ខេត្តព្រះសីហនុ ៖ រដ្ឋបាលខេត្តព្រះសីហនុ បានចេញសេចក្តីប្រកាសព័ត៌មានចុះថ្ងៃទី១១ ខែតុលា ឆ្នាំ២០១៨ ជំរាបជូន សាធារណៈ ជន និងអ្នកសារព័ត៌មានថា ចាប់តាំងពីថ្ងៃទី៩ រហូតមកដល់ថ្ងៃទី១១ ខែតុលា ឆ្នាំ២០១៨នេះ មានកំប្លោក ដែលមានប្រភពពីសមុទ្រប្រទេសជិតខាង បានហូរអណ្តែតរសាត់លើផ្ទៃសមុទ្រ និងបានមកទើរនៅលើឆ្នេរសមុទ្រក្នុងខេត្តព្រះសីហនុ។
បញ្ហានេះ ក្រុការងាររដ្ឋបាលខេត្តព្រះសីហនុ កងកម្លាំងប្រដាប់អាវុធ រដ្ឋបាលក្រុង មន្ទីរ អង្គភាពពាក់ព័ន្ធ កំពុងចុះសំអាតតាមបណ្តោយឆ្នេរក្នុងក្រុងព្រះសីហនុ។
សេចក្តីប្រកាសព័ត៌មានដដែល ក៏បានបញ្ជាក់ប្រាប់ដល់សាធារណៈជនទាំងអស់ សូមកុំមានការព្រួយបារម្ភ ព្រោះបញ្ហានេះ មិនបានធ្វើឲ្យខូចគុណភាពទឹក សមុទ្រ ឬឆ្នេរខ្សាច់នោះទេ គ្រាន់តែធ្វើឲ្យបាត់បង់សោភ័ណភាពឆ្នេរមួយរយៈពេលខ្លីតែប៉ុណ្ណោះ។ ហើយថា ក្រោយពីការសម្អាតរួចរាល់ឆ្នេរខ្សាច់ នឹងមកសភាស្រស់ស្អាតដូចដើមវិញជាក់ជាមិនខាន។
ផ្តើមពីបញ្ហានេះ រដ្ឋបាលខេត្តព្រះសីហនុ បញ្ជាក់ថា ដើម្បីពន្លឿនការងារសម្អាតកំប្លោក ឬកាកសំណល់សំរាម នៅតាមឆ្នេរនានា ឲ្យ មានសោភ័ណភាពដូចដើមបានឆាប់ គឺរដ្ឋបាលខេត្តបានអំពាវនាវដល់បងប្អូនអាជីវករ ដែលកំពុងប្រកបអាជីវកម្មតាមឆ្នេរសមុទ្រ ឲ្យចូលរួមសម្អាតឆ្នេរ ដែលមានកំប្លោក នៅមុខទីតាំងបើកធ្វើអាជីវកម្មរៀងៗខ្លួន ឲ្យបានស្អាតល្អឡើងវិញ។
ខាងក្រោមនេះ គឺរូបថត នៃសកម្មភាពចុះជួយសម្អាតឆ្នេរសមុទ្រមួយចំនួន ពិសេសឆ្នេរអូរឈើទាល របស់ប្រជាពលរដ្ឋ អាជីវករ សិស្សនិស្សិត វិស័យឯកជន កងកម្លាំងប្រដាប់អាវុធ ទាំងនគរបាល កងរាជអាវុធហត្ថ កងយោពលខេមរភូមិន រដ្ឋបាលក្រុង មន្ទីរ អង្គភាពពាក់ព័ន្ធ ក្រោមឱវាទ នៃរដ្ឋបាលខេត្តព្រះសីហនុ ដឹកនាំដោយ ឯកឧត្តម យន្ត មីន អភិបាលខេត្តព្រះសីហនុ កាលពីព្រឹកថ្ងៃព្រហស្បត្តិ៍ ទី១១ ខែតុលា ឆ្នាំ២០១៨ ៕ ដែន សីមា
