ខេត្តព្រះសីហនុ ៖ រដ្ឋបាលខេត្តព្រះសីហនុ បានឲ្យដឹងថា នៅព្រឹកថ្ងៃព្រហស្បត្តិ៍ ទី១១ ខែតុលា ឆ្នាំ២០១៨នេះ នាវេទិកា៧មករា ក្រុងព្រះសីហនុ មានប្រជាពលរដ្ឋជាង៤០០នាក់ បានមកទទួលសេវាធ្វើដំណើរតាមរយៈ រថយន្តក្រុងមិនគិតប្រាក់ចំនួន ១០គ្រឿង របស់សម្តេចប្រមុខដឹកនាំរាជរដ្ឋាភិបាលកម្ពុជា។ សេវាដឹកជញ្ជូនមិនគិតថ្លៃនេះ គឺបំរើការដឹកជញ្ជូនប្រជាពលរដ្ឋ ចេញពីក្រុងព្រះសីហនុ ឆ្ពោះទៅកាន់កន្លែងធ្វើការ លំនៅដ្ឋាន ដើម្បីប្រកបរបរអាជីវកម្ម របស់ខ្លួនវិញ បន្ទាប់ពីបានធ្វើដំណើរចូលមកកម្សាន្ត ឬទស្សនាខេត្តព្រះសីហនុ នាឱកាសពិធីបុណ្យភ្ជុំបិណ្ទឆ្នាំនេះ។
មន្ត្រីរដ្ឋបាលខេត្តព្រះសីហនុ ឲ្យដឹងថា សេវាដឹកជញ្ជូនមិនគិតថ្លៃ ជូនប្រជាពលរដ្ឋនាឱកាសពិធីបុណ្យភ្ជុំបិណ្ឌនេះ គឺជាការគិតគូរ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានណែនាំឲ្យអាជ្ញាធររៀបចំ សេវាដឹកជញ្ជូនរថយន្តក្រុងខាងលើនេះ ជូនប្រជាពលរដ្ឋដោយមិនគិតថ្លៃ នាឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរឆ្នាំនេះ។
កាលពីព្រឹកព្រឹកថ្ងៃព្រហស្បត្តិ៍នេះ នៅមុនពេលរថយន្តក្រុងដឹកអ្នកដំណើរ ចាកចេញពីចំណត នាវេទិកា ៧មកករា ស្ថិតចំកណ្តាលក្រុងព្រះសីហនុ គេសង្កេតឃើញវត្តមាន ឯកឧត្តម យន្ត មីន អភិបាលខេត្តព្រះសីហនុ និងមន្ត្រីក្រោមឱវាទ នៃរដ្ឋបាលខេត្តនេះ បានអញ្ជើញមកជួបសំណេះសំណាលជាមួយអ្នកបើកបររថយន្តក្រុង ទាំង១០គ្រឿង និងប្រជាពលរដ្ឋ ដែលមកទទួលសេវាដឹកជញ្ជូនតាមរថយន្តក្រុងមិនគិតថ្លៃ ចាកចេញពីក្រុងព្រះសីហនុ ដើម្បីវិលត្រឡប់ទៅកាន់លំនៅឋានរបស់ខ្លួនវិញ។
មន្ត្រីសាលាខេត្តព្រះសីហនុ បានឲ្យដឹងថា រថយន្តក្រុងដឹកជញ្ជូនមិនគិតថ្លៃ នាឱកាសពិធីបុណ្យភ្ជុំបិណ្ឌ ដែលចេញដំណរនៅព្រឹកថ្ងៃទី១១ ខែតុលា ឆ្នាំ២០១៨នេះ គឺជាជើងដឹកជញ្ជូនចុងក្រោយ ចេញពីក្រុងព្រះសីហនុ ឆ្ពោះទៅកាន់គោលដៅផ្លូវជាតិលេខ៣ ផ្លូវជាតិលេខ៤ ឬគោលដៅរាជធានីភ្នំពេញ ដោយនៅពេលរសៀល មិនមានសេវាដឹកជញ្ជូននេះទៀតទេ៕ ដែន សីមា
