សមត្ថកិច្ចបារាំងបានប្រើប្រាស់ឧទ្ធម្ភាគចក្រដឹកខ្លាឃ្មុំញីមួយក្បាលនាំចូលពីSlovenia ទៅកាន់តំបន់ភ្នំPyrenees ទោះបីជាកសិករនៅតំបន់នោះបានស្រែកប្រឆាំងយ៉ាងណាក្តី។
ប្រភពពីAFP នៅថ្ងៃទី៥តុលា ខ្លាឃ្មុំញីមួយក្បាលត្រូបានលែងនៅតំបន់Pyrenees ហើយបើតាមក្រសួងបរិស្ថានបារាំង គេនឹងបញ្ជូនបន្តខ្លាឃ្មុំមួយទៀតទៅកាន់តំបន់នោះដើម្បីជួយបង្កើនសហគមន៍ខ្លាឃ្មុំនៅទីនោះ។
រដ្ឋាភិបាលបារាំងក៏ប្រកាសថានឹងបញ្ជូនបន្ថែមខ្លាឃ្មុំញីពីរក្បាលទៅកាន់តំបន់ភ្នំPyrenees ព្រោះនៅទីនោះមានខ្លាឃ្មុំពីរក្បាលកំពុងតែឯកោ។
បច្ចុប្បន្នមានខ្លាឃ្មុំប្រមាណ៤០ក្បាលកំពុងរស់នៅតំបន់ភ្នំPyrenees ចន្លោះព្រំដែនបារាំងនិងអេស្ប៉ាញ ហើយខ្លាឃ្មុំទាំងនេះជាច្រើនត្រូវបាននាំចូលពី Slovenia តាំងពីឆ្នាំ១៩៩៦មកម្ល៉េះ ព្រោះតែខ្លាឃ្មុំនៅតំបន់នេះបានរងការប្រមាញ់ជិតផុតពូជហើយ។
យ៉ាងណាក្តី កសិករនៅតំបន់នេះបានធ្វើការប្រឆាំងនឹងរដ្ឋាភិបាលយ៉ាងខ្លាំងក្លា ព្រោះពួកគេព្រួយបារម្ភថាខ្លាឃ្មុំទាំងនោះនឹងស៊ីសត្វចៀមរបស់គេ៕
លីសា