ឆ្នាំនេះ សម្រាប់ពានរង្វាន់ណូបែលសន្តិភាព គឺមានបេក្ខភាពច្រើនណាស់ រហូតដល់ទៅ៣៣១បេក្ខភាព មានទាំងជាបុគ្គលឯកជន និងស្ថាប័នអង្គការនានា។ មានការប៉ាន់ស្មានជាច្រើន ថា មេដឹកនាំកូរ៉េទាំង២ អាចបានទទួលពានរង្វាន់ឆ្នាំនេះទៀត បន្ទាប់ពីប្រទេសទាំងពីរបានខិតខំ ចាប់ដៃគ្នា កសាងសន្តិភាពឡើងវិញ។
ក៏ប៉ុន្តែទីបំផុតសមាជិកទាំង៥រូប នៃគណៈកម្មការពានរង្វាន់ណូបែល ទើបតែបានសម្រេចប្រគល់ពានរង្វាន់ណូបែលសន្តិភាព ជូនទៅបុគ្គល២រូប ដែលអ្នកទាំង២ សុទ្ធតែបានបូជាកម្លាំងកាយចិត្ត ក្នុងយុទ្ធនាការប្រយុទ្ធប្រឆាំង នឹងអំពើហិង្សាផ្លូវភេទ និងការជួញដូរផ្លូវភេទទៅលើស្ត្រី។ បុគ្គលទីមួយ មានឈ្មោះថា ណាដ្យ៉ា មូរ៉ាដ ជាស្ត្រីជនជាតិយ៉ាហ្ស៊ីឌី ហើយដែលធ្លាប់រងគ្រោះ ក្លាយជាទាសករផ្លូវភេទ របស់ក្រុមជីហាតអង្គការរដ្ឋអ៊ីស្លាម នៅស៊ីរី។ ចំណែកបុគ្គលទី២ គឺលោកវិជ្ជបណ្ឌិត ដេនី ម៉ាក្វេហ្គឺ។ លោកគឺជាវិជ្ជបណ្ឌិតរោគស្ត្រី នៅសាធារណរដ្ឋប្រជាធិបតេយ្យកុងហ្គោ។
អស់រយៈពេល២០ឆ្នាំមកហើយ ដែលលោកវិជ្ជបណ្ឌិត បានព្យាយាមជួយសង្គ្រោះ ព្យាបាល និងការពារស្ត្រីជនជាតិកុងហ្គោ ដែលរងគ្រោះដោយការធ្វើទារុណកម្មផ្លូវភេទ មិនតិចជាង៥ម៉ឺននាក់ទេ។
សេចក្តីថ្លែងការណ៍របស់គណៈកម្មាធិការណូបែល បានលើកឡើងដូច្នេះថា «អ្នកទាំងពីរទទួលបានពានណូបែលសន្តិភាព ដោយសារតែកិច្ចខិតខំប្រឹងប្រែងរបស់អ្នកទាំងពីរ ក្នុងការបញ្ឈប់អំពើហិង្សាផ្លូវភេទ។ លោក Mukwege មានការប្តេជ្ញាតស៊ូការពារជនរងគ្រោះនៃអំពើហិង្សាផ្លូវភេទ ខណៈអ្នកនាង Murad ជាសាក្សីផ្ទាល់ដែលរៀបរាប់ឲ្យយើងទាំងអស់គ្នាបានដឹង ពីអំពើអាក្រក់ៗ ដែលជនដៃដល់បានប្រព្រឹត្តទៅលើរូបនាង ព្រមទាំងនារីដទៃទៀត។ បុគ្គលទាំងពីរនាក់នេះ បានជួយបង្ហាញពួកយើងឲ្យមើលឃើញកាន់តែច្បាស់ពីអំពើហិង្សាផ្លូវភេទក្នុងសម័យសង្គ្រាម ដើម្បីឲ្យជនដៃដល់ទាំងឡាយ ត្រូវទទួលរងលទ្ធផលនៃទង្វើរបស់ពួកគេ»។
លោកស្រី Berit Reiss-Andersen ប្រធានគណៈកម្មាធិការពានរង្វាន់ណូបែល បានមានប្រសាសន៍ នៅក្នុងពេលប្រកាសលទ្ធផលថា ពិភពលោកយើងនឹងគ្មានសន្តិភាពទេ ដរាបណាស្ត្រី នៅតែរស់នៅក្នុងភាពភ័យខ្លាច និងអសន្តិសុខ។ សិទ្ធិជាមូលដ្ឋានរបស់ស្ត្រី ត្រូវតែទទួលបានការការពារ ទោះបីជាស្ថិតក្នុងកាលៈទេសៈសង្គ្រាមក៏ដោយ។ លោកស្រីបានបន្ថែមថា លោក ដេនី ម៉ាក្វេហ្គឺ និងនាង ណាដ្យ៉ា មូរ៉ាដ គឺជាគំរូវីៈភាព ភាពក្លាហាន និងការតស៊ូមានៈ ដើម្បីបុព្វហេតុសិទ្ធិស្ត្រី នៅទូទាំងពិភពលោក៕ ចន្ទ្រា