ភ្នំពេញ ៖ សិស្សវិទ្យាល័យទួលទំពូង និង វិទ្យាល័យសាមគ្គី ២នាក់ ធ្វើសកម្មភាពឆក់ការបូបស្ពាយ ពីស្ត្រីជនជាតិអ៊ិស្លាមម្នាក់ តែត្រូវអ្នកបើកម៉ូតូកង់បី គៀរម៉ូតូផ្ទប់នឹងទ្រូងផ្លូវបណ្តាល អោយដួល និងឃាត់ខ្លួនបានទាំង២នាក់តែម្តង។
ហេតុការណ៍នេះកើតឡើងកាលពីវេលាម៉ោង១១ និង១៥នាទីយប់ ថ្ងៃទី១១ ខែតុលា ឆ្នាំ២០១៨ ត្រង់ចំណុចមុខផ្ទះលេខ៣២៦ផ្លូវម៉ៅសេទុង ក្រុមទី៣៥ ភូមិ១២ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
ជនសង្ស័យទី១. ឈ្មោះ វណ្ណ វិសាន់ ភេទប្រុស ជនជាតិខ្មែរ អាយុ១៧ឆ្នាំ ជនជាតិខ្មែរ មុខរបរ សិស្សវិទ្យាល័យទួលទំពូងថ្នាក់ទី១០ E ស្នាក់នៅផ្ទះ ពុំស្គាល់លេខ ផ្លូវលំ ភូមិឫស្សីសង្កាត់ស្ទឹងមានជ័យ២ ខណ្ឌមានជ័យរាជធានីភ្នំពេញ (អ្នកបើកម៉ូតូ)ធ្វើសកម្មភាព ។ ទី២. ឈ្មោះ សុខ ណៃ ភេទប្រុស ជនជាតិខ្មែរអាយុ១៧ឆ្នាំ មុខរបរសិស្សវិទ្យាល័យ សាមគ្គីថ្នាក់ទី 10 E1 ស្នាក់នៅពុំពិតប្រាកដ (ដេកចល័ត) អ្នកធ្វើសកម្មភាពឆក់ ។
ចំណែកជនរងគ្រោះ ឈ្មោះ យា សាអ៊ីនី ភេទស្រី អាយុ២៤ឆ្នាំ ជនជាតិខ្មែរអ៊ិស្លាម ស្នាក់នៅផ្ទះជួល ផ្លូវលំក្រុម សង្កាត់ទឹកថ្លា ខណ្ឌសែនសុខរាជធានីភ្នំពេញ។
វត្ថុតាងចាប់យកមាន៖ ម៉ូតូមួយគ្រឿងម៉ាក ហុងដាស្កុបពីពណ៌ខ្មៅ ពាក់ស្លាកលេខ ភ្នំពេញ 1HE1097 ដែលមានលេខតួ និងលេខម៉ាស៊ីន : KT11OD.8133369 (ជនសង្ស័យជិះធ្វើសកម្មភាព។ កាបូបស្ពាយ ពណ៍ទឹកមាសចំនួន១ (ជារបស់ជនរងគ្រោះដែលជនសង្ស័យឆក់ ) បានធ្វើការប្រគល់ជូនរងគ្រោះវិញតាមការស្នើសុំ ដោយមានការឯកភាពពីលោក ចែ សុង ព្រះរាជអាជ្ញារង នៃអយ្យការអមសាលាដំបូង រាជធានីភ្នំពេញ ។
ប្រភពអោយដឹងថា នៅថ្ងៃទី១១ ខែតុលា ឆ្នាំ២០១៨ វេលាម៉ោងប្រហែល១១.១៥នាទីយប់ ជនរងគ្រោះឈ្មោះ យា សាអ៊ីនីភេទស្រីអាយុ២៤ឆ្នាំ ជនជាតិខ្មែរ ឥស្លាមបានជិះម៉ូតូកង់បី (ឥណ្ឌា) ចេញពីហាងម្ហូបខ្មែរ តាមបណ្តោយផ្លូវម៉ៅសេទុង រហូតមកដល់ចំណុចមុខផ្ទះ ៣២៦ ផ្លូវ ម៉ៅសេទុងក្រុម៣៥ភូមិ១២ សង្កាត់បឹងសាឡាង ខណ្ឌទួលគោក រាជធានីភ្នំពេញ។ ស្រាប់តែមានជនសង្ស័យចំនួនពីរនាក់ជិះម៉ូតូស្កុបពីពណ៏ខ្មៅជិះតាមមកពីក្រោយម៉ូតូកង់បីដោយ អែបខាងឆ្វេងដៃ ហើយជនសង្ស័យជិះខាងក្រោយក៏បានធ្វើសកម្មភាពឆក់ការបូបស្ពាយរបស់ជនរងគ្រោះដែលកំពុងជិះនៅលើកង់បីបណ្តាលអោយដាច់ខ្សែ បានសំរេច ពេលនោះអ្នកបើកម៉ូតូកង់បីក៏បានគៀរម៉ូតូជនសង្ស័យផ្ទប់នឹងទ្រូងផ្លូវបណ្តាលអោយដួលម៉ូតូព្រមទាំងម៉ូតូកង់បីក៏ក្រឡាប់ពេលនោះកំលាំងល្បាតក៏បានទៅដល់ធ្វើការឃាត់ជនសង្ស័យបានទាំងពីរនាក់ជាក់ស្តែងរួមទាំងវត្ថុតាងតែម្តង។
បច្ចុប្បន្ន ជនសង្ស័យខាងលើ កំពុងឃាត់ខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីធ្វើការ សាកសួរ កសាងសំណុំរឿង និងបញ្ជូនជនសង្ស័យទៅសាលាដំបូង រាជធានីភ្នំពេញ ចាត់ការតាមនីតិវិធីច្បាប់ ៕ ដោយ ៖ បញ្ញាស័ក្តិ