ជាងអេឡិចត្រូនិកម្នាក់នៅក្នុងខេត្ត Guizhou បានបដិសេធក្តៅក្រហាយជាខ្លាំង នឹងការចោទប្រកាន់របស់អ្នកលេងអ៊ិនធើរណែត ដែលថាខ្លួនមានចេតនាសម្លាប់ឪពុកក្មេក នៅក្នុងជណ្តើរយន្ត ។
វីដេអូនៃហេតុការណ៍ដ៏រន្ធត់មួយ ដែលត្រូវបានចែករំលែកនៅលើបណ្តាញសង្គម កាលពីថ្ងៃសុក្រសប្តាហ៍មុន បានបង្ហាញឲ្យឃើញបុរសវ័យក្មេងម្នាក់ និងបុរសចំណាស់ម្នាក់ កំពុងឈររង់ចាំចូលជណ្តើរយន្តជាមួយគ្នា ។ ខណៈពេលបន្ទាប់ក្នុងវីដេអូ បុរសវ័យក្មេងដែលត្រូវបានដឹងថាត្រូវជាកូនប្រសារ បានចុចគន្លឹះមួយដើម្បីបើកទ្វារជណ្តើរយន្ត និងអើតមើលខាងក្នុង ។ ដោយជឿថា ជណ្តើរបានមកដល់ បុរសជាឪពុកក្មេកនោះក៏បានដើរចូលមុនភ្លាមៗ ហើយក៏បានធ្លាក់ចូលក្នុងនោះតែម្តង ។
បុរសជាកូនប្រសារនោះដែលមានឈ្មោះថា Zhou បានប្រាប់អ្នកសារព័ត៌មានថា ឪពុកក្មេករបស់គាត់ កំពុងទៅលេងពិធីបុណ្យ Mid-Autumn ហើយគាត់ក៏ចង់ទៅលេងសួរសុខទុក្ខសាច់ញាតិដែលរស់នៅក្នុងតំបន់នោះផងដែរ ។
ប៉ុន្តែ នៅពេលដែលគាត់ និងឪពុកក្មេក កំពុងរង់ចាំឡើងជណ្តើរយន្ត Zhou បានកត់សម្គាល់ឃើញថាមានបញ្ហាមួយជាមួយផ្ទាំងអេក្រង់ (display panel) និងបានសម្រេចដោះសោទ្វារជណ្តើរ ដើម្បីរកមើលបញ្ហា ដោយពុំដឹងថា ឪពុកក្មេកព្យាយាមដើរចូលមកទេ ។
តាមរយៈវីដេអូនេះ អ្នកលេងអ៊ីនធើរណែតជាច្រើនបានផ្ទុះការសង្ស័យថា Zhou មានចេតនាសម្លាប់ឪពុកក្មេករបស់គាត់ ។ ទោះយ៉ាងណា ការចោទប្រកាន់បែបនេះ បានធ្វើឲ្យ Zhou ប្រកែកបដិសេធយ៉ាងដាច់អលង្កាតែម្តង ដោយនិយាយថា៖ «ខ្ញុំ និងមនុស្សចាស់ គឺតែងតែមានទំនាក់ទំនងល្អនឹងគ្នាណាស់! ហេតុនេះ ខ្ញុំពុំដែលនឹកគិតមានទង្វើអាក្រក់ណាមួយ ធ្វើបាបឪពុកក្មេករបស់ខ្ញុំនោះឡើយ!!» ៕
ដោយ៖ ឧត្តម
ប្រភព៖ shanghaiist
