរនឹងដើមឈើ គាត់ក៏បានប្រញាប់ទៅជួយដាក់នាងចុះ ប៉ុន្តែ ស្ទាវៗទាំង៣នោះ បានរារាំងគាត់មិនឲ្យចូលជិតនាងទេ ហើយពួកវាក៏បានវាយធ្វើបាបគាត់ថែមទៀតផងដែរ ។ ហើយដោយសារតែពុំអាចតស៊ូនឹងការចងព្យួរនេះតទៅទៀតបាន នាងក៏បានដាច់ខ្យល់ស្លាប់គួរឲ្យអាសូរបំផុត ។
បើតាមរបាយការណ៍ពី The Sun បានឲ្យដឹងថា ក្មេងស្ទាវទាំងនោះទីបំផុត ត្រូវបានអ្នកភូមិចាប់បានខ្លួន និងប្រគល់ឲ្យប៉ូលីសចាត់ការតាមផ្លូវច្បាប់ ។ ទន្ទឹមនោះផងដែរ ក្រោយការពិនិត្យសាកសព ក្មេងស្រីរងគ្រោះត្រូវបានរកឃើញថាពុំទទួលការរំលោភសេពសន្ថវៈនោះទេ ។
ទោះយ៉ាងណា ករណីនេះកំពុងស្ថិតក្រោមការស៊ើបអង្កេតរបស់អាជ្ញាធរ ខណៈគ្រួសារជនរងគ្រោះ កំពុងទាមទារឲ្យច្បាប់ផ្តល់នូវភាពយុត្តិធម៌ សម្រាប់កូនស្រីរបស់ពួកគេផង ហើយពួកគេក៏សង្ឃឹមថា ការស៊ើបអង្កេតរបស់ប៉ូលីសនឹងត្រូវបានអនុវត្តដោយភាពយុត្តិធម៌ ៕
ដោយ៖ ចន្ទី
ប្រភព៖ Worldofbuzz