តាមReutersនោះ ក្នុងពេលដែលប្រធានាធិបតីអាមេរិកDonald Trump ហាក់ដូចជាកំពុងបំផុស«សង្គ្រាមត្រជាក់»ពាណិជ្ជកម្មសំដៅប្រទេសចិន នាយករដ្ឋមន្ត្រី Abe នឹងជំរុញចំណងទាក់ទងជាមួយក្រុងប៉េកាំងក្នុងជំនួបកំពូលដែលនឹងប្រព្រឹត្តទៅនៅក្នុងខែនេះ។
មុននោះ ក្រោយពេលឡើងកាន់អំណាចនៅឆ្នាំ២០១២ លោកAbe បានរក្សាជំហរតឹងរ៉ឹងចំពោះចិន ខណៈពេលដែលរវាងប្រទេសទាំងពីរ កើតមានជម្លោះទាក់ទងដល់តំបន់កោះនៅសមុទ្រចិនខាងកើត។ ប៉ុន្តែពេលនេះលោកAbe សង្ឃឹមថា ភាគីទាំងពីរអាចជំរុញតភ្ជាប់ចំណង មិត្តភាពឡើងវិញក្នុងពេលដែលក្រុងប៉េកាំងកំពុងស្ថិតក្នុងជម្លោះពាណិជ្ជកម្មកាន់តែតានតឹងឡើងជាមួយអាមេរិក។
មន្ត្រីការទូតជប៉ុនមិនបញ្ចេញឈ្មោះម្នាក់និយាយថា ៖ ដើម្បីជប៉ុនរក្សាបានកំណើនសេដ្ឋកិច្ចប្រដោយចីរភាព នោះប្រទេសនេះមិនអាចរំលងចោលចំណងទាក់ទងជាមួយខឿនសេដ្ឋកិច្ចធំលំដាប់ទី២ពិភពលោកបានឡើយ។
ជំនួបផ្លូវការដែលត្រូវបានបញ្ជាក់ថានឹងប្រព្រឹត្តទៅនៅថ្ងៃទី២៦តុលា រវាងលោកAbe និងលោកស៊ី ជីនពានគឺជាជំនួបកំពូលដំបូងគិតចាប់តាំងពីឆ្នាំ២០១១មក ។
ពាណិជ្ជករជប៉ុនចង់ឱ្យទំនាក់ទំនងទ្វេភាគីមានប្រក្រតីភាពឡើងវិញ ដើម្បីពួកគេអាចប្រកួតប្រជែងជាមួយដៃគូអាមេរិក អឺរ៉ុប។ រីឯភាគីចិនវិញសង្ឃឹមថានាយករដ្ឋមន្ត្រីAbe នឹងគាំទ្រដល់គំនិតច្នៃប្រឌិតវិថីនិងខ្សែក្រវាត់របស់ខ្លួន។
ជប៉ុនចង់ឱ្យមានការធានាចំពោះគ្រោងការណ៍រួមជាមួយចិនត្រូវតែតម្លាភាព បើកចំហ និងសមស្របលើផ្នែកហិរញ្ញវត្ថុសម្រាប់បណ្ដាប្រទេស ដែលជំពាក់បំណុល។
មន្ត្រីពណិជ្ជកម្មជប៉ុនម្នាក់ពោលថា «នេះពុំមែនជាទង្វើគាំទ្របញ្ហាវិថីនិងខ្សែក្រវាត់តែមួយនោះទេ។ ព្រោះយើងខ្ញុំមិនអាចរំលងចោលស្តង់ដារសកលលោកបានឡើយ។
ទោះយ៉ាងណា តាមលទ្ធផលនៃការស្ទាបស្ទង់មតិត្រូវបានប្រកាសជាសាធារណៈនៅថ្ងៃទី១១តុលា បង្ហាញឱ្យឃើញថា ពលរដ្ឋជប៉ុនចំនួន៨៦ភាគរយ«មានការពិចារណាអាក្រក់»អំពីចិន។
លោក Kiyoyuki Seguchi នាយកស្រាវជ្រាវនៃវិទ្យាស្ថានស្រាវជ្រាវពិភពលោក Canon សន្និដ្ឋានថា ៖ជនជាតិជប៉ុនមួយចំនួនចាត់ទុកថា ចំណងទាក់ទងជាមួយអាមេរិក កំពុងត្រូវបានចាត់ទុកជាអាទិភាពប្រៀបនឹងបញ្ហាខាងសេដ្ឋកិច្ច។ ប៉ុន្តែប្រសិនបើមានអ្នកណានោះសួរថា ប្រសិនបើគ្មានកិច្ចសហប្រតិបត្តិការជាមួយចិនតើការអភិវឌ្ឍសេដ្ឋកិច្ចប្រសើរឡើងដែរឬទេនោះ? ចម្លើយគឺ«ទេ»៕
សូយន
