សត្វកម្រច្រើនប្រភេទកំពុងតែរស់នៅក្នុងឧទ្យានជាតិវីរៈជ័យ ក្នុងខេត្តរតនគិរី។ នេះគឺជាការបញ្ជាក់ឲ្យដឹងពីលោក នេត្រ ភក្ត្រា រដ្ឋលេខាធិការ និងជាមន្ដ្រីនាំពាក្យក្រសួងបរិស្ថាន។
ការអះអាងរបស់លោក នេត្រ ភក្ត្រា យ៉ាងដូច្នេះ ធ្វើឡើងដោយសម្អាងលើរូបភាពជាច្រើនសន្លឹក ដែលថតបានដោយម៉ាស៊ីសត្វខ្លាឃ្មុំ ស្វាក្រវ៉ាត់ មាន់ព្រៃ សំពោចភ្នំ ឈ្លូស និងសត្វជាច្រើនប្រភេទទៀត ក្នុងនោះមានទាំងសត្វកម្រផងត្រូវបានឃើញមានវត្តមាន នៅក្នុងឧទ្យានជាតិវីរៈជ័យ ក្នុងខេត្តរតនគិរី។ នេះបើយោងតាមការឱ្យដឹងរបស់លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន នៅថ្ងៃទី៥ ខែតុលា ឆ្នាំ២០១៨ នេះ។
លោកបានថ្លែងថា ទិន្ន័យនិងរូបភាពដែលបញ្ជាក់ពីវត្តមានជីវៈចម្រុះទាំងនេះទទួលបានពីម៉ាស៊ីនថតដោយស្វ័យប្រវត្តិដែលមន្ត្រីឧទ្យានុរក្សនៃឧទ្យានជាតិវីរជ័យ បានដាក់ចាប់តាំងពីថ្ងៃទី២៦ ខែកញ្ញា រហូតដល់ ថ្ងៃទី៤ ខែតុលា ឆ្នាំ ២០១៨ នៅតាមទីតាំងមួយចំនួនក្នុងឧទ្យានជាតិនេះ។
បង្កើតឡើងនៅក្នុងឆ្នាំ១៩៩៣ ឧទ្យានជាតិវីរៈជ័យ មានផ្ទៃក្រឡាសរុប ៣ ៣២៥ គីឡូម៉ែត្រក្រឡា លាតសន្ធឹងគ្របដណ្ដប់ខេត្តពីរ គឺស្ទឹងត្រែង និងរតនគិរី។ ក្រៅពីឧទ្យានជាតិវីរៈជ័យ កម្ពុជាមានឧទ្យានជាតិចំនួន៦ផ្សេងទៀត ដូចជា ឧទ្យានជាតិព្រះសុរាម្រិតកុសុមៈគីរីរម្យ ឧទ្យានជាតិបុទុមសាគរ ឧទ្យានជាតិមុនីវង្សបូកគោ ឧទ្យានជាតិកែប ឧទ្យានជាតិព្រះសីហនុរាម និងឧទ្យានជាតិភ្នំគូលែន។
សូមបញ្ជាក់ថា ក្រោយពីមានកំណែទម្រង់ស៊ីជម្រៅលើតួនាទី និងការទទួលខុសត្រូវរបស់ក្រសួងបរិស្ថាន និងក្រសួងកសិកម្ម មានការផ្ទេរនូវតំបន់អភិរក្សមួយចំនួនពីក្រសួងកសិកម្មឱ្យមកក្រសួងបរិស្ថាន គ្រប់គ្រង និងអភិរក្ស។
ក្រសួងបរិស្ថានបញ្ជាក់ថា សព្វថ្ងៃនេះ ក្រសួងគ្រប់គ្រងតំបន់ការពារធម្មជាតិ និងរបៀងអភិរក្សជីវៈចម្រុះទំហំជាង ៧,៥លានហិកតា។ និងថា ក្រសួងបានដាក់មន្ដ្រីឧទ្យានុរក្សចំនួន ១ ២៦០នាក់ ដើម្បីដើរល្បាត ការពារធនធានធម្មជាតិ និងអភិរក្សជីវៈចម្រុះ សម្បត្តិធម្មជាតិនិងវប្បធម៌ នៅក្នុងផ្ទៃដីទាំង ៧,៥លានហិកតានោះ៕ ចន្ទ្រា