ករណីពិធីភ្ជាប់ពាក្យមួយតាមរយៈការបង្ហាញមុខមាត់កូនកំលោះ នៅក្នុងវីដេអូ Live ដើម្បីបង្គ្រប់កិច្ច «ផ្ទឹម» នឹងកូនក្រមុំអង្គុយឯកោតែឯង ដោយគ្រាន់តែមានចាស់ទុំទាំងសងខាងចូលរួមដឹងលឺ បានកំពុងបង្កភាពដ៏ចម្រូងចម្រាស់ឡើងកក្រើកបណ្តាញសង្គមហ្វេសប៊ុកតែម្តង ពីសំណាក់អ្នកលេងអ៊ីនធើរណែតយ៉ាងច្រើន ។
មតិស្របបានលើកឡើងពីហេតុផលថា៖ «មកពីខាងប្រុសជាប់កតព្វកិច្ចនៅស្រុកគេ និងពុំអាចលៃលកពេលវេលា សម្រាប់ថ្ងៃភ្ជាប់ពាក្យរបស់ពួកគេបាន ។ សំណាងហើយ ដែលសម័យនេះមានបច្ចេកវិទ្យាជឿនលឿន អាចផ្តល់វីដេអូមើលមុខគ្នាឃើញ ក្រោមការដឹងលឺជាសាក្សី ពីចាស់ទុំ សាច់ញាតិ គ្រួសារទាំងសងខាង ។ ហើយអ្វីដែលសំខាន់នោះ គឺថាប្រសិនបើដល់ថ្ងៃរៀបអាពាហ៍ពិពាហ៍ ពុំឃើញមានវត្តមានកូនកំលោះ ទើបវាជារឿងចម្លែកតែម្តង!» ។ «សូមបងប្អូនពិចារណាតាមគំនិតវិជ្ជមាន មុនរៀបអាពាហ៏ពិពាហ៍គឺត្រូវមានការចូលចែចូវ រឺឈានចូលដល់ភ្ជាប់ពាក្យ, ករណីនេះគឺខាងប្រុសជាប់កតព្វកិច្ចការងារមិនអាចមកបាន ចឹងហើយគាត់ត្រូវភ្ជាប់ពាក្យមុនពេលគាត់មានឱកាសមកគឺគាត់រៀបការតែម្តង, គិតមើលអោយដល់មើល ធ្វើចឹងគួរអោយអស់សំណើច? បាក់មុខគ្រួសារ? ចុះអារត់តាមគ្នា ពោះធំមុនការ ប្រុសរាប់ភ្លេចនុះវិញបំពេញមុខ ម៉ែឪ?? ខ្មែរអឺយខ្មែរគំនិតអវិជ្ជមានរហូតចឹងបានទៅណាមិនរួច???» ។ «មិនមានឃើញអីទាស់ផងបើខាងប្រុសនៅស្រុកគេមិនមែនចង់មកៗស្រាច់ចិត្តឯណា
សំខាន់គឺគេបានយកប៉ាម៉ា់់គេមកជាចាស់ជាទុំហើយ សើចយំគេមេសមានគិតអាណិតដល់គ្នាជាម្ចាស់ខ្លួនអត់ថាគេមានអារម្មណ៍យ៉ាងណា ជាមនុស្សស្រីដូចគ្នា
គ្មាននាក់ណាចង់បែបនឹងទេតែមកពីមានហេតុផលរៀងៗខ្លួន» ។
ក្រឡេកមកមើលមតិផ្ទុយវិញម្តង៖ «ចឹងអី ខ្ជិលភ្ជាប់និស្ស័យជាមួយណាស់ មើលទៅដូចខ្វះប្រុសមិនបាន ឃ្លានចង់បានហួស ??», «ចុះកពិបាកមេះបើកូនប្រុសមិនទុំនេចាំថ្ងៃណាកខែណាទុំនេទៅប្រញាប់មេះ», «បើស្រឡាញ់នាងគួរអោយតម្លៃនាងបន្តិចទៅទួសរវល់យ៉ាងណាក៍ដោយ…….បើគ្រាន់តែពេលវេលាដែលសំខាន់ប៉ុណ្ណឹងហើយមិនបានផ្តល់ឲនាងផងចុះទម្រាំថ្ងៃក្រោយទៅជាយ៉ាងណា?» ។
ទោះយ៉ាងណា អាខោនហ្វេសប៊ុកឈ្មោះ Seng Vannzané ដែលអះអាងថាជាបងប្រុសបង្កើតកូនកំលោះ បានចូលខមិនបកស្រាយអំពីហេតុផលដែលប្អូនរបស់គាត់ពុំបានមកចូលរួមភ្ជាប់ពាក្យបានយ៉ាងដូចច្នេះថា៖
«សួស្ដីប្រិយមិត្តក្នុងបណ្តាញ Facebook ទាំងអស់គ្នា ខ្ញុំបាទជាប្អូនប្រុសបង្កើត របស់កូនកំលោះ ខ្ញុំសូមបកស្រាយនូវកិច្ចពិធីភ្ជាប់ពាក្យដូចរូបខាងក្រោមនេះ មូលហេតុដែលមានរូបភាពនេះកើតឡើងដោយសារតែ កូនកំលោះ ឈ្មោះ #សេងវណ្ណហ្សានណូ ជាប់ភារកិច្ច #បម្រើជាតិ គឺកូនកំលោះ ជាប់ទៅរៀន យក #បណ្ឌិតយោធា នៅឯប្រទេសវៀតណាម ហើយពេលថ្ងៃភ្ជាប់ពាក្យនោះ កូនកំលោះត្រូវរៀបចំឯកសារ ដើម្បីការពារចូលរៀន ទើបមិនអាចមកចូលរួម កម្មវិធីភ្ជាប់ពាក្យនេះបាន ហើយពេលកម្មវិធីចាប់ផ្ដើម តាអាចារ្យចង់ឃើញរូបកំលោះ ទើបខ្ញុំក៏បាន Call Video តាម facebook ដើម្បី បង្ហាញមុខអោយ តាអាចារ្យបានឃើញ ហើយកូនកំលោះផងដែរ ចង់បង្ហាញក្ដីស្រលាញ់ ជូនកូនក្រមុំ ទើបផុសរូបនេះ ដើម្បីបង្ហាញពីភក្ដីស្នេហ៍ជូនកូនក្រមុំសូមបងប្អូនទាំងគ្នា កុំយល់ច្រឡំ ហើយក៏សូមអរគុណបងប្អូនទាំងអស់គ្នាផងដែរ ដែលបានចាប់អារម្មណ៍រឿងនេះ តែខ្ញុំគិតថាវាមិនមានអ្វីចម្លែកទេ ព្រោះរឿងនេះក៏ធ្លាប់កើតឡើងរាប់មិនអស់ទេនៅក្នុងសង្គមខ្មែរយើង ពេលខ្លះ កូនក្រមុំ ផ្ទឹមជាមួយ ខោអាវ ឬ ស្បែកជើងកូនកំលោះក៏មានដែរ ។សូមអរគុណ!»
