ប្រធានាធិបតីហ្វីលីពីន លោក Rodrigo Duterte បានស្ថិតនៅក្នុងទីក្រុងហុងកុង កាលយប់ថ្ងៃសៅរ៍ រួមជាមួយភរិយារបស់លោកអ្នកស្រី Honeylet Avancena និងកូនស្រីរបស់ពួកគេឈ្មោះ Kitty ។
បណ្តារូបថតដែលផុសនៅលើហ្វេសប៊ុក ដោយជំនួយការពិសេសរបស់ប្រធានាធិបតី (SAP) Christopher ‘Bong’ Go កាលពីយប់ថ្ងៃទី៦ តុលា លោក Duterte បានបង្ហាញខ្លួននៅកន្លែងទទួលទាន និងឡើងផ្សារ នៅក្នុងតំបន់ Causeway Bay ។
កាសែត South China Morning Post បានចុះផ្សាយឲ្យដឹងថា លោក Duterte កំពុងស្នាក់នៅជាមួយគ្រួសាររបស់លោកនៅឯសណ្ឋាគារ Grand Hyatt នៅក្នុងតំបន់ Wan Chai ។ យោងតាមប្រភពរបស់រដ្ឋាភិបាលហុងកុង នោះសន្តិសុខត្រូវបានរឹតបណ្តឹងនៅក្នុងតំបន់នេះ ។
ប្រភពដដែលបានប្រាប់ SCMP ថា៖ «លោក និងសមាជិកគ្រួសារ នឹងចាកចេញបីទីក្រុងហុងកុងនៅថ្ងៃទីអាទិត្យ ។ គ្រួសាររបស់លោក Duterte មកកាន់ទីនេះ ដើម្បីសម្រាកលំហែកាយប៉ុណ្ណោះ ហើយនឹងពុំមានព្រឹត្តិការណ៍ផ្លូវការអ្វីនោះទេ» ។
ដំណើរកំសាន្តរបស់គ្រួសារលោក Duterte បានមកទីនេះត្រឹមរយៈពីរបីថ្ងៃប៉ុណ្ណោះ បន្ទាប់ពីមានភាពចម្រូងចម្រាស់ផ្សេងៗ អំពីស្ថានភាពសុខភាពរបស់លោក ។ លោក Duterte ខ្លួនឯងបានថ្លែងនៅក្នុងសន្ទរកថាកាលបីយប់ថ្ងៃព្រហស្បតិ៍ថា លោកបានចំណាយពេល១ម៉ោង នៅមន្ទីរពេទ្យដើម្បីពិនិត្យសុខភាព និងធ្វើតេស្តមួយចំនួន ៕
ដោយ៖ ចន្ទី
ប្រភព៖ Coconuts