ប៉ូលិសបារាំងបើកការស៊ើបអង្កេត នៅក្រោយការជូនដំណឹងពីភរិយារបស់លោក ម៉េង ហុងវៃ ដែលបានអះអាងថា លោក ម៉េង ហុងវៃ ដែលបានធ្វើដំណើរទៅប្រទេសចិន បានបាត់ខ្លួន គ្មានផ្តល់ដំណឹងអ្វី តាំងពីចុងខែកញ្ញា (ថ្ងៃទី ២៩កញ្ញា) កន្លងទៅ។ នៅថ្ងៃសុក្រ ម្សិលមិញ កាសែតហុងកុង South China Morning Post បាន South China Morning Post បានសរសេរថា លោកម៉េង ហុងវៃ ប្រធានប៉ូលិសអាំងទែរប៉ូល ដែលមានទីស្នាក់ការនៅទីក្រុងលីយ៉ុងប្រទេសបារាំង ត្រូវបានអាជ្ញាធរចិនចាប់ឃាត់ខ្លួនតាំងពីពេលលោកចុះពីលើយន្តហោះម្ល៉េះ។
តាមកាសែតហុងកុងចេញផ្សាយជាភាសាអង់គ្លេស អាជ្ញាធរចិនត្រូវការសាកសួរលោក ម៉េង ហុងវៃ ដែលកំពុងជាប់ពាក់ព័ន្ធនឹងសំណុំរឿងស៊ើបអង្កេតមួយនៅប្រទេសចិន។ កាសែតហុងកុង មិនបានលម្អិតទេថា តើអាជ្ញាធរចិន ចង់សួរចម្លើយលោកម៉េង ពីរឿងអ្វី ហើយនៅកន្លែងណានោះទេ។
នៅក្នុងសេចក្តីថ្លែងការណ៍របស់ខ្លួន នៅថ្ងៃម្សិលមិញ អង្គការប៉ូលិសព្រហ្មទណ្ឌអន្តរជាតិ ហៅកាត់ថា អាំងទែរប៉ូលមិនបានអត្ថាធិប្បាយអ្វីច្រើនទេ គ្រាន់តែបញ្ជាក់ថា សំណុំរឿងបាត់ខ្លួន លោកម៉េង ហុងវៃ ជាសមត្ថកិច្ចរបស់អាជ្ញាធរបារាំង និងអាជ្ញាធរចិន។ ស្ថាប័នអាំងទែរប៉ូលនៅបានបន្ថែមថា គឺអគ្គលេខាធិការរបស់អាំងទែរប៉ូល ជាតិអាល្លឺម៉ង់ដែលទទួលបន្ទុកសម្រេចលើដំណើរការងារប្រចាំថ្ងៃ របស់អាំងទែរប៉ូល ចំណែក លោកម៉េង ហុងវៃ ក្នុងនាមជាប្រធាន មាននាទីជាអ្នកដឹកនាំ មើលការខុសត្រូវ ជាទូទៅរបស់ស្ថាប័នអាំងទែរប៉ូល។
លោកម៉េង ហុងវៃ ចូលកាន់តំណែងជាប្រធាន អាំងទែរប៉ូល កាលពីខែវិច្ឆិកាឆ្នាំ២០១៦ ត្រូវបញ្ចប់អាណត្តិនៅឆ្នាំ ២០២០។ អង្គការការពារសិទ្ធិមនុស្សជាច្រើន បានបរិហាររិះគន់ ការសម្រេចចិត្តរបស់អង្គការអាំងទែរប៉ូល ព្រោះថា លោកម៉េង ហុងវៃជាមន្ត្រីជាន់ខ្ពស់ និងមានតួនាទីសំខាន់ក្នុងបក្សកុម្មុយនិស្តចិន។ អង្គការការពារសិទ្ធិមនុស្ស Amnesty International សំដែងក្តីបារម្ភថា ដោយមានមន្ត្រីរបស់ខ្លួនដឹកនាំក្បាលម៉ាស៊ីនប៉ូលិសអន្តរជាតិ ដូចជាអាំងទែរប៉ូល ទីក្រុងប៉េកាំងរឹតតែមានអំណាច តាមចាប់ ក្រុមអ្នកប្រឆាំង រិះគន់នៅបរទេស។
អង្គការអាំងទែរប៉ូលវិញ ធ្លាប់បានអះអាងហើយថា ទោះបានធ្វើជាប្រធានប៉ូលិសអាំងទែរប៉ូលមែន ប៉ុន្តែទៅតាមមាត្រាទី ៣នៃលក្ខន្តិកៈរបស់អង្គការ ដែលមានសមាជិក១៩៥ប្រទេសលោកម៉េង ហុងវៃ មិនអាចយកហេតុផលនយោបាយជាតិ មកលូកលាយឡំចូលក្នុងកិច្ចការរបស់ស្ថាប័ន ប៉ូលិសអន្តរជាតិនោះទេ។
គួរបញ្ជាក់ថា នៅមុនជ្រើសតាំង ជាប្រធានប៉ូលិសព្រហ្មទណ្ឌអន្តរជាតិ ហៅកាត់ថា អាំងទែរប៉ូល ដែលមានទីស្នាក់ការនៅទីក្រុងលីយ៉ុង លោក ម៉េង ហុងវៃ ធ្លាប់ជាអតីតអនុរដ្ឋមន្ត្រីក្រសួងសន្តិសុខជាតិចិន ដែលមានបទពិសោធន៍ ខាងប៉ូលិសយុត្តិធម៌ ៤០ឆ្នាំ ជាពិសេស ខាងផ្នែក ប្រយុទ្ធប្រឆាំងគ្រឿងញៀន ការជួញដូរមនុស្ស ហើយនិងត្រួតពិនិត្យព្រំដែន។ នេះបើតាមជីវប្រវត្តិរបស់លោកម៉េង នៅលើវិបសៃតិ៍របស់អាំងទែរប៉ូល៕
សូយន