ស្ត្រីវ័យក្មេងម្នាក់នៅរដ្ឋ Minnesota បានដាក់ពាក្យប្តឹងម្តាយរបស់ខ្លួនឯង បន្ទាប់ពីនាងត្រូវម្តាយដេញចេញពីផ្ទះ ដោយសារតែនាងមិនកក់សក់ចេញទាល់តែសោះ អស់រយៈពេល ៦ឆ្នាំ។
ស្ត្រីខាងលើមានឈ្មោះថា Amanda Bell វ័យ ២៤ឆ្នាំ បានចាត់ទុកខ្លួននាងថាជារាជនីតោ (Queen Lioness) និងបានប្តូរទៅកាន់សាសនា Rastafarianism នៅពេលនាងមានអាយុ ១៨ឆ្នាំ ក្រោយពេលបានបន្តការសិក្សានៅប្រទេសចាមៃកា និងមិនដែលបានកក់សក់ចាប់តាំងពីពេលនោះមក។
នាងអះអាងថា ម្តាយរបស់នាងបានបណ្តេញចេញពីគ្រួសារ ដើម្បីហាមឃាត់នាងមិនឲ្យប្រើប្រាស់សិទ្ធិ ក្នុងការគោរពសាសនា។
ប៉ុន្តែបើតាមការបញ្ជាក់របស់ស្ត្រីជាម្តាយវិញបានឲ្យដឹងថា កូនស្រីគាត់ជក់ថ្នាំ មិខរកការងារធ្វើនិងមិនដែលកក់សក់សោះ។
ស្ត្រីជាម្តាយបានថ្លែងប្រាប់អ្នកសារពត៌មានដូច្នេះថា “ជក់ថ្នាំញៀនពេញមួយថ្ងៃ មិនរកការងារធ្វើ និងមិនកក់ សក់ទៀត។ បើអ្នកសួរ ខ្ញុំអាចនិយាយថា នេះជាជំនឿសាសនាមិនសមហេតុផលសោះ”។
ស្ត្រីជាម្តាយឈ្មោះ Julia Bell ថ្លែងបន្តថា “សក់របស់នាងមានក្លិនស្អុយដូចខ្មោចងាប់។ នាងមិនដែលកក់វាម្តងសោះក្នុងរយៈពេល ៦ឆ្នាំហើយ ចាប់តាំងពីនាងទៅប្រទេសចាមៃកា”។
អ្នកស្រីបញ្ជាក់ទៀតថា គាត់ស្វាគមន៍កូនស្រីត្រឡប់មកវិញគ្រប់ពេលវេលា នៅពេលដែលនាងកក់សក់សំអុយនោះចេញ។ ប្រសិនជាគាត់ត្រូវហិតក្លិននោះម្តងទៀត គាត់នឹងបាញ់សម្លាប់ខ្លួនឯងជាមិនខាន។
សូមបញ្ជាក់ថា Rastafarianism គឺជាសាសនាមួយដែលកើតឡើងដំបូងក្នុងឆ្នាំ ១៩៣០ ក្នុងប្រទេសចាមៃកា៕ សុភ័ក្ត្រ
ប្រភព៖ worldnewsdailyreport
