ខេត្តព្រះសីហនុ ៖ អភិបាលក្រុងព្រះសីហនុ លោក អ៊ី សុខឡេង បានបង្ហោះសារនៅក្នុងបណ្តាញសង្គមហ្វេសប៊ុក របស់លោកថា នៅវេលាម៉ោងជាង៨យប់ ថ្ងៃទី១០ ខែតុលា ឆ្នាំ២០១៨នេះ សំរាមកំប្លោក បានអណ្តែតមកពីប្រទេសវៀតណាម ដោយរសាត់តាមទឹករលក មកទើរ នៅតាមឆ្នេរមួយចំនួន នាក្រុងព្រះសីហនុ ជាបន្តទៀតហើយ។
យ៉ាងនេះក្តី លោកអភិបាលក្រុង អ៊ី សុខឡេង បានបញ្ជាក់ថា នៅព្រឹកស្អែកវេលាម៉ោង ៧កន្លះ ថ្ងៃទី១១ ខែតុលា ឆ្នាំ២០១៨ រដ្ឋបាលក្រុង នឹងបន្តសហការជាមួយ មន្ទីរជំនាញ និងបងប្អូនអាជីវករតាមឆ្នេរនានា ដើម្បីប្រមូលកើបសំណល់កំប្លោកទាំងនោះ ចេញពីឆ្នេរអូរឈើទាល និងឆ្នេរផ្សេងៗទៀតឲ្យបានស្អាតឡើងវិញ។
គួរឲ្យដឹងដែរថា កាលពីព្រឹកថ្ងៃពុធ ទី១០ ខែតុលា ឆ្នាំ២០១៨នេះ រដ្ឋបាលក្រុង-ខេត្តព្រះសីហនុ បានសហការគ្នាជាមួយស្ដាប័នពាក់ព័ន្ធ នៃរដ្ឋបាលខេត្តនេះ ដោយបាននាំគ្នាកើបរើសសំអាតសំរាម នៅតាមឆ្នេរសមុទ្រខេត្តព្រះសីហនុ ឲ្យមានសោភណ្ឌភាពស្រស់ស្អាតម្តងរួចហើយ ប៉ុន្តែស្រាប់តែនៅព្រលប់ថ្ងៃដដែលនេះ កាកសំណល់សំរាមកំប្លោកខាងលើ បានរសាត់អណ្តែតទើរនៅតាមឆ្នេរអូរឈើទាល និងឆ្នេរមួយចំនួនទៀត ជាថ្មីម្តងទៀត៕ ដែន សីមា
