មនុស្សម្នាមកពីភូមិមួយ នៅក្នុង Bageshwar, Uttarkhand ប្រទេសឥណ្ឌា បានប្រទះឃើញខ្លាដំបងរងរបួស១ក្បាល កំពុងដេកនៅមាត់ច្រាំងនៃទន្លេក្នុងតំបន់មួយ កាលពីថ្ងៃទី៣ ខែតុលា ឆ្នាំ២០១៨ ។
ពួកអ្នកភូមិទាំងនោះបានផ្តល់ព័ត៌មាននេះទៅបុគ្គលិកសត្វព្រៃក្នុងតំបន់ ហើយពួកគេក៏បានមកដល់កន្លែងកើតហេតុ ដោយស្នើសុំជំនួយពីអ្នកភូមិផងដែរ ដើម្បីសង្ក្រោះសត្វខ្លាដំបូងមានរបួសនោះ ។
តាមរយៈវីដេអូ ក្រុមបុរសៗវ័យចំណាស់ៗ ត្រូវបានឃើញកំពុងព្យាយាមចងសត្វខ្លានោះ ដោយប្រើខ្សែពួរ ។ នៅពេលបុរសពីរបីនាក់ព្យាយាមគ្រប់គ្រងសង្កត់វាដោយប្រើឈើ ។ អ្នកភូមិម្នាក់ឈ្មោះ Jagdish Singh អាយុ ៥០ ឆ្នាំ ក៏បានចូលចងជើងវាជាចុងក្រោយ ។
ប៉ុន្តែ ខ្លារងរបួសដែលនៅតែមានកម្លាំងកំហែងនេះ បានគ្រប់គ្រងរើបម្រស់ខ្លួនរួច និងខាំត្របាក់ដៃរបស់គាត់តែម្តង ។ Singh បានបាត់បង់លំនឹង និងបានដួលទៅនឹងវា បណ្តាលឲ្យវាវាយប្រហារគាត់យ៉ាងសាហាវ ។
ភ្លាមៗនោះ អ្នកភូមិដទៃទៀត ក៏បានគ្រប់គ្រងទាញ Singh ចេញពីចង្កូមរបស់ខ្លា និងប្រញាប់ប្រញាល់នាំយកគាត់ទៅកាន់មន្ទីរពេទ្យ ទីកន្លែងគាត់ត្រូវបានដេរភ្ជាប់មុខរបួសដាច់រហែកសាច់ដ៏ធំ ។
Singh បាននិយាយថា៖ «ខ្ញុំទៅចូលរួមសង្គ្រោះសត្វខ្លាដំបូងរងរបួស១ក្បាល ជាមួយបុគ្គលិកសត្វព្រៃ ប៉ុន្តែ សំណាងអាក្រក់ ខ្ញុំក៏ត្រូវសត្វខ្លានោះខាំដៃ និងជើង ឲ្យរងរបួសដាច់យ៉ាងធ្ងន់ធ្ងរបែបនេះ» ។
អ្នកភូមិម្នាក់និយាយថា ការព្យាយាមសង្គ្រោះនោះ គឺធ្វើឡើងដោយការស្ម័គ្រចិត្តប៉ុណ្ណោះ ។ គាត់បន្ថែមថា «ពួកមន្ត្រីគួរណាស់តែប្រើវិធីធ្វើឲ្យសត្វនេះសន្លប់ មុនពេលស្នើឲ្យពួកគេចូលទៅចាប់ចងវា» ។
ទោះយ៉ាងណា ក្រោយកើតមានកំហុសឆ្គងនាំឲ្យកើតមានគ្រោះថ្នាក់បែបនេះក៏ដោយ នៅទីបំផុត ក្រុមមន្ត្រីសត្វព្រៃក៏បានគ្រប់គ្រងចាប់ចង និងនាំយកវាចាកចេញពីទីនោះផងដែរ ៕
ដោយ៖ ឧត្តម
ប្រភព៖ DailyMail
