ភ្នំពេញ ៖ ស្ថានទូតជប៉ុននៅកម្ពុជា បានប្រកាសថា ជប៉ុនផ្តល់ថវិកាចំនួន១.៨៩៤.២២៨ ដុល្លារអាមេរិក សម្រាប់គម្រោងកសិកម្មចំនួន២ និងគម្រោងដោះមីនចំនួន១។
នៅថ្ងៃទី៤ ខែតុលា រដ្ឋាភិបាលជប៉ុន បានឯកភាពផ្តល់ថវិកាសរុបចំនួន១.៨៩៤.២២៨ដុល្លារអាមេរិក ដល់អង្គការចំនួនបីក្រោមគ្រោងការណ៍ជំនួយឧបត្ថម្ភ ឥតសំណងសម្រាប់គម្រោងរបស់អង្គការក្រៅរដ្ឋាភិបាលជប៉ុន: ផ្តល់ ៤០២.៣៥៨ដុល្លារអាមេរិកដល់អង្គការ IVY ដើម្បីអនុវត្តលើ “ការគាំទ្រដល់កសិករខ្នាតតូច តាមរយៈធ្វើកិច្ចសន្យា កសិកម្មគ្រាប់ស្វាយចន្ទីសរីរាង្គតាមរយៈសហគមន៍កសិកម្ម (ឆ្នាំទី១)” ផ្តល់ ៦៦៧.១១៧ ដុល្លារអាមេរិក ដល់វិទ្យាស្ថានកែលំអ និងអភិរក្សបរិស្ថាន(ERECON) ដើម្បីអនុវត្តលើ “គម្រោងលើកកម្ពស់លក្ខខណ្ឌកសិកម្ម ដោយមាននិរន្តរភាព ដើម្បីកាត់បន្ថយភាពក្រីក្រ ក្នុងខេត្តកំពង់ចាម” និង ៨២៤.៧៥៣ ដុល្លារអាមេរិក ដល់អង្គការសកម្មភាពកម្ចាត់មីនជប៉ុន (JMAS) ដើម្បីអនុវត្តគម្រោង “ការលើកកម្ពស់ការអភិវឌ្ឍន៍ សហគមន៍ ជាមួយនឹងការដោះមីន ក្នុងខេត្តបន្ទាយមានជ័យ“។
ចំណែកនៅថ្ងៃព្រហស្បតិ៍ទី៤ ខែតុលា ឆ្នាំ២០១៨ នៅទីបញ្ជាករដ្ឋានស៊ីម៉ាក់ភ្នំពេញ មានចុះហត្ថលេខា លើកិច្ចសហប្រតិបតិ្តការ រវាងអង្គភាពស៊ីម៉ាក់ និងអង្គការJMAS ដោយអង្គការ JMAS ផ្តល់ជំនួយជាថវិកាចំនួនប្រមាណ ៤២ ម៉ឺនដុល្លារអាមេរិក សម្រាប់បោសសំអាតចំការមីន ជាអាទិភាពខ្ពស់ៗ ជាង៣០០ហិកតា ស្ថិតនៅស្រុកម៉ាឡៃ និងស្រុកអូរជ្រៅ ខេត្តបន្ទាយមានជ័យ ថវិកានេះ ឧបត្ថម្ភគាំទ្រដោយរដ្ឋាភិបាលជប៉ុន)។ គម្រោងនេះ ក៏មានគាំទ្រអ្នករងគ្រោះដោយសារមីន តាមរយៈការអភិវឌ្ឍន៍ក្នុងមូលដ្ឋាន នៃតំបន់បោសសំអាតមីនរួចផងដែរ។ គម្រោងនេះ មានរយៈពេល១២ខែ ចាប់ពីថ្ងៃទី៨ តុលា ២០១៨ ដល់ ថ្ងៃទី៨ តុលា ២០១៩៕ ដោយ ៖ កូឡាប
